కెప్టెన్ అమెరికా స్టైల్‌లో అదిరిపోయే ఎంట్రీ! టీవీఎస్ NTORQ సూపర్ సోల్జర్ ఎడిషన్ రిలీజ్

దేశీయ టూవీలర్ వాహన రంగంలో పేరొందిన సంస్థ టీవీఎస్ మోటార్ (Tvs Motor) కంపెనీ, తమ ప్రముఖ స్కూటర్ మోడల్ అయిన ఎన్‌టార్క్ 125కి మరో ప్రత్యేకతను జోడిస్తూ, మార్వెల్ అవెంజర్స్ సూపర్ స్క్వాడ్ సిరీస్‌లోకి కొత్త ఎడిషన్‌ను ప్రవేశపెట్టింది. ఈ కొత్త వేరియంట్ టీవీఎస్ ఎన్‌టార్క్ 125 సూపర్ సోల్జర్ ఎడిషన్ (Tvs Ntorq 125 Super Soldier Edition) మార్వెల్ యూనివర్స్‌లోని అభిమానుల హృదయాలను గెలిచిన సూపర్ హీరోల నుంచి ప్రేరణ పొందింది.
ఈ సరికొత్త ఎడిషన్, టీవీఎస్ ఎన్‌టార్క్ సూపర్ స్క్వాడ్ సిరీస్ లైనప్‌లో ఓ ప్రత్యేక స్థానాన్ని పొందింది. ఇందులో అత్యంత ప్రాచుర్యం పొందిన మార్వెల్ పాత్రలైన క్యాప్టెన్ అమెరికా, ఐరన్ మ్యాన్ వంటి వీరుల ప్రతిరూపాలను డిజైన్ రూపంలో మనకు దర్శనమిస్తాయి.

దీని డిజైన్ సైతం ఎంతో శక్తివంతమైన డైనమిక్ స్టైలింగ్‌తో, నగర జీవనశైలికి తగ్గట్లు సాంకేతికతను కూడా సమర్థవంతంగా మిక్స్ చేస్తూ రూపొందించబడింది. దీని ధర విషయానికి వస్తే, ఈ ఎడిషన్‌కు ఎక్స్-షోరూమ్ ధర రూ.98,117గా నిర్ణయించబడింది. జులై నెల నుంచి ఇది దేశవ్యాప్తంగా ఉన్న అన్ని టీవీఎస్ మోటార్ డీలర్‌షిప్‌లలో కొనుగోలుకు అందుబాటులో ఉంది. వాహన ప్రియులు, ముఖ్యంగా సూపర్ హీరోల అభిమానులకు ఇది ఓ ప్రత్యేకమైన మోడల్‌గా నిలవనుంది.

ఈ స్కూటర్‌లో 124.8cc సామర్థ్యం గల 3-వాల్వ్, సింగిల్ సిలిండర్, ఎయిర్-కూల్డ్ ఫ్యూయల్-ఇంజెక్టెడ్ ఇంజిన్‌ను వినియోగించారు. ఇది 9.5 PS శక్తిని ఉత్పత్తి చేయగలగడం తోపాటు, 10.6 Nm టార్క్‌ను అందిస్తుంది. ఆఫీసు, కాలేజీ వంటి రోజువారీ ప్రయాణాలకే కాదు, స్పోర్టీవ్ రైడింగ్‌కు కూడా సరిపడేలా ఈ శక్తివంతమైన యంత్రాంగం స్కూటర్‌ను తీర్చిదిద్దింది. ఈ స్కూటర్ 0 నుండి 60 కిలోమీటర్ల వేగాన్ని కేవలం 8.9 సెకన్లలో చేరగలదు.

గరిష్ట వేగం 95 kmphగా దాని క్లాస్‌లో ఇది ఒక డైనమిక్ స్కూటర్ అని నిరూపిస్తుంది. ప్రయాణ సౌలభ్యాన్ని దృష్టిలో ఉంచుకుని, ముందు భాగంలో టెలిస్కోపిక్ ఫ్రంట్ సస్పెన్షన్‌ను, వెనుక భాగంలో హైడ్రాలిక్ డంపర్‌లతో కూడిన కాయిల్ స్ప్రింగ్‌లను అందించారు. ఇవి దుమ్ము, గడ్డిగా ఉండే మార్గాలపై కూడా ఓ సున్నితమైన ప్రయాణానుభూతిని కలిగిస్తాయి. ముందుభాగంలో డిస్క్ బ్రేక్ వ్యవస్థను అమర్చడం వల్ల బ్రేకింగ్ సమయాల్లో మరింత నియంత్రణను అందిస్తుంది.

ఇది తొలిసారి 2020లో కెప్టెన్ అమెరికా ఎడిషన్‌గా సూపర్ స్క్వాడ్ లైనప్‌లోకి ప్రవేశించగా, అప్పటినుంచి మార్వెల్ అభిమానుల మనసుల్లో ప్రత్యేక స్థానం సంపాదించింది. తాజాగా వచ్చిన ఈ నవీకరించిన ఎడిషన్‌లో ఆకర్షణీయమైన గ్రాఫిక్స్, కొత్త డిజైన్ అంశాలు చూసే వారిని మరింత ఆకట్టుకుంటాయి. స్పోర్టీ, స్టైలిష్ స్కూటర్‌ కోసం ఎదురుచూస్తున్న యువతకు ఇది మరింత సరైన ఎంపికగా నిలుస్తుంది.

టీవీఎస్ ఎన్‌టార్క్ 125 సూపర్ సోల్జర్ ఎడిషన్‌లో అందించిన పూర్తి డిజిటల్ ఇన్స్ట్రుమెంట్ క్లస్టర్ ఇందులో ప్రధాన ఆకర్షణగా నిలుస్తుంది. ఇందులో నావిగేషన్ సూచనలు, రైడింగ్ గణాంకాలు, కాల్/ఎస్ఎంఎస్ నోటిఫికేషన్లు, వాహనానికి సంబంధించిన హెచ్చరికలు వంటి అనేక సమాచారం డ్రైవర్‌కు స్పష్టంగా కనిపించేలా ఉంటాయి. ఇది బ్లూటూత్ కనెక్టివిటీ ద్వారా పని చేస్తుంది, తద్వారా మోడర్న్ యూజర్ అవసరాలను బాగా తీర్చగలదు.

ఈ స్కూటర్‌కు USB ఛార్జింగ్ పోర్ట్ ఉండటంతో ప్రయాణంలో మొబైల్ లేదా ఇతర గాడ్జెట్లకు ఛార్జింగ్ అవసరాన్ని సులభంగా పొందొచ్చు. అలాగే బయటి ఫ్యూయల్ సౌకర్యం ఉండటం వలన సీట్ ఎత్తాల్సిన అవసరం లేకుండా నేరుగా పెట్రోల్ నింపవచ్చు. దీనిలో 20 లీటర్ల అండర్-సీట్ స్టోరేజ్ కూడా ఉంది, ఇది హెల్మెట్‌తో పాటు కొన్ని చిన్న బ్యాగులు లేదా గ్యాడ్జెట్లు వేయడానికి చక్కగా ఉపయోగపడుతుంది.