ఇక వైబ్రేషన్స్ లేవు, మోయలేని బరువు ఉండదు..బుల్లెట్‌ను మట్టి కరిపించడానికి క్లాసిక్ బైక్ వచ్చేస్తోంది

భారతదేశంలో రెట్రో క్లాసిక్ మోటార్‌సైకిల్ మార్కెట్ అంటే గుర్తొచ్చేది రాయల్ ఎన్‌ఫీల్డ్ (Royal Enfield). దశాబ్దాలుగా బుల్లెట్ తన ఆధిపత్యాన్ని కొనసాగిస్తోంది. అయితే, ఇప్పుడు ఈ రాజసం పై దెబ్బ కొట్టేందుకు జపాన్ దిగ్గజం కవాసకి (Kawasaki) సరికొత్త అస్త్రంతో సిద్ధమైంది. కవాసకి గతంలో విడుదల చేసిన W175 మోడల్ ఆశించిన ఫలితాన్ని ఇవ్వలేకపోయింది, కానీ ఇప్పుడు రాబోతున్న W230 (Kawasaki W230) మాత్రం మార్కెట్ సమీకరణాలను మార్చేలా కనిపిస్తోంది.

జపనీస్ ఇంజనీరింగ్ అద్భుతం
సాధారణంగా రెట్రో బైక్‌లు అంటే భారీ బరువు, ఇంజిన్ వణుకు (Vibrations) వంటివి వినియోగదారులను ఇబ్బంది పెడుతుంటాయి. కానీ కవాసకి W230 ఈ విషయంలో చాలా ప్రత్యేకం. జపనీస్ టెక్నాలజీతో రూపుదిద్దుకున్న దీని 233 సీసీ, ఎయిర్-కూల్డ్, సింగిల్-సిలిండర్ ఇంజిన్ చాలా స్మూత్‌గా ఉంటుంది. ఇది 17.3 bhp పవర్, 18.6 Nm టార్క్‌ను ఉత్పత్తి చేస్తుంది. 6-స్పీడ్ గేర్‌బాక్స్‌తో వచ్చే ఈ ఇంజిన్ సిటీలో దూసుకుపోవడానికే కాకుండా, హైవేలపై హాయిగా లాంగ్ రైడ్స్ చేయడానికి కూడా అనుకూలంగా ఉంటుంది.

బరువులో పిట్ట.. పవర్‌లో పులి
రాయల్ ఎన్‌ఫీల్డ్ బుల్లెట్ 350 బరువు సుమారు 195 కిలోల వరకు ఉంటుంది, కానీ కవాసకి W230 కేవలం 133 కిలోల బరువు మాత్రమే ఉండటం దీని అతిపెద్ద ప్లస్ పాయింట్. అంటే బుల్లెట్ కంటే ఇది దాదాపు 60 కిలోల బరువు తక్కువ! దీనివల్ల ట్రాఫిక్‌లో బండిని తిప్పడం, పార్కింగ్ చేయడం చాలా ఈజీ అవుతుంది. అలాగే కేవలం 745 మి.మీ. సీటు ఎత్తు ఉండటం వల్ల తక్కువ ఎత్తు ఉన్నవారు కూడా ఈ బైక్‌ను సులభంగా నడపవచ్చు. దీని గ్రౌండ్ క్లియరెన్స్ 150 మి.మీ, 12 లీటర్ల ఫ్యూయల్ ట్యాంక్ సామర్థ్యం కలిగి ఉంది.

డిజైన్ రాజసం.. ఫీచర్ల జాతర
కవాసకి W230 డిజైన్ 1965 నాటి ఐకానిక్ 650-W1 నుండి ప్రేరణ పొందింది. గుండ్రటి ఎల్‌ఈడీ హెడ్‌ల్యాంప్, టీర్‌డ్రాప్ ఆకారంలో ఉండే ఫ్యూయల్ ట్యాంక్, వైర్-స్పోక్ వీల్స్, పొడవైన క్రోమ్ ఫినిషింగ్ ఎగ్జాస్ట్ పైప్ దీనికి వింటేజ్ లుక్ ఇస్తాయి. టెక్నాలజీ పరంగా చూస్తే.. ఇందులో డ్యూయల్ ఛానల్ ఏబీఎస్ (ABS) ఉండటం వల్ల బ్రేకింగ్ చాలా పవర్‌ఫుల్‌గా ఉంటుంది. అలాగే క్లాసిక్ లుక్ ఇచ్చే ట్విన్-పాడ్ అనలాగ్ ఇన్‌స్ట్రుమెంట్ క్లస్టర్, అందులో చిన్న డిజిటల్ డిస్‌ప్లే కూడా అందించారు.

ఎప్పుడు వస్తుంది?
కవాసకి ఇండియా ఇప్పటికే తమ సోషల్ మీడియా పేజీల్లో ఈ బైక్ టీజర్‌ను విడుదల చేసింది. దీనిని బట్టి 2026 ప్రారంభంలో ఈ బైక్ లాంచ్ అయ్యే అవకాశం ఉంది. ఒకవేళ కవాసకి ఈ బైక్‌ను భారత్‌లోనే తయారు చేసి (Localisation), రూ. 2.2 లక్షల నుంచి రూ. 2.4 లక్షల మధ్య ధర నిర్ణయిస్తే, ఇది రాయల్ ఎన్‌ఫీల్డ్ క్లాసిక్ 350, బుల్లెట్ 350, హంటర్ 350 తో పాటు టీవీఎస్ రోనిన్, జావా 350 లకు గట్టి పోటీనిస్తుంది. ఆకర్షణీయమైన లుక్, తక్కువ బరువు, నమ్మకమైన జపనీస్ ఇంజిన్ కలయికతో వచ్చే ఈ బైక్ యువతను ఆకర్షించడం ఖాయం.