బుల్లెట్ లవర్స్ కు పండగే.. సరికొత్త అప్‌గ్రేడ్స్‌తో మార్కెట్లోకి రాయల్ ఎన్‌ఫీల్డ్ క్లాసిక్ 350

భారతదేశ మిడ్-సైజ్ బైక్ సెగ్మెంట్‌లో రారాజుగా వెలుగుగొందుతున్న రాయల్ ఎన్‌ఫీల్డ్ తన ఐకానిక్ రెట్రో బైక్ క్లాసిక్ 350ను సరికొత్త రైడర్-ఫ్రెండ్లీ అప్‌గ్రేడ్స్‌తో మార్కెట్లోకి తీసుకువచ్చింది. దేశంలోనే అత్యధికంగా అమ్ముడవుతున్న రెట్రో మోటార్‌సైకిళ్లలో ఒకటైన ఈ మోడల్‌ను మరింత సౌకర్యవంతంగా మార్చేందుకు కంపెనీ కొన్ని కీలక మార్పులు చేసింది. బైక్ రైడింగ్ అనుభవాన్ని సరికొత్త స్థాయికి తీసుకెళ్లడమే లక్ష్యంగా ఈ సరికొత్త 2026 ఎడిషన్ క్లాసిక్ 350 బైకును సిద్ధం చేసింది. పాత స్టైలిష్ వింటేజ్ లుక్‌ను అలాగే ఉంచుతూ.. రోజువారీ ప్రయాణాల్లో రైడర్లకు అవసరమైన ఉపయోగకరమైన ఫీచర్లను దీనికి జోడించింది.

ఇకపై సిటీ ట్రాఫిక్‌లోనూ ఈజీ రైడింగ్
ఈ అప్‌డేటెడ్ మోడల్‌లో తీసుకొచ్చిన అతిపెద్ద మార్పు ఏమిటంటే.. ఇందులో అసిస్ట్ అండ్ స్లిప్పర్ క్లచ్ సిస్టమ్‌ను ప్రవేశపెట్టారు. దీనివల్ల బైక్ క్లచ్ లివర్ నొక్కడం చాలా తేలికగా మారుతుంది. నగరాల్లోని విపరీతమైన ట్రాఫిక్‌లో పదే పదే గేర్లు మార్చాల్సి వచ్చినప్పుడు రైడర్ల చేతులు అలసిపోకుండా ఈ సిస్టమ్ కాపాడుతుంది. అంతేకాకుండా, వేగంగా వెళ్లేటప్పుడు హఠాత్తుగా డౌన్ షిఫ్ట్ (గేర్లు తగ్గించడం) చేసినా బైక్ వెనుక చక్రం స్కిడ్ అవ్వకుండా లేదా లాక్ అవ్వకుండా చాలా స్మూత్‌గా గేర్లు పడటానికి ఈ స్లిప్పర్ క్లచ్ అద్భుతంగా సహాయపడుతుంది.

ఫోన్ చార్జింగ్ అయిపోతుందనే టెన్షన్ లేదు
లాంగ్ రైడ్స్ వెళ్లేవారి కోసం రాయల్ ఎన్‌ఫీల్డ్ మరో అద్భుతమైన ఫీచర్‌ను కూడా జోడించింది. బైక్‌కు సరికొత్త యూఎస్‌బీ టైప్-సి ఫాస్ట్ చార్జింగ్ పోర్టును అమర్చారు. సుదూర ప్రయాణాలు చేసేటప్పుడు లేదా గూగుల్ మ్యాప్స్ ద్వారా నావిగేషన్ వాడుతున్నప్పుడు స్మార్ట్‌ఫోన్లలో చార్జింగ్ త్వరగా అయిపోతుందనే టెన్షన్ పడాల్సిన అవసరం లేదు. బైక్ నడుపుతూనే చాలా వేగంగా మీ ఫోన్‌ను చార్జ్ చేసుకోవచ్చు. ఈ చిన్న మార్పు బైక్‌తో లాంగ్ టూర్లు వెళ్లే రైడర్లకు ఎంతగానో ఉపయోగపడనుంది.

అదే సిగ్నేచర్ గంభీర శబ్దం
ఫీచర్ల పరంగా మార్పులు చేసినప్పటికీ.. ఈ బైక్ ఇంజన్ పనితీరులో ఎటువంటి మార్పులు చేయలేదు. ఇందులో నమ్మకమైన, అత్యంత రిఫైన్డ్ 349 సీసీ జే-సిరీస్ ఎయిర్-కూల్డ్ ఇంజన్‌నే కొనసాగించారు. ఈ ఇంజన్ 20.2 bhpల పవర్, 27 Nmల టాక్‌ను ప్రొడ్యూస్ చేస్తుంది. ఇది 5-స్పీడ్ గేర్‌బాక్స్‌తో జత చేయబడింది. రాయల్ ఎన్‌ఫీల్డ్ సిగ్నేచర్ డుగ్.. డుగ్ అనే గంభీరమైన సౌండ్ కోసం ఇందులో సింగిల్ పీ-షూటర్ ఎగ్జాస్ట్ సిస్టమ్‌ను అలాగే ఉంచారు. 13 లీటర్ల కెపాసిటీ గల ఫ్యూయల్ ట్యాంక్, 195 కేజీల బరువుతో రోడ్డుపై తిరుగులేని స్టెబిలిటీని ఈ బైక్ అందిస్తుంది.

మార్కెట్లో హోండా సీబీ 350, జావా 42 బైకులకు గట్టి పోటీ
భారత మార్కెట్లో అప్‌డేటెడ్ రాయల్ ఎన్‌ఫీల్డ్ క్లాసిక్ 350 ప్రారంభ ధరను రూ. 1.87 లక్షలుగా (ఎక్స్-షోరూమ్) నిర్ణయించారు. అయితే, కొత్తగా ప్రవేశపెట్టిన అసిస్ట్ అండ్ స్లిప్పర్ క్లచ్, టైప్-సి ఫాస్ట్ చార్జర్ అప్‌గ్రేడ్స్ కేవలం డ్యూయల్-ఛానల్ ఏబీఎస్ వేరియంట్లలో మాత్రమే అందుబాటులో ఉంటాయని కంపెనీ స్పష్టం చేసింది. ఈ సరికొత్త అప్‌గ్రేడ్స్‌తో మార్కెట్లోకి వచ్చిన క్లాసిక్ 350.. హోండా సీబీ 350 (Honda CB350), జావా 42 (Jawa 42), యెజ్డీ రోడ్‌స్టర్ (Yezdi Roadster), అలాగే ట్రయంఫ్ స్పీడ్ 400 (Triumph Speed 400) వంటి పాపులర్ మోటార్‌సైకిళ్లకు గట్టి పోటీ ఇవ్వనుంది.