మైలేజ్, ఫీచర్లు, స్టైల్.. అన్నింటిలో బెస్ట్.. రూ.లక్ష లోపు బెస్ట్ 125సీసీ బైక్స్ ఇవే!

భారత మార్కెట్లో 125 సీసీ సెగ్మెంట్‌లోని బైక్‌లకు చాలా డిమాండ్ ఉంది. ఇవి మంచి మైలేజీతో పాటు, స్టైలిష్ డిజైన్, పర్ఫార్మెన్స్‌ను అందిస్తాయి. తక్కువ బడ్జెట్‌లో బైక్ కొనాలనుకునే వారికి ఇవి పర్ఫెక్ట్ ఛాయిస్. ముఖ్యంగా పండుగ సీజన్ దగ్గర పడుతున్న నేపథ్యంలో, చాలామంది కొత్త బైక్ కొనాలని ప్లాన్ చేస్తుంటారు. అలాంటి వారి కోసం రూ.లక్ష లోపు లభించే టాప్ 5 బెస్ట్ 125 సీసీ బైకుల గురించి తెలుసుకుందాం.

1. టీవీఎస్ రైడర్ 125 : టీవీఎస్ కంపెనీ 2021లో ఈ బైక్‌ను మార్కెట్లోకి తీసుకొచ్చింది. అప్పటి నుంచి ఈ సెగ్మెంట్‌లో ఇది అత్యధికంగా అమ్ముడవుతున్న బైక్‌లలో ఒకటిగా నిలిచింది. ఇందులో 124.8 సీసీ సింగిల్-సిలిండర్ ఇంజిన్ ఉంది. ఈ ఇంజిన్ 11.4 హెచ్‌పీ పవర్, 11.2 ఎన్ఎమ్ టార్క్‌ను ఉత్పత్తి చేస్తుంది.

ఈ బైక్‌లో ఎల్‌సీడీ డిస్‌ప్లేతో పాటు, ఎకో, పవర్ అనే రెండు రైడ్ మోడ్‌లు ఉన్నాయి. దీని ధర రూ. 1 లక్ష నుంచి రూ. 1.02 లక్షల మధ్యలో ఉంటుంది. స్టైలిష్ లుక్, మంచి ఫీచర్ల కోసం చూస్తున్న వారికి ఇది బెస్ట్ ఆప్షన్.

2. హోండా ఎస్‌పీ 125 : హోండా కంపెనీ నుంచి వచ్చిన ఈ బైక్ అత్యంత ప్రజాదరణ పొందిన మోడల్‌. ఇది తన నమ్మకమైన ఇంజిన్, ఎక్కువ మైలేజీకి ప్రసిద్ధి చెందింది. ఇందులో 123.94 సీసీ ఎయిర్-కూల్డ్ ఇంజిన్ ఉంది. ఇది 10.9 హెచ్‌పీ పవర్, 10.9 ఎన్ఎమ్ టార్క్‌ను ఉత్పత్తి చేస్తుంది. ఈ బైక్‌లో బ్లూటూత్ కనెక్టివిటీతో కూడిన 4.2 అంగుళాల టీఎఫ్‌టీ డిస్‌ప్లే వంటి అడ్వాన్సుడ్ ఫీచర్లు ఉన్నాయి. దీని ధర రూ. 93,247 నుంచి ప్రారంభమవుతుంది.

3. బజాజ్ పల్సర్ ఎన్125 : బజాజ్ పల్సర్ సిరీస్ నుంచి వచ్చిన ఈ కొత్త బైక్, పాత పల్సర్ 125కి భిన్నంగా కొత్త డిజైన్, ఫీచర్లతో వచ్చింది. ఇందులో 125 సీసీ ఇంజిన్ ఉంది. ఇది 12 హెచ్‌పీ పవర్, 11 ఎన్ఎమ్ టార్క్‌ను ఉత్పత్తి చేస్తుంది. ఈ సెగ్మెంట్‌లో అత్యధిక శక్తినిచ్చే ఇంజిన్లలో ఇది ఒకటి. స్మూత్ రైడింగ్‌తో పాటు, స్టైలిష్ లుక్ దీని ప్రత్యేకత. పల్సర్ ఎన్125 ధర రూ. 93,158 నుంచి ప్రారంభమవుతుంది.

4. హీరో ఎక్స్‌ట్రీమ్ 125ఆర్ : హీరో మోటోకార్ప్ కంపెనీ నుంచి వచ్చిన ఎక్స్‌ట్రీమ్ 125ఆర్ బైక్ కూడా ఈ సెగ్మెంట్‌లో బలమైన పోటీదారు. ఇందులో 124.7 సీసీ ఎయిర్-కూల్డ్ సింగిల్-సిలిండర్ ఇంజిన్ ఉంది. ఇది 11.5 హెచ్‌పీ శక్తిని, 10.5 ఎన్ఎమ్ టార్క్‌ను ఉత్పత్తి చేస్తుంది. స్పోర్టీ డిజైన్, ఎల్ఈడీ లైటింగ్, మంచి మైలేజీ దీని ప్రధాన ఆకర్షణలు. ఈ బైక్ ధర కూడా రూ.లక్ష లోపు ఉంటుంది.

5. బజాజ్ పల్సర్ 125 : పల్సర్ సిరీస్‌లో అత్యంత క్లాసిక్, బడ్జెట్-ఫ్రెండ్లీ మోడల్ ఇది. చాలా తక్కువ ధరలో మంచి పర్ఫార్మెన్స్ అందించే బైక్‌గా దీనికి పేరుంది. ఇందులో 124.4 సీసీ సింగిల్-సిలిండర్ ఇంజిన్ ఉంది. ఇది 11.8 హెచ్‌పీ పవర్, 10.8 ఎన్ఎమ్ టార్క్‌ను ఉత్పత్తి చేస్తుంది. మంచి మైలేజీ, తక్కువ మెయింటెనెన్స్ ఖర్చులతో ఈ బైక్ ధర కేవలం రూ. 85,178 నుంచి ప్రారంభమవుతుంది. తక్కువ బడ్జెట్‌లో పల్సర్ బైక్ కొనాలని ఆశపడే వారికి ఇది సరైన ఛాయిస్.