ఈ డుగ్గు..డుగ్గు బైకు మీద పోతుంటే అందరి చూపు మీమీదే.. రూ.లక్షలో లగ్జరీ, మైలేజ్ కూడా 50కిమీ

ప్రముఖ మోటార్‌సైకిల్ సంస్థ రాయల్ ఎన్‌ఫీల్డ్ (Royal Enfield).. కొత్త బైక్‌లు, రికార్డు అమ్మకాలతో మార్కెట్లో దూసుకుపోతోంది. ఈ కంపెనీ కేవలం రూ.లక్ష రేంజ్‌లోనే ఒక సరికొత్త బైక్‌ను లాంచ్ చేయబోతున్నట్లు వస్తున్న వార్తలు బైక్ ప్రియులకు మరింత ఉత్సాహాన్ని ఇస్తున్నాయి. అంతేకాదు ఈ బైక్ ఏకంగా లీటరుకు 50 కిలోమీటర్ల మైలేజీ ఇస్తుందనే అంచనాలు ఉన్నాయి. ఈ మధ్యలోనే రాయల్ ఎన్‌ఫీల్డ్ అక్టోబర్ 2025 అమ్మకాల నివేదిక కూడా విడుదలైంది. దీని ప్రకారం కంపెనీ బంపర్ హిట్ సాధించింది. ఇంతకీ ఆ రేంజ్ బైక్ వివరాలు ఏంటి? కంపెనీ అమ్మకాలు ఎలా ఉన్నాయో వివరంగా తెలుసుకుందాం.

ప్రస్తుత 2025 సంవత్సరం అక్టోబర్ నెలకు సంబంధించిన అమ్మకాల నివేదికను రాయల్ ఎన్‌ఫీల్డ్ సంస్థ ఇటీవల విడుదల చేసింది. ఈ గణాంకాలు కంపెనీ మార్కెట్‌లో ఎంత బలంగా ఉందో చూపిస్తున్నాయి. రాయల్ ఎన్‌ఫీల్డ్ అక్టోబర్ 2025లో మొత్తం 1,24,951 బైక్‌లను విక్రయించింది. ఇది గత 2024 అక్టోబర్ నెలతో పోలిస్తే 13 శాతం వృద్ధి.

ఈ అమ్మకాల్లో దేశీయ మార్కెట్‌లో 1,16,844 బైక్‌లు అమ్ముడవ్వగా, మిగిలిన 8,107 బైక్‌లు భారతదేశం నుంచి విదేశాలకు ఎగుమతి అయ్యాయి. సెప్టెంబర్, అక్టోబర్ నెలలతో కూడిన పండుగ సీజన్‌లో కంపెనీ మొత్తం 2,49,279 బైక్‌లను విక్రయించింది. ఇది గత ఏడాది ఇదే కాలంతో పోలిస్తే 26 శాతం వృద్ధిని సూచిస్తోంది.

అమ్మకాలలో దూసుకుపోతున్న రాయల్ ఎన్‌ఫీల్డ్, భవిష్యత్తులో మరింత ఎక్కువ మంది కస్టమర్లను ఆకర్షించడానికి కొత్త విభాగంలోకి అడుగు పెట్టాలని చూస్తోంది. రాయల్ ఎన్‌ఫీల్డ్ త్వరలో 250సీసీ సెగ్మెంట్‌లో ఒక కొత్త బైక్‌ను లాంచ్ చేయబోతున్నట్లు సమాచారం. ఈ సెగ్మెంట్‌లో కంపెనీకి పెద్దగా మోడల్స్ లేవు.

ముఖ్యంగా ఈ బైక్ హైబ్రిడ్ టెక్నాలజీతో రాబోతుందని తెలుస్తోంది. హైబ్రిడ్ టెక్నాలజీ ఉండడం వల్ల ఈ బైక్ లీటరుకు 50 కిలోమీటర్ల వరకు అద్భుతమైన మైలేజీని ఇవ్వగలదని మార్కెట్ నిపుణులు అంచనా వేస్తున్నారు. ఈ కొత్త 250సీసీ హైబ్రిడ్ బైక్ అతి తక్కువ ధరలో వస్తుందని సమాచారం. ఇది నిజమైతే రాయల్ ఎన్‌ఫీల్డ్ బైక్‌లలో ఇదే అత్యంత చౌకైన మోడల్ అవుతుంది.

ఈ బైక్ ప్రారంభ వేరియంట్ ధర కేవలం రూ. లక్ష నుంచి రూ. 1.20 లక్షల రేంజ్‌లో మాత్రమే ఉండవచ్చని అంచనా. ఈ ధర సాధారణ 350సీసీ బుల్లెట్ బైక్ కంటే చాలా తక్కువగా ఉంటుంది. రాయల్ ఎన్‌ఫీల్డ్ భవిష్యత్తులో 350సీసీ నుంచి 750సీసీ మధ్య అనేక కొత్త బైక్‌లతో పాటు, ఎలక్ట్రిక్ బైక్‌లను (Electric Bikes) కూడా మార్కెట్‌లోకి తీసుకురావడానికి సన్నాహాలు చేస్తోంది. ఈ వ్యూహాల వల్ల రాబోయే కాలంలో కంపెనీ అమ్మకాలు మరింత పెరిగే అవకాశం ఉంది.

రాయల్ ఎన్‌ఫీల్డ్ బైక్‌లకు కస్టమర్ల నుంచి రోజురోజుకు ఆదరణ పెరుగుతోందని తాజా విక్రయాల నివేదిక స్పష్టం చేస్తుంది. కొత్త బైక్‌లు రాబోతున్నందున, భవిష్యత్తులో రాయల్ ఎన్‌ఫీల్డ్ మొత్తం అమ్మకాల సంఖ్య మరింత పెరగవచ్చని భావిస్తున్నారు. ఈ కొత్త 250 సీసీ హైబ్రిడ్ బైక్ గనుక రూ.లక్ష రేంజ్‌లో విడుదల అయితే, ఇది మార్కెట్‌లో పెద్ద సంచలనం సృష్టించడం ఖాయం.