పెళ్ళాం తిట్టినా..నాన్న కొట్టినా..బుల్లెట్ మీద వెళ్తుంటే ఆ కిక్కే వేరు.. తక్కువ ధరలో బుల్లెట్.. బాబులు రెడీ అయ

భారతదేశంలో బైక్ లవర్స్ గురించి మాట్లాడుకుంటే మెజారిటీ జనం కలల బైక్ రాయల్ ఎన్‌ఫీల్డ్ (Royal Enfield). ఆ గంభీరమైన రూపం, విలక్షణమైన డుగ్ డుగ్ శబ్దం, రోడ్డుపై వెళ్తుంటే వచ్చే రాజసం.. ఇవన్నీ ఆ బ్రాండ్ సొంతం. అయితే చాలామంది రాయల్ ఎన్‌ఫీల్డ్ అంటే కేవలం లక్షల రూపాయలు ఉన్నవారికే సాధ్యమని, సామాన్యుడికి అందదని భ్రమపడుతుంటారు.

కానీ, అది నిజం కాదు. కంపెనీ తన పోర్ట్‌ఫోలియోలో మధ్యతరగతి కుర్రాళ్లకు కూడా అందుబాటులో ఉండేలా కొన్ని అదిరిపోయే మోడళ్లను ఉంచింది. పైగా ప్రభుత్వం జీఎస్టీలో చేసిన మార్పుల తర్వాత ఈ బైక్‌ల ధరలు మరింత ఊరటనిస్తున్నాయి. మీ బడ్జెట్‌లో ఇట్టే ఒదిగిపోయే టాప్-3 చౌకైన రాయల్ ఎన్‌ఫీల్డ్ బైక్‌ల వివరాలు ఇక్కడ వివరంగా ఉన్నాయి.

రాయల్ ఎన్‌ఫీల్డ్ హంటర్ 350 (Royal Enfield Hunter 350)
రాయల్ ఎన్‌ఫీల్డ్ కుటుంబంలో అత్యంత చవకైన, స్టైలిష్ బైక్ ఏదైనా ఉందంటే అది కచ్చితంగా హంటర్ 350 మాత్రమే. దీని ఎక్స్-షోరూమ్ ధర కేవలం రూ.1.38 లక్షల నుండే ప్రారంభమవుతుంది. నగరాల్లో తిరిగే కుర్రాళ్లను, ముఖ్యంగా ట్రాఫిక్‌లో సులభంగా బైక్ నడపాలి అనుకునే వారిని దృష్టిలో పెట్టుకుని కంపెనీ దీనిని చాలా తేలికగా రూపొందించింది. ఇతర రాయల్ ఎన్‌ఫీల్డ్ బైక్‌లతో పోలిస్తే ఇది బరువు తక్కువ, సీటు ఎత్తు కూడా తక్కువగా ఉండటం వల్ల ఎవరైనా సులభంగా నడపవచ్చు.

ఇందులో 349cc సింగిల్ సిలిండర్, ఎయిర్-ఆయిల్ కూల్డ్ ఇంజిన్ ఉంది. ఇది 20.2 bhp పవర్‌ను, 27 Nm టార్క్‌ను ఉత్పత్తి చేస్తుంది. లీటరుకు సుమారు 36.2 కిలోమీటర్ల మైలేజీని ఇస్తుంది. ఇందులో ఆల్-ఎల్ఈడీ హెడ్ లైట్, డిజిటల్-అనలాగ్ డ్యాష్‌బోర్డ్, టైప్-సి ఛార్జింగ్ పోర్ట్, స్లిప్-అసిస్ట్ క్లచ్, డ్యూయల్ ఛానల్ ఏబీఎస్ వంటి ఆధునిక ఫీచర్లు ఉన్నాయి. రెట్రో, మెట్రో అనే రెండు వేరియంట్లలో లభించే ఈ బైక్ యువతలో విపరీతమైన క్రేజ్ సంపాదించుకుంది.

రాయల్ ఎన్‌ఫీల్డ్ బుల్లెట్ 350 (Royal Enfield Bullet 350)
ఎన్ని కొత్త మోడళ్లు వచ్చినా బుల్లెట్‎కు ఉన్న క్రేజ్ వేరు. ఇది కేవలం బైక్ మాత్రమే కాదు, భారతీయులకు ఒక ఎమోషన్. రాయల్ ఎన్‌ఫీల్డ్ లైనప్‌లో రెండో చౌకైన బైక్ ఇదే. దీని ధర రూ.1.62 లక్షల నుండి మొదలవుతుంది. బుల్లెట్ అంటేనే పాత తరం రాజసం. ఆ ఐకానిక్ హ్యాండ్-పెయింటెడ్ ట్యాంక్, సింగిల్ పీస్ సీటు దీనికి ప్రత్యేకమైన గుర్తింపును ఇస్తాయి. ఇప్పుడు వస్తున్న కొత్త బుల్లెట్ పాత కాలపు లుక్‌ను కొనసాగిస్తూనే కొత్త టెక్నాలజీని అందిస్తోంది.

