ఫారిన్ బైక్స్ ను మించి అదిరిపోయే లుక్.. రాకెట్ స్పీడుతో దూసుకెళ్లే స్పీడు.. కొత్త అపాచీ వచ్చేసింది

కమ్యూటర్ మోటార్‌సైకిళ్ల నుండి స్పోర్ట్స్ బైక్‌ల వరకు తయారు చేసి సత్తా చాటుతున్న సంస్థ టీవీఎస్. భారతదేశంలో టీవీఎస్ గేర్‌లెస్ స్కూటర్లు కూడా రికార్డు స్థాయిలో అమ్ముడవుతున్నాయి. బజాజ్ పల్సర్‌లు మార్కెట్‌ను ఏలుతున్న సమయంలోనే టీవీఎస్ అపాచీ అనే ఒక పవర్‎ఫుల్ స్పోర్ట్స్ బైక్‌ను పరిచయం చేసింది. అప్పటి నుంచి ఇప్పటి వరకు ఈ పేరు యూత్‎లో బాగా ప్రాచుర్యం పొందింది.

కాలానికి తగ్గట్లుగా కొత్త మోడళ్లను, మార్పులను తీసుకురావడంలో టీవీఎస్ చూపిన ధైర్యమే ఈ బ్రాండ్ విజయానికి ప్రధాన కారణం. ఇప్పుడు అపాచీ సిరీస్‌లో సరికొత్త మోడల్, RTR 310 నేకెడ్ స్ట్రీట్ ఫైటర్ స్పోర్ట్స్ మోటార్‌సైకిల్, అధునాతన మార్పులతో మార్కెట్‌లోకి ప్రవేశించింది. ఇది 2025 మోడల్ ఇయర్ అప్‌డేట్‌లతో వచ్చింది, దీని ఎక్స్‌షోరూమ్ ధర రూ.2.39 లక్షల నుండి ప్రారంభమవుతుంది.

మునుపటి మోడల్‌తో పోలిస్తే డిజైన్‌లో పెద్దగా మార్పులు లేనప్పటికీ, కొత్త వెర్షన్‌లో కలర్ ఆప్షన్లలో కొన్ని కొత్తదనం కనిపిస్తుంది. ఫ్యూయల్ ట్యాంక్‌పై ఉన్న కొత్త గ్రాఫిక్స్ ఈ నేకెడ్ స్ట్రీట్ ఫైటర్ స్పోర్ట్స్ బైక్‌కు అదనపు ఆకర్షణను ఇస్తాయి. చూసిన వెంటనే ఆకర్షణీయంగా కనిపించేలా డిజైన్ చేశారు. 2025 టీవీఎస్ అపాచీ RTR 310 బైక్‌ను భారతదేశంలో, ఎంపిక చేసిన అంతర్జాతీయ మార్కెట్లలో ఏకకాలంలో విడుదల చేశారు.

అద్భుతమైన పనితీరును, సరసమైన ధరను బ్యాలెన్స్ చేసే ఇలాంటి మిడ్-కెపాసిటీ స్ట్రీట్‌ఫైటర్ భారతదేశంలో మరొకటి లేదని చెప్పవచ్చు, ఇది దీని ప్రత్యేకతను చాటుతుంది. 2025 టీవీఎస్ అపాచీ RTR 310 బైక్ బేస్, టాప్, BTO కిట్ 1, BTO కిట్ 2 అనే నాలుగు విభిన్న వేరియంట్లలో అందుబాటులో ఉంది.

బేస్ వేరియంట్ ఎక్స్‌షోరూమ్ ధర రూ.2.40 లక్షలు. టాప్ వేరియంట్ ధర రూ.2.57 లక్షలు. డైనమిక్ ప్యాక్ ధర రూ.2.75 లక్షలు. డైనమిక్ ప్రో ప్యాక్ ధర రూ.2.85 లక్షలు. ఈ బైక్ ఫియరీ రెడ్, ఫ్యూరీ ఎల్లో, ఆర్సెనల్ బ్లాక్, సెపాంగ్ బ్లూ అనే నాలుగు ఆకర్షణీయమైన రంగులలో లభిస్తుంది.

