బైక్ రైడింగ్‌లో జారిపడతారనే టెన్షన్ అస్సలే లేదు.. తక్కువ ధరలో ABS బైక్స్ ఇవే

రోడ్లపై బైక్ నడుపుతున్నప్పుడు అకస్మాత్తుగా బ్రేక్ వేయాల్సి వస్తే, బైక్ అదుపు తప్పి జారిపడే ప్రమాదం ఉంటుంది. ఇలాంటి ప్రమాదాలను నివారించడానికి ఏబీఎస్ అనే సేఫ్టీ ఫీచర్ బైక్‌లలో చాలా ముఖ్యం. ముఖ్యంగా, భారతదేశంలోని రోడ్లు కొన్నిసార్లు సరిగా లేకపోవడం వల్ల ఈ ఫీచర్ మరింత ఉపయోగపడుతుంది. మీరు తక్కువ బడ్జెట్‌లో ఏబీఎస్ ఉన్న బైక్ కొనాలని చూస్తున్నారా? అయితే, భారతదేశంలో సింగిల్-ఛానెల్ ఏబీఎస్‎తో వచ్చే ఐదు చౌకైన బైక్‌ల గురించి తెలుసుకుందాం.

ఏబీఎస్ అంటే యాంటీ-లాక్ బ్రేకింగ్ సిస్టమ్. ఇది బైక్‌లలో ఉండే ఒక అడ్వాన్స్డ్ సేఫ్టీ ఫీచర్. మీరు బ్రేక్ వేసినప్పుడు, చక్రాలు లాక్ అవ్వకుండా, అంటే పూర్తిగా జామ్ అవ్వకుండా ఈ సిస్టమ్ చూసుకుంటుంది. దీనివల్ల టైర్లు జారిపోకుండా ఉంటాయి. ముఖ్యంగా తడి రోడ్లపై లేదా ఇసుక, కంకర ఉన్న రోడ్లపై అకస్మాత్తుగా బ్రేక్ వేయాల్సి వచ్చినప్పుడు ఏబీఎస్ చాలా ఉపయోగపడుతుంది.

ఇది బ్రేకింగ్ లెన్త్ తగ్గించడంతో పాటు, బైక్ మీ కంట్రోల్లో ఉండేలా సాయపడుతుంది. తద్వారా ప్రమాదాల ముప్పు గణనీయంగా తగ్గుతుంది. సింగిల్-ఛానెల్ ఏబీఎస్ అంటే బైక్ ముందు చక్రానికి మాత్రమే ఏబీఎస్ పనిచేస్తుంది. వెనుక చక్రానికి ఉండదు. ఇది పూర్తి డ్యూయల్-ఛానెల్ ఏబీఎస్ అంత ప్రభావవంతంగా కాకపోయినా, సాధారణ రైడింగ్‌లో సేఫ్టీని బాగా పెంచుతుంది.

హీరో ఎక్స్‌ట్రీమ్ 125ఆర్ : హీరో నుండి వచ్చిన ఈ చిన్న ఎక్స్‌ట్రీమ్ బైక్ ధర ఇప్పుడు రూ.లక్ష కంటే కొంచెం ఎక్కువ. ఇంతకు ముందు దీని ధర రూ.99,500 ఉండేది, కానీ ఇటీవల రూ.1,600 పెరిగింది. అయినా కూడా ఇది బజాజ్ పల్సర్ ఎన్‌ఎస్125 కంటే రూ.5,000 తక్కువ. ప్రస్తుతం, భారతదేశంలో అత్యంత చౌకైన ఏబీఎస్ బైక్ ఇదే. ఇది 125సీసీ ఇంజన్‌తో వస్తుంది, మంచి మైలేజ్, స్టైలిష్ లుక్‌తో యువతను ఆకర్షిస్తుంది. నగరంలో రోజూ వాడేందుకు ఇది చాలా అనుకూలంగా ఉంటుంది.

బజాజ్ పల్సర్ ఎన్‌ఎస్125 : బజాజ్ ఇటీవల ఈ మోడల్‌ను ఏబీఎస్ తో అప్‌డేట్ చేసింది. దీని బేస్ వేరియంట్ రూ.లక్ష నుండి ప్రారంభమవుతుంది, కానీ రూ.7,000 ఎక్కువ చెల్లిస్తే మీకు టాప్ వేరియంట్ 'LED BT ABS' లభిస్తుంది. ఇందులో ఏబీఎస్, ఆల్-ఎల్‌ఈడీ హెడ్‌లైట్, డిజిటల్ కన్సోల్, బ్లూటూత్ కనెక్టివిటీ వంటి ఫీచర్లు ఉంటాయి. ఏబీఎస్ తో వచ్చిన మొదటి 125సీసీ పల్సర్ ఇదే, ఇది స్పోర్టీ లుక్, పల్సర్ బ్రాండ్ పై నమ్మకం ఉన్నవారికి మంచి ఆప్షన్.

