పండక్కి బుల్లెట్ బైక్ కొంటున్నారా? షోరూంకి వెళ్లక్కర్లేదు.. ఫ్లిప్‌కార్ట్‌లో బుక్ చేస్తే రూ. 50,000 తగ్గుతుంది

ఆన్‌లైన్ షాపింగ్ అనగానే గుర్తొచ్చే పేరు ఫ్లిప్‌కార్ట్. కానీ, ఇకపై ఈ ప్లాట్‌ఫారమ్ కేవలం నిత్యావసర వస్తువులకు మాత్రమే పరిమితం కాదు. రాయల్ ఎన్‌ఫీల్డ్, ఫ్లిప్‌కార్ట్ మధ్య కుదిరిన చారిత్రాత్మక భాగస్వామ్యం బైక్‌ల అమ్మకాలలో సరికొత్త అధ్యాయాన్ని మొదలుపెడుతోంది. ఇప్పుడు మీరు ఏ షోరూంకి వెళ్లకుండానే మీకు నచ్చిన రాయల్ ఎన్‌ఫీల్డ్ బైక్‌ను ఆన్‌లైన్‌లో ఆర్డర్ చేయవచ్చు.

సెప్టెంబర్ 22, 2025 నుంచి ఈ సేవలు అందుబాటులోకి వస్తాయి. ఈ వినూత్నమైన భాగస్వామ్యంతో రాయల్ ఎన్‌ఫీల్డ్ వినియోగదారులకు కొనుగోలు ప్రక్రియను మరింత సులభతరం చేయనుంది. ఈ కొత్త భాగస్వామ్యంలో రాయల్ ఎన్‌ఫీల్డ్ తమ మొత్తం 350 సీసీ బైక్ పోర్ట్‌ఫోలియోను ఫ్లిప్‌కార్ట్‌లో అందుబాటులోకి తెస్తోంది. ఇందులో బుల్లెట్ 350, క్లాసిక్ 350, హంటర్ 350, గోవాన్ క్లాసిక్ 350, కొత్తగా అప్‌డేట్ అయిన మెటియోర్ 350 వంటి మోడల్స్ ఉన్నాయి.

ప్రారంభంలో ఈ సేవలు బెంగళూరు, గురుగ్రామ్, కోల్‌కతా, లక్నో, ముంబై వంటి ఐదు నగరాల్లో లభిస్తాయి, భవిష్యత్తులో మరిన్ని నగరాలకు విస్తరించనున్నాయి. రాయల్ ఎన్‌ఫీల్డ్ ఎగ్జిక్యూటివ్‌లు ఈ భాగస్వామ్యం గురించి మాట్లాడుతూ.. "ఇది డిజిటల్-ఫస్ట్ కస్టమర్లను దృష్టిలో ఉంచుకుని తీసుకున్న నిర్ణయం. దీని ద్వారా బైక్ కొనుగోలు చేసే ప్రక్రియ సులభతరం అవుతుంది" అని చెప్పారు.

ఫ్లిప్‌కార్ట్‌లో బుక్ చేసిన తర్వాత, బైక్ డెలివరీ, ఆఫ్టర్ సేల్స్ సపోర్ట్ వంటి సేవలను ఆయా నగరాల్లోని అధీకృత రాయల్ ఎన్‌ఫీల్డ్ డీలర్లే అందిస్తారు. దీనివల్ల కస్టమర్లకు ఆన్‌లైన్ సౌకర్యం, డీలర్ల వ్యక్తిగత సేవ రెండూ లభిస్తాయి. అంతేకాకుండా, ఈ కొత్త పద్ధతి ద్వారా బైక్ కొనుగోలు చేసేటప్పుడు అన్ని జీఎస్‌టీ రాయితీలు కూడా వర్తిస్తాయి.

ఈ పండగ సీజన్‌కు ముందు రాయల్ ఎన్‌ఫీల్డ్ తమ మెటియోర్ 350 మోడల్‌కు కొత్త 2025 మోడల్ సంవత్సరపు అప్‌డేట్‌లను విడుదల చేసింది. ఈ బైక్‌లో ఇప్పుడు అనేక కొత్త ఫీచర్లు, రంగులు ఉన్నాయి. ఇవి దీనిని మరింత ఆకర్షణీయంగా మార్చాయి.

కొత్త మెటియోర్ 350 నాలుగు వేరియంట్లలో లభిస్తుంది. ఫైర్‌బాల్, స్టెల్లార్, అరోరా, సూపర్నోవా. ఈ వేరియంట్ల ఎక్స్-షోరూమ్ ధరలు రూ.1,95,762 నుండి రూ.2,15,883 వరకు ఉన్నాయి. ఇందులో అనేక ఫీచర్లు ఉన్నాయి. ఫైర్‌బాల్, స్టెల్లార్ వేరియంట్లలో ఇప్పుడు ఎల్‌ఈడీ హెడ్‌ల్యాంప్స్ స్టాండర్డ్‌గా వస్తాయి, ఇది రాత్రిపూట ప్రయాణానికి మంచి వెలుతురును అందిస్తుంది.

ఈ వేరియంట్లలో ట్రిప్పర్ నావిగేషన్ పాడ్ కూడా లభిస్తుంది, ఇది మొబైల్ కనెక్టివిటీ ద్వారా రూట్ మ్యాప్‌లను చూపిస్తుంది. అరోరా, సూపర్నోవా వేరియంట్లకు అడ్జస్టబుల్ బ్రేక్, క్లచ్ లివర్లను అందించారు. ఇవి రైడర్‌కు మరింత సౌకర్యాన్ని ఇస్తాయి. అన్ని వేరియంట్లలో యూఎస్‌బీ టైప్-సి ఫాస్ట్ ఛార్జింగ్ పోర్ట్ ఉంది. ఇది మొబైల్ ఫోన్‌లను ఛార్జ్ చేయడానికి ఉపయోగపడుతుంది. ఈ బైక్‌లో ఇప్పుడు అసిస్ట్-అండ్-స్లిప్ క్లచ్ కూడా ఉంది, దీనివల్ల గేర్ మార్చడం చాలా సులభం అవుతుంది.

ఈ కొత్త ఫీచర్లు,డిజైన్ మార్పులతో మెటియోర్ 350 మరింత ఆధునికంగా, ప్రాక్టికల్‌గా మారింది. రాయల్ ఎన్‌ఫీల్డ్, ఫ్లిప్‌కార్ట్ భాగస్వామ్యం వల్ల ఈ బైక్ అమ్మకాలు గణనీయంగా పెరుగుతాయని అంచనా వేస్తున్నారు. వినియోగదారులకు ఇంటి వద్ద నుంచే బైక్ కొనుగోలు చేసే సౌలభ్యం లభిస్తుంది కాబట్టి, ఇది దేశంలోని ఈ-కామర్స్ మార్కెట్‌లో ఒక కీలక మార్పు తీసుకువస్తుందని చెప్పవచ్చు.