కళ్లు తిరిగే ఎత్తులు, ఊహించని మలుపులు, అనుకోని ప్రమాదాలు.. అన్నింటినీ జయించిన స్కూటర్

భారతీయ ఎలక్ట్రిక్ వాహన రంగంలో ఒక సరికొత్త చరిత్ర నమోదైంది. ప్రముఖ ఈవీ తయారీ సంస్థ గ్రీవ్స్ ఎలక్ట్రిక్ మొబిలిటీకి చెందిన ఆంపియర్ నెక్సస్ (Ampere Nexus) ఎలక్ట్రిక్ స్కూటర్ ప్రతిష్టాత్మకమైన ఏషియా బుక్ ఆఫ్ రికార్డ్స్‎లో చోటు సంపాదించుకుంది. తమిళనాడులోని అత్యంత ప్రమాదకరమైన, క్లిష్టమైన కొల్లి కొండలను (Kolli Hills) విజయవంతంగా అధిరోహించిన మొదటి ఎలక్ట్రిక్ ద్విచక్ర వాహనంగా ఇది రికార్డు సృష్టించింది. సాధారణంగా పెట్రోల్ బండ్లకే సవాలు విసిరే ఈ దారిని, ఒక ఎలక్ట్రిక్ స్కూటర్ చిటికెలో దాటేయడం ఇప్పుడు ఆటోమొబైల్ ప్రపంచంలో హాట్ టాపిక్ అయ్యింది.

తమిళనాడులోని కొల్లి కొండలు (Kolli Hills) డ్రైవర్లకు ఒక అగ్నిపరీక్ష లాంటివి. ఈ కొండపైకి చేరుకోవాలంటే ఏకంగా 70 హెయిర్‌పిన్ బెండ్స్ (Hairpin Bends) దాటాలి. అత్యంత నిటారుగా ఉండే ఈ మలుపులను ఎక్కడం ఏ వాహనానికైనా కష్టమే. అయితే, 2026 జనవరి 7వ తేదీ ