ఈ బండితో రూ.60 వేలు ఆదా.. 1 కి.మీకు 10 పైసలు మాత్రమే.. పేద-మిడిల్ క్లాస్‌కు బెస్ట్

భారతదేశంలో ఎలక్ట్రిక్ వాహనాల మార్కెట్ రోజురోజుకూ విస్తరిస్తోంది. ఇంధన ధరలు పెరగడం, పర్యావరణానికి మేలు చేయాలనే అవగాహన పెరగడం, అలాగే ప్రభుత్వ ప్రోత్సాహక పథకాలతో ప్రజలు ఎక్కువగా ఎలక్ట్రిక్ వాహనాల వైపు మొగ్గు చూపుతున్నారు. ముఖ్యంగా టూవీలర్ విభాగంలో ఈ మార్పు స్పష్టంగా కనిపిస్తోంది. రోజువారీ ప్రయాణాల కోసం తక్కువ ఖర్చుతో, తక్కువ మెయింటెనెన్స్‌తో ప్రయాణం చేసే వీలున్నందున ఎలక్ట్రిక్ బైకులు, స్కూటర్లు వేగంగా ప్రాచుర్యం పొందుతున్నాయి. ఇలాంటి వేళ, కైనెటిక్ గ్రీన్ ఎనర్జీ అండ్ పవర్ సొల్యూషన్స్ లిమిటెడ్ తాజాగా మార్కెట్లోకి కొత్త ఎలక్ట్రిక్ టూవీలర్‌ను పరిచయం చేసింది. అది E-Luna Prime. పాత లూనా పేరు విన్నప్పుడే చాలామందికి చిన్నప్పటి జ్ఞాపకాలు గుర్తుకు వస్తాయి.

ఆ కాలంలో సింపుల్‌గా, అందరికీ అందుబాటులో ఉండే లూనా వాహనం ఎంతో ప్రాచుర్యం పొందింది. ఇప్పుడు అదే వారసత్వాన్ని కొనసాగిస్తూ, కొత్త తరానికి అనుగుణంగా ఎలక్ట్రిక్ రూపంలో E-Luna Primeను తీసుకొచ్చారు. ఈ కొత్త వెర్షన్ పాత లూనా లేటెస్ట్ టెక్నాలజీతో కూడిన అప్‌డేటెడ్ మోడల్‌గా రూపొందించబడింది. ఎలక్ట్రిక్ మోటార్ శక్తి, స్మార్ట్ ఫీచర్లు, ఆధునిక డిజైన్ అన్నీ కలిపి దీనిని నేటి తరం అవసరాలకు తగినట్లుగా తీర్చిదిద్దాయి.

రోజువారీ కమ్యూట్ కోసం తక్కువ ఖర్చుతో, పర్యావరణహితమైన వాహనం కావాలని కోరుకునే వారికి ఇది మంచి ప్రత్యామ్నాయం కానుంది. అదేవిధంగా, ఈ వాహనం మార్కెట్లోకి రావడం వల్ల గతంలో లూనా వాడిన పెద్ద వయసు వారు మాత్రమే కాదు, కొత్తగా ఎలక్ట్రిక్ టూవీలర్ కొనాలని చూస్తున్న యువత కూడా ఆసక్తి చూపించే అవకాశం ఉంది. దీని గురించిన ఫీచర్స్, బ్యాటరీ వివరాలను ఒకసారి చూద్దాం.

దీని ఎక్స్-షోరూమ్ ధర రూ. 82,490. ఈ స్కూటర్ రెండు వేరియంట్లలో 110 కి.మీ, 140 కి.మీ రేంజ్ కలిగిన మోడల్స్‌లో లభిస్తుంది. ఇప్పటికే విజయవంతమైన e-Luna ప్లాట్‌ఫామ్ పై ఈ కొత్త వెర్షన్ రూపొందించబడింది, ముఖ్యంగా నగర ప్రయాణాల కోసం అనుకూలంగా డిజైన్ చేయబడింది. E-Luna Prime డిజైన్ ఆకర్షణీయంగా, ఆధునిక ఫీచర్లతో కూడి ఉంది.

16-అంగుళాల అల్లాయ్ వీల్స్, ప్రకాశవంతమైన LED హెడ్‌ల్యాంప్, డిజిటల్ కలర్ ఇన్‌స్ట్రుమెంట్ క్లస్టర్ స్కూటర్‌కు స్టైలిష్ లుక్ అందిస్తాయి. సింగిల్ సీటు స్పోర్టీ డిజైన్తో పాటు, పెద్ద ముందు లోడింగ్ ప్రాంతాన్ని కూడా కంపెనీ అందించింది, దీని ద్వారా వస్తువులు సులభంగా తీయవచ్చు. ఇ-లూనా ప్రైమ్ వ్యక్తిగత రైడ్స్ కోసం మాత్రమే కాక, చిన్న వ్యాపారాలు, సరుకు రవాణా కోసం కూడా ఉపయోగకరంగా ఉంటుంది.

ఇది ఆరు కలర్స్‌లలో లభిస్తుంది, కాబట్టి వినియోగదారులు తమ అభిరుచికి తగిన రంగును ఎంచుకోవచ్చు. E-Luna Prime కేవలం ఆకర్షణీయమైన డిజైన్ మరియు ఆధునిక ఫీచర్లతోనే కాదు, ఆర్థికంగా కూడా వినియోగదారులకు చాలా ప్రయోజనకరం. ఈ బైక్‌లో కిలోమీటరుకు ఖర్చు కేవలం 10 పైసలు, అంటే పెట్రోల్ బైక్‌లతో పోలిస్తే చాలా తక్కువ.

ఈ బైక్‌ను సొంతం చేసుకోవడానికి అవసరమైన మొత్తం ఖర్చు, EMI, రన్నింగ్ ఖర్చు కలిపి, నెలకు సుమారు రూ.2,500 మాత్రమే. సాధారణ పెట్రోల్ బైక్‌తో పోలిస్తే, వినియోగదారులు నెలకు దాదాపు రూ.5,000 వరకు ఆదా చేసుకోవచ్చు. దీన్ని వార్షికంగా చూస్తే, ఒక వినియోగదారు సుమారు రూ.60,000 వరకు ఆదా చేయగలరు. కాబట్టి, E-Luna Prime కేవలం ఎలక్ట్రిక్ స్కూటర్ మాత్రమే కాదు, డబ్బులను ఆదా చేసే మోడల్.