హీరో ఎక్స్‌ట్రీమ్ 160ఆర్ 2వీ : ఈ బైక్ తేలికైనది, తక్కువ పెట్రోల్ తాగుతుంది . తక్కువ ధరలో లభిస్తుంది. రూ.1.12 లక్షల ధరతో ఇది కూడా ఈ లిస్ట్‌లో చేరింది. భారతదేశంలో 150-160సీసీ స్పోర్టీ కమ్యూటర్ సెగ్మెంట్‌లో హీరో నుండి వచ్చిన సరికొత్త బైక్ ఇదే. ఇది ఇప్పుడు నిలిపివేయబడిన ఎక్స్‌ట్రీమ్ స్పోర్ట్స్ స్థానంలో వచ్చింది. దీని పర్ఫార్మెన్స్ బాగుంటుంది. సిటీ రైడింగ్‌కు చాలా సౌకర్యవంతంగా ఉంటుంది. మంచి లుక్, ఏబీఎస్ సేఫ్టీ దీని ఎక్స్ ట్రా బెనిఫిట్స్.

బజాజ్ పల్సర్ 150 : ఈ క్లాసిక్ పల్సర్ మోడల్ 20 సంవత్సరాలకు పైగా మార్కెట్‌లో ఉంది. కొత్త పల్సర్ ఎన్‌ఎస్, ఎన్ సిరీస్ ఉన్నప్పటికీ దీని గుర్తింపు, ప్రజాదరణ అలాగే ఉన్నాయి. బజాజ్ పల్సర్ 150 భారతదేశంలో అత్యధికంగా అమ్ముడవుతున్న 150సీసీ కమ్యూటర్ బైక్‌లలో ఒకటి. పాత మోడల్ అయినప్పటికీ, ఈ బైక్ మంచి మస్కులర్ స్టైల్, మంచి మైలేజ, బడ్జెట్ ఫ్రెండ్లీ. దీని నమ్మకమైన పనితీరు, మెయింటెనెన్స్ ఖర్చులు తక్కువ ఉండటం దీనికి ప్లస్ పాయింట్స్.

బజాజ్ పల్సర్ ఎన్150 : బజాజ్ నుండి ఇటీవల లాంచ్ అయిన ఈ బైక్‌లో డ్యూయల్-ఛానెల్ ఏబీఎస్ బేస్ వేరియంట్ నుంచే లభిస్తుంది. దీని ధర రూ.1.14 లక్షల నుండి ప్రారంభమవుతుంది. ఇందులో ఎల్‌ఈడీ ప్రొజెక్టర్ హెడ్‌లైట్, డిజిటల్ డిస్‌ప్లే, బ్లూటూత్ కనెక్టివిటీ వంటి ఫీచర్లు ఉన్నాయి. ఇది తక్కువ ధరలో ఆధునిక లుక్, మెరుగైన సేఫ్టీ ఫీచర్లు ఉన్న బైక్. యువతకు,టెక్నాలజీ ఇష్టపడే వారికి ఇది మంచి ఆప్షన్.

డ్రైవ్‌స్పార్క్ అభిప్రాయం: రోడ్ సేఫ్టీ చాలా ముఖ్యమైన విషయం. ఏబీఎస్ వంటి సేఫ్టీ ఫీచర్లు బైక్ ప్రమాదాలను గణనీయంగా తగ్గిస్తాయి. తక్కువ ధరలో ఈ ఫీచర్లు అందుబాటులో ఉండటం వల్ల ఎక్కువ మంది రైడర్లు సురక్షితమైన బైక్‌లను ఎంచుకునే అవకాశం ఉంటుంది. ఈ బైక్‌లు బడ్జెట్‌లో మంచి పర్ఫార్మెన్స్ సేఫ్టీని అందిస్తాయి. మీ బడ్జెట్, అవసరాలకు తగిన బైక్‌ను ఎంచుకోవడానికి ఈ లిస్ట్ మీకు ఉపయోగపడుతుంది