కవాసకి దెబ్బకు మిగతా కంపెనీల గుండెల్లో దడ.. సగం రేటు తగ్గించి హీరో పాలిట విలన్ అయింది

బైక్ లవర్స్‎కు గుడ్ న్యూస్. ప్రపంచ ప్రఖ్యాత సూపర్ బైక్ తయారీదారు అయిన కవాసకి, భారత మార్కెట్‌లో తన అడ్వెంచర్ బైక్ ప్రియుల కోసం ఒక సంచలన నిర్ణయం తీసుకుంది. సాహసాలను ఇష్టపడే వారికి, ఆఫ్-రోడ్ రైడింగ్ ఆసక్తి ఉన్న వారికి KLX230 బైక్ ధరను భారీగా తగ్గించింది. మోటోక్రాస్ బైక్‌ల స్టైలిష్ లుక్‌తో వచ్చిన ఈ మోడల్ గత సంవత్సరం విడుదలైనప్పుడు, దాని ధరను చూసి చాలామంది వెనకడుగు వేశారు.

అప్పట్లో దీని ప్రారంభ ఎక్స్-షోరూమ్ ధర రూ.3.30 లక్షలుగా ఉండేది. అయితే, ఇప్పుడు కంపెనీ దీని ధరను ఏకంగా రూ.1.30 లక్షలు తగ్గించి, కేవలం రూ.1.99 లక్షలకే అందిస్తోంది. ఇది నిజంగా బైక్ మార్కెట్లో సంచలనం సృష్టించింది. ఈ భారీ ధర తగ్గింపుతో ఇది మార్కెట్లో ఉన్న హీరో ఎక్స్‌పల్స్, రాయల్ ఎన్‌ఫీల్డ్ హిమాలయన్, కేటీఎం అడ్వెంచర్ వంటి బైకులకు గట్టి పోటీ ఇవ్వనుంది.

బైక్ ధర ఇంత భారీగా తగ్గడానికి ప్రధాన కారణం లోకల్ ప్రొడక్షన్. గతంలో ఈ బైక్‌ను విదేశాల నుంచి దిగుమతి చేసుకునేవారు. దీని వల్ల దాని ధర చాలా ఎక్కువగా ఉండేది. కానీ ఇప్పుడు కవాసకి KLX230 బైక్‌ను భారతదేశంలోనే పూర్తిగా తయారు చేస్తున్నారు. దీనివల్ల కంపెనీకి తయారీ ఖర్చులు చాలా వరకు తగ్గాయి.

ఈ లాభాన్ని కవాసకి నేరుగా వినియోగదారులకు బదిలీ చేసింది. అందుకే ధరలో ఇంత పెద్ద మార్పు కనిపించింది. ఈ నిర్ణయం ద్వారా కవాసకి దేశీయ మార్కెట్లో తన అమ్మకాలను పెంచుకోవాలని లక్ష్యంగా పెట్టుకుంది. ధర తగ్గించడంతో పాటు, బైక్‌లో కొన్ని చిన్న మార్పులు కూడా చేశారు. కొత్త 2026 మోడల్‌లో సస్పెన్షన్ జామెట్రీలో మార్పులు చేశారు. దీనివల్ల వీల్ ట్రావెల్ కొద్దిగా తగ్గింది.

అలాగే, గతంలో ఉన్న డ్యూయల్-ఛానెల్ ఏబీఎస్ (యాంటీ-లాక్ బ్రేకింగ్ సిస్టమ్) స్థానంలో ఇప్పుడు సింగిల్-ఛానెల్ ఏబీఎస్‌ను ఉపయోగించారు. ఆఫ్-రోడ్ రైడింగ్‌కు సింగిల్-ఛానెల్ ఏబీఎస్ మరింత అనుకూలంగా ఉంటుందని కంపెనీ చెబుతోంది. ఈ మార్పులు ఉన్నప్పటికీ, బైక్ స్టైలిష్ లుక్, LED లైటింగ్‌, బ్లూటూత్ కనెక్టివిటీతో కూడిన డిజిటల్ LCD క్లస్టర్ వంటి ఫీచర్లు యథావిధిగా కొనసాగుతున్నాయి.

అదనంగా, కవాసకి ఈ బైక్‌ను రెండు కొత్త కలర్ ఆప్షన్లలో అందిస్తోంది. లైమ్ గ్రీన్, అండర్‌స్టేటెడ్ బ్యాటిల్ గ్రే. కవాసకి KLX230 డ్యూయల్-స్పోర్ట్ బైక్‌కు 233సీసీ ఎయిర్-కూల్డ్ మోటార్ శక్తిని అందిస్తుంది. ఇది 8,000 ఆర్‌పిఎమ్ వద్ద 18.1 బీహెచ్‌పి పవర్, 6,400 ఆర్‌పిఎమ్ వద్ద 18.3 ఎన్ఎమ్ టార్క్ ఉత్పత్తి చేస్తుంది.

ఈ ఇంజిన్ 6-స్పీడ్ గేర్‌బాక్స్‌తో జత చేయబడింది. బైక్ తేలికపాటి బరువు, శక్తివంతమైన ఇంజిన్ కారణంగా ఇది నగరంలో, ఆఫ్-రోడ్ రైడింగ్‌లో మంచి పర్ఫార్మెన్స్ ఇస్తుంది. అయితే, ఈ బైక్‌లో కేవలం 7.6 లీటర్ల ఫ్యూయెల్ ట్యాంక్ మాత్రమే ఉంది, కాబట్టి లాంగ్ టూరింగ్‌లకు ఇది అంతగా సరిపోకపోవచ్చు. ఇది సాధారణంగా షార్ట్ ట్రిప్స్, సిటీ రైడింగ్‌కు మరింత అనుకూలంగా ఉంటుంది.