ఇందులో కూడా 349cc ఫ్యూయల్ ఇంజెక్టెడ్ ఇంజిన్ ఉంది. ఇది 20.4 PS పవర్‌ను, 27 Nm టార్క్‌ను ఇస్తుంది. రియల్ లైఫ్‌లో ఈ బైక్ సుమారు 35 నుండి 40 కిలోమీటర్ల మైలేజీని ఇస్తుంది. 300mm ఫ్రంట్ డిస్క్ బ్రేక్, డ్యూయల్ ఛానల్ ఏబీఎస్, అప్‌డేటెడ్ డిజిటల్-అనలాగ్ ఇన్‌స్ట్రుమెంట్ క్లస్టర్, యూఎస్‌బీ ఛార్జింగ్ పోర్ట్ వంటి ఫీచర్లు ఇప్పుడు బుల్లెట్‌లో కూడా అందుబాటులోకి వచ్చాయి. మిలిటరీ రెడ్, బ్లాక్ గోల్డ్ వంటి క్లాసిక్ కలర్లలో ఈ బైక్ లభిస్తుంది.

రాయల్ ఎన్‌ఫీల్డ్ క్లాసిక్ 350 (Royal Enfield Classic 350)
బడ్జెట్ కొంచెం పెంచగలిగితే, ప్రపంచవ్యాప్తంగా రాయల్ ఎన్‌ఫీల్డ్ బ్రాండ్ అంటేనే గుర్తొచ్చే క్లాసిక్ 350ని మీరు సొంతం చేసుకోవచ్చు. దీని ప్రారంభ ధర రూ.1.81 లక్షలు. సెకండ్ వరల్డ్ వార్ కాలపు బైక్ మోడల్స్‌ను పోలి ఉండే క్లాసిక్ 350, రెట్రో స్టైల్ ప్రేమికులకు మొదటి ప్రాధాన్యత. రైడింగ్ చేసేటప్పుడు ఇది ఇచ్చే కంఫర్ట్ మరే బైక్ ఇవ్వదు. 349cc బిఎస్-6 ఇంజిన్‌తో వచ్చే ఈ బైక్ 20.2 bhp పవర్‌ను అందిస్తుంది.

ఈ బైక్ ప్రత్యేకత ఏంటంటే, రాయల్ ఎన్‌ఫీల్డ్ మోడల్స్‌లోనే అత్యధికంగా సుమారు 41.55 కి.మీ. మైలేజీని అందిస్తుంది. అంటే పెట్రోల్ ఖర్చు విషయంలో ఇది మిగతా వాటికంటే మెరుగైనది. ఇందులో గూగుల్ మ్యాప్స్ సపోర్ట్ చేసే ట్రిప్పర్ నేవిగేషన్, అడ్జస్టబుల్ లీవర్స్, యూఎస్‌బీ ఛార్జింగ్, అద్భుతమైన అప్‌రైట్ రైడింగ్ పొజిషన్ ఉన్నాయి. దాదాపు 9 రకాల ఆకర్షణీయమైన రంగుల్లో ఇది అందుబాటులో ఉంది.

ఫైనల్లీ.. మీరు స్టైలిష్‌గా, సిటీలో దూసుకుపోవాలి అనుకుంటే హంటర్ 350 ఎంచుకోవచ్చు. పాత కాలపు రాజసం, కంపెనీ చరిత్ర ఇష్టపడే వారు బుల్లెట్ 350 వైపు వెళ్లవచ్చు. లేదు, నాకు అన్నీ పర్ఫెక్ట్‌గా ఉండాలి, మైలేజీ కూడా ముఖ్యమే అనుకుంటే క్లాసిక్ 350 బెస్ట్ ఆప్షన్. ఏది ఏమైనా రాయల్ ఎన్‌ఫీల్డ్ కన్నెర్ర చేస్తే రోడ్డుపై ఆ డుగ్ డుగ్ శబ్దానికి వచ్చే కిక్కే వేరు!