ఎంత తిప్పినా అలసిపోని కొత్త KTM అడ్వెంచర్ X వచ్చేసింది.. ఈ సారి రైడ్ మామూలుగా ఉండదంటే నమ్మండి!

అడ్వెంచర్ టూరింగ్ మోటార్‌సైకిళ్ల ప్రపంచంలో, రాయల్ ఎన్ఫీల్డ్ హిమాలయన్ ఇప్పటికీ ఓ ప్రత్యేకమైన స్థానం దక్కించుకుంటూ ఉంది. అయితే, దాని ఎదుట గట్టి పోటీదారిగా నిలిచిన బైక్ KTM 390 అడ్వెంచర్. ఈ బైక్, ఆస్ట్రియన్ బ్రాండ్‌కు ఎప్పటినుంచో గుర్తింపునిచ్చినప్పటికీ, ఇటీవల కొన్ని సంవత్సరాలలో కాస్త వెనకబడింది. ఈ నేపథ్యంలో KTM తన బైకును కొత్తగా పలు మార్పులతో మార్కెట్లోకి విడుదల చేసింది. KTM తాజాగా విడుదల చేసిన 2025 మోడల్ 390 అడ్వెంచర్ X (390 adventure x) బైక్‌తో, మళ్లీ ఒకసారి ఆటలోకి అడుగుపెట్టింది. ఇది కొత్త చిన్న చిన్న అప్‌డేట్‌లతో, బైక్‌కి కొత్త ఉత్సాహాన్ని తీసుకొచ్చింది. దాని ధరను చూస్తే ఢిల్లీలో ఎక్స్-షోరూమ్ రూ. 3.03 లక్షలు. పాత వేరియంట్‌తో పోలిస్తే ఇది సుమారు రూ.12,000 ఎక్కువే అయినా, అందుతున్న ఫీచర్లు చూస్తే ధర పెరిగింది.

KTM 390 అడ్వెంచర్ X కొత్త లుక్‌, హైలైట్ ఫీచర్లు, శక్తివంతమైన హార్ట్‌తో తిరిగి ఫోకస్‌లోకి వచ్చింది. దీని రూపంలో KTM బ్రాండ్ తన పూర్వ వైభవాన్ని మళ్ళీ సాధించేందుకు ప్రయత్నిస్తోంది. వినియోగదారులకు మరింత టెక్నాలజీ, ప్రాక్టికాలిటీ, రైడింగ్ కంఫర్ట్‌ను అందించడమే కాకుండా, ఆఫ్-రోడ్, ఆన్-రోడ్ పరంగా సేఫ్ బెట్స్‌ను తీసుకుంటోంది. బైక్ సీటులో కూర్చునే ప్రతి సారి, ఒక అడ్వెంచర్ ప్రారంభమవుతున్న ఫీల్ వచ్చేలా దీన్ని డిజైన్ చేశారు.

2025 KTM 390 అడ్వెంచర్ X ఒక చిన్న అప్‌డేట్ మాత్రమేనని మొదట అనిపించవచ్చు. కానీ దీన్ని రోడ్డుపై కొద్ది కిలోమీటర్లకు తీసుకెళ్లిన వెంటనే, నిజమైన మార్పు కనిపిస్తుంది. ముఖ్యంగా, ఈసారి అందించిన రైడర్ ఎసిస్టెన్స్ ఫీచర్లు ఈ బైక్‌కు వేరే లెవల్ అనిపించేలా చేస్తాయి. ముఖ్యమైన అప్‌డేట్స్‌లో కార్నరింగ్ ABS ఒకటి. ఇది బైక్ తిరుగుతున్నప్పుడు బ్రేకింగ్ చేయాల్సిన అవసరం వచ్చినా, తడబాటుగా కాకుండా సురక్షితంగా నిలిపేలా చేస్తుంది.

అదే విధంగా కార్నరింగ్ ట్రాక్షన్ కంట్రోల్ కూడా తడిగా ఉన్న రోడ్లపై లేదా గ్రిప్ తక్కువగా ఉన్న దారుల్లో బైక్ స్కిడ్ కాకుండా రైడర్‌కు గట్టి నమ్మకాన్ని ఇస్తుంది. అదే కాకుండా, ఈసారి అందించిన క్రూయిజ్ కంట్రోల్ సిస్టమ్ దీన్ని ఒక న్యూ-ఏజ్ అడ్వెంచర్ టూరర్‌గా మార్పు చెందించే ప్రధాన అంశం. నాన్-స్టాప్ ప్రయాణాల్లో చేతులు అలసిపోకుండా, స్థిరమైన వేగంతో ప్రయాణించాలనుకునే వారికి ఇది ఎంతో ఉపయోగపడుతుంది.

ఇక మూడు రైడ్ మోడ్‌లు.. స్ట్రీట్, రెయిన్, ఆఫ్-రోడ్.. బైక్ రకరకాల వాతావరణాలకూ, రోడ్ల పరిస్థితులకూ తగిన విధంగా ప్రతిస్పందించేలా చేసి, రైడర్‌కు మరింత నియంత్రణను అందిస్తాయి. ఇది పాత KTM 390 అడ్వెంచర్ Xలో చాలా మందికి కష్టంగా అనిపించిన సమస్యే. అప్పట్లో మిస్ అయిన రైడ్ మోడ్‌లు ఇప్పుడు వచ్చాయి, వాటితో పాటు రైడింగ్ అనుభవం పూర్తిగా మెరుగైందనే చెప్పాలి.

పాత మోడల్‌కి సంబంధించి ఒక ప్రధానమైన ఫీడ్‌బ్యాక్ ఏమిటంటే, స్టాండర్డ్ థ్రోటిల్ మ్యాప్ సాధారణంగా అనిపించేది. అప్పుడు KTM తన రేసింగ్ పనితనాన్ని చూపించలేకపోయింది. కానీ ఇప్పుడు కొత్త మోడల్‌లో రైడ్ మోడ్‌లు ఉండటం వల్ల థ్రోటిల్ రెస్పాన్స్, పవర్ డెలివరీ మరింత స్పష్టంగా, అవసరానికి అనుగుణంగా మారాయి. స్ట్రీట్ మోడ్‌లో డైనమిక్‌కి దగ్గరగా, రెయిన్ మోడ్‌లో శాంతంగా, ఆఫ్-రోడ్ మోడ్‌లో దూకుడుగా... ఈ మూడు బైక్‌కి కొత్తగా అనిపిస్తాయి.

ఇవి తప్ప ఇతర మార్పులు చేయలేదు. KTM 390 అడ్వెంచర్ Xలో తాజా 390 డ్యూక్‌లో కనిపించే అదే 399 సిసి సింగిల్-సిలిండర్ ఇంజిన్ అమర్చారు. ఇది 46 బీహెచ్‌పీ శక్తిని, 39 ఎన్ఎమ్ గరిష్ట టార్క్‌ను ఉత్పత్తి చేయగలదని KTM చెబుతోంది. ఇది 6-స్పీడ్ గేర్‌బాక్స్, ద్వి దిశాత్మక క్విక్-షిఫ్టర్‌తో అందుబాటులో ఉంటుంది.