పెట్రోల్ అయిపోయి దారి మధ్యలో బైక్ ఆగిపోయిందా.. ఈ 3 చిట్కాలతో వెంటనే స్టార్ట్ చేసేయండి

బైక్ నడిపే చాలా మందికి మధ్యలో పెట్రోల్ అయిపోయి, బైక్‌ను తోసుకుంటూ వెళ్లిన అనుభవం ఉండే ఉంటుంది. అప్పుడు అయ్యో, కాస్త ముందుగానే పెట్రోల్ కొట్టించుకుంటే బాగుండు అనిపిస్తుంది కదా. అలాంటి పరిస్థితి మీకు రాకూడదంటే, ఎప్పుడూ మీ బైక్ ఫ్యూయల్ లెవల్‌ను గమనిస్తూ ఉండాలి. కానీ, ఒకవేళ అనుకోకుండా మీరు మధ్య దారిలో ఉన్నప్పుడు పెట్రోల్ అయిపోతే, కంగారు పడాల్సిన అవసరం లేదు.

అలాంటి పరిస్థితుల్లో మీకు సాయపడే విధంగా 3 సులువైన, ప్రాక్టికల్ చిట్కాలను తెలుసుకుందాం. వీటిని ఉపయోగించి మీ బైక్‌ను తోయాల్సిన అవసరం లేకుండానే దగ్గర్లోని పెట్రోల్ బంకుకు చేరుకోవచ్చు.

1. చోక్‎ను తెలివిగా వాడండి
మీ బైక్ స్టార్ట్ అవ్వడం లేదని, పెట్రోల్ అయిపోయిందని అనుమానం వస్తే, మొదటగా చోక్‌ను ఆన్ చేయండి. కొన్ని బైక్‌లలో చోక్‌ను ఆన్ చేస్తే, ఫ్యూయల్ ట్యాంక్ అడుగున మిగిలి ఉన్న కొద్దిపాటి పెట్రోల్ ఇంజిన్‌కు చేరుతుంది. దీనివల్ల బైక్ కొద్దిసేపు స్టార్ట్ అయ్యే అవకాశం ఉంటుంది.

బైక్ స్టార్ట్ అవ్వగానే, ఒక్క క్షణం కూడా ఆలస్యం చేయకుండా వెంటనే దగ్గర్లోని పెట్రోల్ బంకుకు వెళ్లండి. అయితే, ఈ పద్ధతి అన్ని బైక్‌లకూ వర్తించదు. ఎందుకంటే అన్ని బైక్‌లలో చోక్ సిస్టమ్ ఉండదు. అందుకే, మీ బైక్‌లో చోక్ ఉందో లేదో ముందుగా చూసుకోండి.

2. ఫ్యూయల్ ట్యాంక్‌లో ప్రెజర్ పెంచండి
ఒకవేళ చోక్ పద్ధతి పనిచేయకపోతే ఫ్యూయల్ ట్యాంక్‌లో గాలి నింపి ఒత్తిడిని పెంచడానికి ప్రయత్నించండి. దీనికోసం, బైక్ పెట్రోల్ ట్యాంక్ మూతను కొద్దిగా తీసి, అందులోకి నెమ్మదిగా ఊదండి.

అయితే ఊదేటప్పుడు ఎటువంటి ధూళి, మట్టి లోపలికి వెళ్లకుండా జాగ్రత్తపడండి. ఇలా చేయడం వల్ల ట్యాంక్‌లో కొద్దిగా ఒత్తిడి ఏర్పడి, మిగిలి ఉన్న పెట్రోల్ ఇంజిన్‌కు చేరే అవకాశం ఉంటుంది. కొన్నిసార్లు ఈ పద్ధతి చాలా బాగా పనిచేస్తుంది. బైక్ స్టార్ట్ అవుతుంది.

3. బైక్‌ను ఒకవైపుకు వంచండి
పెట్రోల్ చాలా తక్కువగా ఉన్నప్పుడు, అది ట్యాంక్ ఒక వైపుకు చేరుకొని ఇంజిన్‌కు అందకుండా పోతుంది. ఇలాంటి సమయంలో బైక్‌ను దాని సైడ్ స్టాండ్‌పై నిలబెట్టండి. ఆ తర్వాత, బైక్‌ను అదే దిశలో (అంటే సైడ్ స్టాండ్ ఉన్నవైపు) కొద్దిసేపు వంచి పట్టుకోండి.

ఇలా చేయడం వల్ల ట్యాంక్‌లో మిగిలి ఉన్న పెట్రోల్ ఇంజిన్‌కు చేరడానికి అవకాశం ఉంటుంది. దీంతో బైక్ మళ్ళీ స్టార్ట్ అవ్వచ్చు. ఇది చాలామంది ప్రయత్నించి విజయం సాధించిన చిట్కా.

ఈ చిట్కాలు కేవలం అత్యవసర పరిస్థితుల్లో ఒకసారి మిమ్మల్ని గట్టెక్కించగలవు తప్ప, ప్రతిసారీ పనిచేయకపోవచ్చు. అందుకే, బైక్‌లో పెట్రోల్ స్థాయిని ఎప్పుడూ గమనిస్తూ ఉండాలి. ప్రయాణం ప్రారంభించే ముందు మీ బైక్‌లో తగినంత పెట్రోల్ ఉందో లేదో తప్పకుండా తనిఖీ చేసుకోండి.

అంతేకాకుండా, మీ మొబైల్‌లో దగ్గర్లోని పెట్రోల్ బంకుల లొకేషన్లను సేవ్ చేసుకుంటే, ఇలాంటి పరిస్థితుల్లో అవి మీకు వెంటనే సహాయపడతాయి. సురక్షితమైన ప్రయాణం కోసం ముందు జాగ్రత్తగా ఉండటం చాలా ముఖ్యం.

డ్రైవ్‌స్పార్క్‌ తెలుగు వెబ్‌సైట్ ఆటోమొబైల్‌కి సంబంధించిన తాజా వార్తలను అందిస్తుంది. వివిధ సోషల్ మీడియాల ద్వారా సరికొత్త వార్తలను ఎప్పటికప్పుడు యూజర్లకు చేరవేస్తుంది. తాజా కార్ల వార్తలు, బైక్ వార్తలు, టెస్ట్ డ్రైవ్ రివ్యూల వీడియోల కోసం మా Facebook, Instagram, YouTube పేజీలతో కనెక్ట్ అవ్వండి. మీకు ఏదైనా వార్త నచ్చితే లైక్ చేయండి. కామెంట్ చేయడం మర్చిపోవద్దు. అలానే మీతోటి స్నేహితులతో ఈ వార్తను పంచుకోగలరు. ధన్యవాదాలు.