బేస్ వేరియంట్‌లో కంపెనీ అందించే కొన్ని ముఖ్యమైన ఫీచర్లు ఇక్కడ ఉన్నాయి. అవి క్రూయిస్ కంట్రోల్, లీనియర్ ట్రాక్షన్ కంట్రోల్, డ్రాగ్ టార్క్ కంట్రోల్, రియర్ వీల్ లిఫ్ట్ ప్రొటెక్షన్. అపాచీ RTR 310 బైక్ టాప్ వేరియంట్‌లో బై-డైరెక్షనల్ క్విక్‌షిఫ్టర్‌ను చేర్చడం ద్వారా రైడింగ్ అనుభవాన్ని మరింత మెరుగుపరిచారు. డైనమిక్ కిట్ మోడల్‌లో అడ్జస్టబుల్ ఫ్రంట్, రియర్ సస్పెన్షన్, బ్రాస్-కోటెడ్ డ్రైవ్ చైన్, టైర్ ప్రెషర్ మానిటరింగ్ సిస్టమ్ వంటి అధునాతన ఫీచర్లు ఉన్నాయి.

2025 టీవీఎస్ అపాచీ డైనమిక్ ప్రో కిట్ కీలెస్‌ రైడ్, లాంచ్ కంట్రోల్, కార్నరింగ్ ఏబీఎస్, కార్నరింగ్ క్రూయిస్ కంట్రోల్, స్లోప్-డిపెండెంట్ కంట్రోల్, రియర్ లిఫ్ట్-ఆఫ్ ప్రొటెక్షన్ వంటి ఫీచర్లతో మార్కెట్‌లోకి వస్తుందని టీవీఎస్ ఒక పత్రికా ప్రకటనలో స్పష్టం చేసింది. ఇవి కాకుండా, ఈ కొత్త మోడల్‌లో మరికొన్ని ప్రత్యేకతలు కూడా చేర్చబడ్డాయి.

ఈ బైక్‌లో సూపర్మోటో, క్లాస్-డి ఎల్ఈడి రిఫ్లెక్టర్‌లు, డైనమిక్ ట్విన్ టెయిల్ ల్యాంప్‌లు, ట్రాన్స్‌పరెంట్ క్లచ్ కవర్, 5 రైడ్ మోడ్‌లు వంటివి ఉన్నాయి. 2025 అపాచీ RTR 310 నేకెడ్ స్ట్రీట్ ఫైటర్ స్పోర్ట్స్ మోటార్‌సైకిల్‌లో 5 అంగుళాల TFT Gen-2 కనెక్టెడ్ క్లస్టర్, సీక్వెన్షియల్ టర్న్ ఇండికేటర్‌లు కూడా అమర్చబడ్డాయి.

ఈ మోటార్‌సైకిల్ 312.12 సీసీ, సింగిల్-సిలిండర్, రివర్స్-ఇన్‌క్లైన్డ్ ఇంజిన్‌ను ఉపయోగిస్తుంది. స్పోర్ట్, ట్రాక్, సూపర్మోటో మోడ్‌లలో బైక్ 9700 ఆర్‌పిఎమ్ వద్ద 35.1 bhp శక్తిని ఉత్పత్తి చేస్తుంది. అర్బన్, రెయిన్ మోడ్‌లలో పవర్ 26.7 bhpకి తగ్గుతుంది. పర్ఫార్మెన్స్-ఫోకస్డ్ మోడ్‌లలో టార్క్ అవుట్‌పుట్ 28.7 Nm గా ఉంటుంది.

హైబ్రిడ్ ట్రెల్లిస్, అల్యూమినియం కాస్ట్ ఫ్రేమ్‌లో తయారుచేయబడిన ఈ మోటార్‌సైకిల్‌కు, ముందు భాగంలో 41 మిమీ సైజు అడ్జస్టబుల్ అప్-సైడ్ డౌన్ ఫోర్క్‌లు, వెనుక భాగంలో మోనోషాక్‌ను టీవీఎస్ ఏర్పాటు చేసింది. టైర్ల విషయానికి వస్తే, మిచెలిన్ రోడ్ 5 టైర్లతో అపాచీ RTR మార్కెట్‌లోకి వస్తుంది.

ఈ విభాగంలో కేటీఎం 390 డ్యూక్, ట్రయంఫ్ స్పీడ్ 400, బజాజ్ డోమినార్ 400 వంటి బలమైన పోటీదారులతో టీవీఎస్ పోటీ పడనుంది. ఈ కొత్త అపాచీ RTR 310 తో టీవీఎస్ స్పోర్ట్స్ బైక్ విభాగంలో తన స్థానాన్ని మరింత పటిష్టం చేసుకోవాలని చూస్తోంది.