బైక్‌లో డ్యాష్‌క్యామ్.. ప్రమాదం జరిగితే ఆటోమేటిక్‌గా రికార్డ్.. ప్రపంచంలోనే మొట్టమొదటి రాడార్ బైక్ వచ్చేసింది

మామూలుగా రోడ్ల మీద రయ్ రయ్ మని దూసుకెళ్లే బైకులను చూసే ఉంటారు. అయితే వాటికి భిన్నంగా ఇప్పుడు ఒక సూపర్ బైక్ వచ్చేసింది. దాని పేరే అల్ట్రావైలెట్ X-47 క్రాస్‌ఓవర్ (Ultraviolette X-47 Crossover). ఇది సాదాసీదా ఎలక్ట్రిక్ బైక్ కాదు, దీనికి ఫైటర్ జెట్ DNA ఉంది.

ఇది సిటీ రోడ్లలోనే కాదు, కష్టమైన ప్రదేశాల్లోనూ సులభంగా వెళ్తుంది. ముఖ్యంగా ఈ బైక్‌లో రాడార్ టెక్నాలజీ ఉండటం దీనికి హైలైట్. ప్రపంచంలోనే రాడార్ టెక్నాలజీతో వస్తున్న మొదటి మోటార్ సైకిల్ ఇదే. అల్ట్రావైలెట్ కంపెనీ UV హైపర్‌సెన్స్ అనే పేరుతో ఈ టెక్నాలజీని తీసుకొచ్చింది. మరి దీని ధర ఎంత, ఫీచర్లు ఎలా ఉన్నాయో తెలుసుకుందాం.

అల్ట్రావైలెట్ సంస్థ ఎలక్ట్రిక్ వాహన రంగంలో సరికొత్త ఆవిష్కరణకు తెరతీసింది. ప్రపంచంలోనే మొట్టమొదటి రాడార్ టెక్నాలజీతో కూడిన మోటార్‌సైకిల్ X-47 క్రాసోవర్‎ను మార్కెట్లోకి విడుదల చేసింది. ఈ బైక్ కేవలం పనితీరులో మాత్రమే కాదు, భద్రత పరంగా కూడా సరికొత్త ప్రమాణాలను నెలకొల్పింది. ఇందులో ఉన్న అధునాతన ఫీచర్లు, దాని ధర, భారతదేశానికి ఈ బైక్ ఎందుకు గర్వకారణం వంటి వివరాలను ఇప్పుడు చూద్దాం.

ఎలక్ట్రిక్ టెక్నాలజీలో సరికొత్త ఆవిష్కరణలతో ముందుకు సాగుతున్న అల్ట్రావైలెట్ సంస్థ, ప్రపంచంలోనే మొట్టమొదటి రాడార్ టెక్నాలజీతో కూడిన మోటార్‌సైకిల్, అల్ట్రావైలెట్ X-47 క్రాస్‌ఓవర్‎ను మార్కెట్‌లోకి తెచ్చింది. దీని ప్రారంభ ధర రూ.2,49,000. అయితే ఇది కేవలం మొదటి 1000 మంది కస్టమర్లకు మాత్రమే వర్తిస్తుంది. ఆ తర్వాత దీని ధర రూ.2,74,000 వరకు పెరగవచ్చు. ఈ బైక్ బుకింగ్స్ ఈ రోజు నుంచే అల్ట్రావైలెట్ వెబ్‌సైట్‌లో రూ.999తో ప్రారంభమయ్యాయి. బైక్ డెలివరీలు అక్టోబర్ 2025 నుంచి మొదలవుతాయి.

డిజైన్, పర్ఫామెన్స్
X-47 బైక్ డిజైన్ ఫైటర్ జెట్ నుంచి ప్రేరణ పొందింది. ఇది పట్టణ ప్రాంతాల్లోనే కాకుండా, కఠినమైన భూభాగాల్లో కూడా సులభంగా ప్రయాణించేలా రూపొందించబడింది. ఇందులో 10.3 kWh బ్యాటరీ ప్యాక్ ఉంది. ఒకసారి ఛార్జ్ చేస్తే 323 కిలోమీటర్ల దూరం వెళ్తుందని కంపెనీ పేర్కొంది. ఈ బైక్ 40 hp పవర్, 610 Nm టార్క్ ఇస్తుంది. ఈ బైక్ కేవలం 2.7 సెకన్లలో 0 నుంచి 60 km/h వేగాన్ని అందుకుంటుంది. దీని గరిష్ట వేగం 145 km/h వరకు ఉంటుంది.

సేఫ్టీలో సరికొత్త బెంచ్‌మార్క్
ఈ బైక్‌లో ఉన్న అతిపెద్ద ఫీచర్ యూవీ హైపర్‌సెన్స్ సిస్టమ్. ఇది 77 GHz రేర్ రాడార్‌తో పనిచేస్తుంది. ఇది 200 మీటర్ల దూరం వరకు మానిటర్ చేయగలదు. ఈ వ్యవస్థ వల్ల బైక్ రైడర్‌కు మెరుగైన సేఫ్టీ లభిస్తుంది. ముఖ్యంగా ఈ సిస్టమ్ నాలుగు రకాలుగా పనిచేస్తుంది.

బ్లైండ్-స్పాట్ మానిటరింగ్: రైడర్‌కు కనిపించని బ్లైండ్ స్పాట్‌లను స్కాన్ చేస్తుంది. పక్క లేన్‌లలో ఉన్న వాహనాలను గుర్తించి అలర్ట్ చేస్తుంది.
లేన్ చేంజ్ అసిస్ట్: లేన్ మారుస్తున్నప్పుడు ప్రమాదాలు జరగకుండా అలెర్ట్ చేస్తుంది.

ఓవర్‌టేక్ అలెర్ట్: వెనుక నుంచి వస్తున్న వాహనాలు ఓవర్‌టేక్ చేస్తున్నప్పుడు రైడర్‌కు అలర్ట్ ఇస్తుంది.
రేర్ కొలిజన్ వార్నింగ్: వెనుక నుంచి వచ్చే వాహనం ఢీకొనే ప్రమాదం ఉంటే వెంటనే అలర్ట్ చేస్తుంది. అలాగే వెనుక ఉన్న వాహనానికి హెచ్చరికగా హజార్డ్ లైట్లను ఆన్ చేస్తుంది.

ఇతర ముఖ్యమైన ఫీచర్లు
ఛార్జింగ్: X-47 బైక్ ప్రపంచంలోనే అత్యంత పవర్ఫుల్, ఎయిర్ కూల్డ్ ఆన్‌బోర్డ్ ఛార్జర్‌తో వస్తుంది. ఇది DC ఫాస్ట్ ఛార్జింగ్ (Type 6), AC కార్ ఛార్జింగ్ (Type 2) రెండింటినీ సపోర్ట్ చేస్తుంది.

డాష్‌క్యామ్: ఈ బైక్‌కు ముందు, వెనుక భాగంలో 1080p, 30fps కెమెరాలు ఉంటాయి. వీటి ద్వారా రైడింగ్ వీడియోలు రికార్డ్ అవుతాయి. ఈ సిస్టమ్ 32GB ఇన్‌బిల్ట్ స్టోరేజ్‌తో వస్తుంది, దీన్ని 256GB వరకు పెంచుకోవచ్చు.

సస్పెన్షన్, బ్రేకులు: ఈ బైక్‌లో 41 mm ఇన్వర్టెడ్ ఫ్రంట్ ఫోర్క్స్, రేర్ మోనో-షాక్ సస్పెన్షన్ ఉన్నాయి. అలాగే బ్రేకింగ్ కోసం 10వ తరం BOSCH డ్యూయల్-ఛానల్ ABS వ్యవస్థ ఉంది.
రైడింగ్ మోడ్స్: రైడర్ తమ అవసరాలకు తగ్గట్టుగా గ్లైడ్, కంబాట్, బాలిస్టిక్ అనే మూడు మోడ్‌లను ఎంచుకోవచ్చు.
మొత్తంగా, ఈ బైక్ పవర్, పెర్ఫార్మెన్స్, సేఫ్టీ విషయంలో ఒక కొత్త బెంచ్‌మార్క్‌ను సెట్ చేసింది.