బజాజ్, ఏథర్‌లకు చుక్కలు చూపించిన టీవీఎస్..ఎగిరెగిరి పడ్డ ఓలా పాతాళంలోకి

భారతదేశంలో ఎలక్ట్రిక్ వాహనాల, ముఖ్యంగా ఎలక్ట్రిక్ టూ వీలర్ల అమ్మకాలు రోజురోజుకు పెరుగుతున్నాయి. ఈ ట్రెండ్‌లకు అనుగుణంగా, వాహన తయారీదారుల మధ్య పోటీ కూడా తీవ్రమవుతోంది. అయితే, కొన్ని నెలల క్రితం మార్కెట్‌లో ఉన్న పరిస్థితి ఇప్పుడు పూర్తిగా మారిపోయింది. తాజాగా విడుదలైన 2025 నవంబర్ నెల విక్రయాల గణాంకాలు ఈ మార్పును స్పష్టం చేశాయి.

ర్యాంకింగ్‌లలో పెద్ద ఎత్తున మార్పులు సంభవించాయి. అగ్రస్థానంలో ఉన్న సంస్థలు కిందకు, దిగువన ఉన్నవి పైకి వచ్చాయి. వాహన్ పోర్టల్ నుంచి అందిన సమాచారం ప్రకారం.. నవంబర్‌లో అత్యధిక ఎలక్ట్రిక్ టూ-వీలర్లను విక్రయించిన సంస్థగా టీవీఎస్ మోటార్ అగ్రస్థానంలో నిలిచింది.

ఎలక్ట్రిక్ టూ-వీలర్ల విభాగంలో టీవీఎస్ మోటార్ అద్భుతమైన వృద్ధిని నమోదు చేసింది. నవంబర్‌లో మొత్తం 27,382 యూనిట్లను విక్రయించిన టీవీఎస్, మొత్తం మార్కెట్ వాటాలో 26 శాతం వాటాను సొంతం చేసుకుంది. గత కొన్ని నెలలుగా ఈ తమిళనాడు ఆధారిత సంస్థ ఒకటి లేదా రెండు స్థానాలలో స్థిరంగా రాణిస్తోంది.

ఇక ప్రముఖ ఎలక్ట్రిక్ స్కూటర్ అయిన చేతక్ భారీ అమ్మకాలతో బజాజ్ ఆటో రెండవ స్థానాన్ని దక్కించుకుంది. నవంబర్‌లో బజాజ్ 23,097 చేతక్ స్కూటర్లను విక్రయించి, 21.9 శాతం మార్కెట్ వాటాను సాధించింది. బజాజ్ బ్రాండ్ విలువ, చేతక్ స్కూటర్ లభ్యతను ఎక్కువ నగరాలకు విస్తరించడం అమ్మకాలు పెరగడానికి ప్రధాన కారణాలుగా చెప్పవచ్చు.

నవంబర్ విక్రయాల గణాంకాలలో అత్యంత పెద్ద మార్పు ఏమిటంటే.. చాలా కాలం పాటు అగ్రస్థానంలో ఉన్న ఓలా ఎలక్ట్రిక్ ఏకంగా ఐదవ స్థానానికి పడిపోవడం. అక్టోబర్‌లో నాలుగో స్థానానికి పడిపోయిన ఓలాకు, నవంబర్‌లో హీరో మోటోకార్ప్ సంస్థ షాకిచ్చింది. నవంబర్‌లో హీరో మోటోకార్ప్ విడా బ్రాండ్ 10,579 యూనిట్లను విక్రయించి, నాల్గవ స్థానాన్ని (10% మార్కెట్ వాటా) దక్కించుకుంది.

ఆఫ్‌లైన్ వ్యాపారాన్ని మెరుగుపరచడం, ఇటీవల బడ్జెట్ ధరలో విడా VX2 మోడల్‌ను విడుదల చేయడం విడా అమ్మకాలు పెరగడానికి కారణాలు. మరోవైపు, బెంగళూరుకు చెందిన ఈవీ స్టార్టప్ సంస్థ ఏథర్ ఎనర్జీ 18,356 యూనిట్లతో వరుసగా రెండవ నెల కూడా మూడవ స్థానంలో నిలిచింది.

గతంలో కొన్ని నెలల్లో 50,000 యూనిట్ల కంటే ఎక్కువ విక్రయాలు నమోదు చేసిన ఓలా ఎలక్ట్రిక్, నవంబర్‌లో కేవలం 7,567 యూనిట్ల అమ్మకాలతో ఐదవ స్థానానికి పడిపోయింది. ప్రస్తుతం ఓలా మార్కెట్ వాటా కేవలం 7.2 శాతం మాత్రమే. ఇది ఒకప్పుడు సగానికి పైగా మార్కెట్‌ను కలిగి ఉన్న బ్రాండ్‌కు ఊహించని పరిణామం.

ఈ పతనం వెనుక బ్రాండ్ ఇమేజ్ దెబ్బతినడం ప్రధాన కారణంగా తెలుస్తోంది. మొత్తంమీద పండుగల సీజన్ ముగిసినప్పటికీ, ఎలక్ట్రిక్ టూ-వీలర్ బ్రాండ్‌లు చెప్పుకోదగిన అమ్మకాలను నమోదు చేశాయి.. కానీ ఓలా పతనం మాత్రం ఈ చార్ట్‌లో అత్యంత ఆశ్చర్యకరమైన విషయం.

పండుగ సీజన్ ముగిసిన తర్వాత కూడా ఎలక్ట్రిక్ టూ-వీలర్ బ్రాండ్‌లు చెప్పుకోదగిన అమ్మకాలను నమోదు చేశాయి. అయితే, వినియోగదారుల దృష్టి ఇప్పుడు విశ్వసనీయత, సరసమైన ధరలు ఉన్న కంపెనీ బ్రాండ్‌ల వైపు మళ్లుతున్నట్లు ఓలా పతనం స్పష్టం చేస్తోంది. బ్రాండ్ ఇమేజ్ పడిపోవడం నుంచి ఓలా ఇంకా కోలుకోలేదని ఈ గణాంకాలు సూచిస్తున్నాయి.