60+ కి.మీ మైలేజ్.. 80 వేల రూపాయలు! ఈ మధ్యతరగతి స్కూటర్‌కు ప్రస్తుతం ఫుల్ డిమాండ్

సుజుకి యాక్సెస్ 125 (Suzuki Access 125) స్కూటర్‌కి దేశవ్యాప్తంగా ఉన్న ప్రజల ప్రేమ అంతా మాటల్లో చెప్పలేనిది. ఈ స్కూటర్ తన నమ్మకమైన పనితీరు, ఆకర్షణీయమైన డిజైన్‌, వినియోగదారుల సౌకర్యాన్ని దృష్టిలో ఉంచుకుని రూపుదిద్దుకోవడంతో ప్రతిరోజు ప్రయాణాలకు ఉత్తమమైన ఎంపికగా నిలుస్తోంది. సాఫ్ట్ సస్పెన్షన్, విస్తృతమైన సీటింగ్‌, శక్తివంతమైన ఇంజిన్ కలయికతో యాక్సెస్ 125 స్కూటర్ వినియోగదారుల మనసును దోచుకుంది. ఇది చాలా మందికి రోజువారీ జీవితంలో భాగమైపోయింది. అందుకే ఈ సంవత్సరం సెప్టెంబర్ నెలలో యాక్సెస్ 125 అమ్మకాలు బాగా రాణించాయి. ఆ నెలలోనే మొత్తం 72,238 యూనిట్లు వినియోగదారుల చేతికి వెళ్లాయి. ఇది గత సంవత్సరం ఇదే కాలంలో అమ్ముడైన 53,715 యూనిట్లతో పోలిస్తే సుమారు 34.48 శాతం వృద్ధి సాధించింది.

ఈ పెరుగుదల యాక్సెస్ 125 స్కూటర్ మీద వినియోగదారుల నమ్మకం ఎంత పెరిగిందో చూపిస్తుంది. మార్కెట్లో ఎన్ని కొత్త మోడళ్లు వచ్చినా, యాక్సెస్ తన ప్రత్యేకమైన గుర్తింపును నిలబెట్టుకుంది. సుజుకి బ్రాండ్ అందిస్తున్న నాణ్యత, మైలేజ్, ఆఫ్టర్-సేల్స్ సపోర్ట్ కారణంగానే ఇది ప్రతి ఇంటి స్కూటర్‌గా మారింది. ముఖ్యంగా ఇది హోండా యాక్టివా స్కూటర్‌కు బలమైన పోటీదారుగా ఉండటం విశేషం.

గత నెలకు ముందు ఆగస్టు నెలలో సుజుకి యాక్సెస్ 125 స్కూటర్ తన అమ్మకాలతో మరోసారి తన శక్తిని చాటుకుంది. కేవలం ఒక్క నెలలోనే మొత్తం 60,807 యూనిట్లు అమ్ముడవడం ద్వారా మార్కెట్లో తన ప్రాధాన్యతను మరోసారి నిరూపించింది. ఇది యాక్సెస్ 125 పట్ల ప్రజల విశ్వాసానికి స్పష్టమైన నిదర్శనం. ఆగస్టు నెలలో నెలతో పోల్చితే సెప్టెంబర్ అమ్మకాలు 18.79 శాతం పెరిగినట్లు గణాంకాలు చెబుతున్నాయి.

అంటే, వినియోగదారులు ఈ స్కూటర్‌కి మరింతగా ఆకర్షితులవుతున్నారు. GST సవరణలు కూడా ఈ వృద్ధికి ప్రధాన కారణమయ్యాయి. కొత్త ధరల వల్ల యాక్సెస్ 125 మరింత సరసమైనదిగా మారడంతో, మధ్యతరగతి కుటుంబాలు దీన్ని సులభంగా కొనుగోలు చేయగలిగారు. చాలా మంది వినియోగదారులు తమ మొదటి ప్రాధాన్యతగా యాక్సెస్ 125 ను ఎంచుకున్నారు. దీని శక్తివంతమైన ఇంజిన్, మైలేజ్, కంఫర్ట్, సుజుకి నమ్మకం కలిసివచ్చి, మార్కెట్లో యాక్సెస్‌కి తిరుగులేని స్థానం కల్పించాయి.

ఈ స్కూటర్ చాలా తక్కువ ధరకే అందుబాటులో ఉండటంతో, పేద,మధ్యతరగతి వర్గాల వినియోగదారులకు ఇది సులభంగా అందుతోంది. ధర విషయానికి వస్తే, కనిష్టంగా రూ. 80,572 నుంచి గరిష్టంగా రూ. 97,166 వరకు (ఎక్స్-షోరూమ్) ఉంటుంది. ఈ ధరలోనే స్కూటర్ అందించే ఫీచర్లు చూసినప్పుడు, ఇది ఖచ్చితంగా విలువకు మించిన ప్రదర్శన అని చెప్పవచ్చు.

యాక్సెస్ 125 మొత్తం నాలుగు వేరియంట్లలో స్టాండర్డ్ ఎడిషన్, స్పెషల్ ఎడిషన్(డిస్క్ బ్రేక్), రైడ్ కనెక్ట్ ఎడిషన్, రైడ్ కనెక్ట్ TFT ఎడిషన్‌లలో లభిస్తుంది. ఇంజిన్ విషయానికి వస్తే, ఇది 124 సీసీ సింగిల్-సిలిండర్, 4-స్ట్రోక్, ఎయిర్-కూల్డ్ పెట్రోల్ ఇంజిన్‌తో వస్తుంది, ఇది 8.3 PS హార్స్‌పవర్, 10.2 Nm టార్క్ ఉత్పత్తి చేస్తుంది. ఈ ఇంజిన్ తన స్మూత్ పెర్ఫార్మెన్స్, తక్కువ వైబ్రేషన్స్, మంచి పిక్-అప్‌కి ప్రసిద్ధి చెందింది.

ఇది సగటున 45 నుండి 64 కి.మీ. మైలేజీ ఇస్తుంది. దీని ఫ్యూయల్ ట్యాంక్ సామర్థ్యం 5.3 లీటర్లు, అంటే ఒకసారి నింపితే నగర ప్రయాణాలకు బాగా సరిపోతుంది. పర్ఫార్మెన్స్ పరంగా కూడా యాక్సెస్ 125 అద్భుతం. ఇది కేవలం 6.93 సెకన్లలోనే 0 నుండి 60 కి.మీ. వేగం చేరుకుంటుంది, గరిష్టంగా 90 కి.మీ./గం. వేగాన్ని అందిస్తుంది.