ఆల్ టైమ్ రికార్డు‌తో సుజుకి బ్లాక్‌బస్టర్ హిట్.. లక్షకు పైగా అమ్మకాలతో మార్కెట్ మొత్తాన్ని షేక్ చేసింది!

ప్రఖ్యాత టూవీలర్ వాహన తయారీ సంస్థ సుజుకి మోటార్‌సైకిల్ ఇండియా (Suzuki Motorcycle India) అక్టోబర్ 2025లో తమ చరిత్రలోనే అత్యధిక నెలవారీ అమ్మకాల రికార్డును సృష్టించింది. దేశీయ మార్కెట్‌తో పాటు ఎగుమతులను కలిపి మొత్తం 1,29,261 యూనిట్లను విక్రయించినట్లు కంపెనీ వెల్లడించింది. గత ఏడాది ఇదే నెలలో (అక్టోబర్ 2024) కంపెనీ 1,20,055 యూనిట్లు మాత్రమే విక్రయించగా, ఈసారి సుజుకి 8 శాతం వార్షిక వృద్ధిని సాధించడం విశేషం. ఈ అద్భుతమైన అమ్మకాలతో పాటు, సుజుకి మోటార్‌సైకిల్ అక్టోబర్ 2025లో తమ వ్యాపార విలువ రూ. 857 మిలియన్లకు పైగా చేరుకున్నట్లు పేర్కొంది. ఇది కంపెనీకి ఆర్థిక పరంగా కూడా ఒక ముఖ్యమైన మైలురాయిగా నిలిచింది.

దేశీయ మార్కెట్‌లో మాత్రం కొద్దిగా తగ్గుదల నమోదైంది. అక్టోబర్ 2025లో సుజుకి భారత్‌లో 1,03,454 యూనిట్లు విక్రయించగా, గత ఏడాది ఇదే కాలంలో 1,04,940 యూనిట్లు అమ్ముడయ్యాయి. దేశీయ విక్రయాల్లో స్వల్పంగా తగ్గుదల నమోదైనా, ఎగుమతుల విభాగంలో మాత్రం కంపెనీ గణనీయమైన వృద్ధిని సాధించింది. ఎగుమతుల పరంగా సుజుకి 25,807 యూనిట్లను విదేశాలకు పంపింది. ఇది అక్టోబర్ 2024లో నమోదైన 15,115 యూనిట్లతో పోలిస్తే 71 శాతం భారీ పెరుగుదల.

ఈ రికార్డు స్థాయి ఎగుమతులు కంపెనీ గ్లోబల్ మార్కెట్‌లో కూడా బలమైన స్థానం సంపాదిస్తున్నదని సూచిస్తున్నాయి. మొత్తానికి, దేశీయ మార్కెట్‌లో స్వల్ప ఒత్తిడిని ఎదుర్కొన్నప్పటికీ, ఎగుమతుల అద్భుత ప్రదర్శనతో సుజుకి మోటార్‌సైకిల్ ఇండియా అక్టోబర్ 2025ను అత్యంత విజయవంతమైన నెలగా మలచుకుంది. ఈ సేల్స్ భారతీయ తయారీ రంగంలో సుజుకి స్థిరమైన పెరుగుదల దిశగా సాగుతున్నదని నిరూపిస్తున్నాయి.

షిప్‌మెంట్‌ల పరంగా మాత్రమే కాకుండా, సుజుకి ఈసారి రిటైల్ విభాగంలో కూడా అద్భుతమైన వృద్ధిని నమోదు చేసింది. పండుగ సీజన్‌లో ఏర్పడిన బలమైన డిమాండ్ కారణంగా కంపెనీ రిటైల్ అమ్మకాలు అసాధారణమైన ఉత్సాహాన్ని చూపించాయి. గత ఏడాది అక్టోబర్ 2024లో సుజుకి రిటైల్ అమ్మకాలు 1,36,976 యూనిట్లుగా ఉండగా, ఈ ఏడాది అక్టోబర్ 2025లో అవి 1,40,679 యూనిట్లకు పెరిగి, కంపెనీ చరిత్రలోనే ఆల్ టైమ్ హై రికార్డ్ సాధించాయి.

ఈ గణాంకాలు దేశీయ మార్కెట్‌లో వినియోగదారుల సానుకూల భావన, అలాగే సుజుకి ఉత్పత్తులపై ఉన్న నమ్మకం, ఆకర్షణను స్పష్టంగా చూపిస్తున్నాయి. పండుగ కాలంలో మోటార్‌సైకిళ్లు, స్కూటర్లు కొనుగోలు చేసే వినియోగదారుల ఉత్సాహం సుజుకి విక్రయాలను కొత్త ఎత్తుకు చేర్చింది. సుజుకి మోటార్‌సైకిల్ ఇండియా అక్టోబర్ 2025లో సాధించిన అమ్మకాలపై స్పందిస్తూ, కంపెనీ సేల్స్ అండ్ మార్కెటింగ్ వైస్ ప్రెసిడెంట్ దీపక్ ముత్రేజా ఆనందం వ్యక్తం చేశారు.

ఆయన మాట్లాడుతూ, అక్టోబర్ 2025 మా కంపెనీ వృద్ధి ప్రయాణంలో ఒక ముఖ్యమైన మైలురాయిని సూచిస్తుంది. ఇప్పటివరకు అత్యధిక నెలవారీ అమ్మకాలను నమోదు చేయడం అనేది మా బ్రాండ్‌పై వినియోగదారులు ఉంచిన విశ్వాసానికి, అలాగే మా ఉత్పత్తుల నాణ్యతకు ప్రతీక అని అన్నారు. ఈ పండుగ కాలంలో 1.40 లక్షలకు పైగా దేశీయ రిటైల్ అమ్మకాలు సాధించడం సుజుకి మోటార్‌సైకిల్ ఉత్పత్తులపై ఉన్న బలమైన డిమాండ్‌కు నిదర్శనమని అన్నారు.

ప్రస్తుతం సుజుకి మోటార్‌సైకిల్ ఇండియా దేశంలో సంవత్సరానికి 1.3 మిలియన్ యూనిట్ల ఉత్పత్తి సామర్థ్యాన్ని కలిగి ఉంది. కంపెనీ అత్యాధునిక సదుపాయాలతో కూడిన తయారీ కేంద్రం ద్వారా భారత మార్కెట్ అవసరాలను తీర్చడమే కాకుండా, ఎగుమతుల కోసం కూడా పెద్ద స్థాయిలో ఉత్పత్తి చేస్తోంది. సుజుకి ప్రధానంగా 125 సీసీ విభాగంలోని స్కూటర్లను, అలాగే 150 సీసీ, అంతకంటే ఎక్కువ ఇంజిన్ సామర్థ్యం కలిగిన ప్రీమియం మోటార్‌సైకిళ్లను తయారు చేస్తుంది.