రెట్రో లుక్..రాకెట్ స్పీడ్..రూ.1.5లక్షలకే కిరాక్ బైక్..దీని మీద వెళ్తుంటే అమ్మాయిలు వెంటపడతారంతే

యమహా (Yamaha) కంపెనీ నుంచి బైక్ లవర్స్ ఎంతోమంది ఎప్పటి నుంచో ఉత్సాహంగా ఎదురుచూస్తున్న కొత్త బైక్ XSR 155 డెలివరీలు భారతదేశంలో ప్రారంభమయ్యాయి. బైక్‌ను డెలివరీ తీసుకుంటున్న కస్టమర్ల వీడియోలు సోషల్ మీడియాలో వైరల్ అవుతున్నాయి. ఈ బైక్‌ను యమహా రూ.1.5 లక్షల ప్రారంభ ధరతో భారత మార్కెట్‌లోకి తీసుకొచ్చింది. ఈ బైక్ ప్రధానంగా రాయల్ ఎన్‌ఫీల్డ్ హంటర్ 350 (Royal Enfield Hunter 350), టీవీఎస్ రోనిన్ (TVS Ronin) వంటి మోడళ్లకు గట్టి పోటీ ఇవ్వనుంది. 2019లో ప్రపంచవ్యాప్తంగా పరిచయం అయిన ఈ మోడల్, R15 మోడల్‌ను ఆధారంగా చేసుకుని తయారైంది.

యమహా XSR 155 ఒక ఆకర్షణీయమైన నియో-రెట్రో డిజైన్ కలిగి ఉంది. రౌండ్ ఆకారంలో ఉన్న LED హెడ్‌ల్యాంప్, టియర్‌డ్రాప్ ఆకారంలో ఉన్న ఫ్యూయల్ ట్యాంక్ , సరళమైన LCD కన్సోల్ దీనికి వింటేజ్ లుక్‌ను ఇస్తాయి. అయితే, ఇందులో ఆధునిక ఫీచర్లు పుష్కలంగా ఉన్నాయి.

యమహా XSR 155లో 155 సీసీ లిక్విడ్ కూల్డ్ ఇంజిన్ ఉంది. ఇది 18.1 bhp శక్తిని, 14.2 Nm టార్క్‌ను ఉత్పత్తి చేస్తుంది. వేరియబుల్ వాల్వ్ యాక్చుయేషన్ (VVA) టెక్నాలజీతో పనిచేసే ఈ ఇంజిన్ 6-స్పీడ్ గేర్‌బాక్స్‌తో జత చేయబడింది. ఈ మోడల్ డెల్టాబాక్స్ ఫ్రేమ్‌పై రూపొందించబడింది.

XSR 155 బైక్ పాత ఫీలింగ్‌తో పాటు అత్యాధునిక టెక్నాలజీని అందిస్తుంది. ఇందులో పూర్తిగా LED లైటింగ్ సెటప్, డిజిటల్ ఇన్‌స్ట్రుమెంట్ కన్సోల్ ఉన్నాయి. బ్లూటూత్ కనెక్టివిటీ కోసం Y-కనెక్ట్ యాప్ ద్వారా స్మార్ట్‌ఫోన్ కనెక్టివిటీ, అసిస్ట్ అండ్ స్లిప్పర్ క్లచ్ వంటి ఫీచర్లు లభిస్తాయి. ముందువైపు USD (అప్‌సైడ్ డౌన్) ఫోర్కులు మరియు వెనుకవైపు మోనోషాక్ సస్పెన్షన్ ఉన్నాయి.

డ్యుయల్ ఛానల్ ABS (యాంటీ-లాక్ బ్రేకింగ్ సిస్టమ్) తో కూడిన డిస్క్ బ్రేక్‌లు భద్రతను నిర్ధారిస్తాయి. ఇది 17 అంగుళాల అలాయ్ వీల్స్‌తో ట్యూబ్‌లెస్ టైర్లను కలిగి ఉంది. MT-15, R15లో ఉన్నట్లుగా రెండు ముక్కల సీటు కాకుండా, ఇది రైడర్‌కు అనుకూలంగా ఉండే ఫ్లాట్ సింగిల్-పీస్ సీటును కలిగి ఉంది.

యమహా XSR 155 బైక్ మెటాలిక్ గ్రే, వివిడ్ రెడ్, గ్రేయిష్ గ్రీన్ మెటాలిక్, మెటాలిక్ బ్లూ అనే నాలుగు కలర్స్‌లో అందుబాటులో ఉంది. దీని ఎక్స్-షోరూమ్ ధర రూ. 1,49,990 నుంచి మొదలవుతుంది.

యమహా కస్టమర్ల కోసం అదనంగా రెండు అధికారిక యాక్సెసరీ ప్యాక్‌లను కూడా అందిస్తోంది. అందులో ఒకటి స్క్రాంబ్లర్ ప్యాక్. ఇది బైక్‌కు ఎత్తైన స్టాండ్‌ను, ఆఫ్-రోడ్ లుక్‌ను ఇస్తుంది. రెండోది కెఫే రేసర్ ప్యాక్. ఇది స్పోర్టీ సీటు, ఇతర స్టైలింగ్ అంశాలను జోడిస్తుంది.

ఈ ప్యాక్‌లు రైడర్లు బయట పార్ట్స్ వెతకకుండా బైక్‌ను తమకు నచ్చినట్లుగా మార్చుకోవడానికి సహాయపడతాయి. డెలివరీలు మొదలవడంతో ఈ బైక్ బుకింగ్‌లు మరింత పెరిగే అవకాశం ఉంది. ఈ బైక్ రోడ్లపై ఎక్కువగా కనిపిస్తుందని, మార్కెట్‌లో పెద్ద మార్పు తీసుకురాగలదని ఆటో నిపుణులు అంచనా వేస్తున్నారు.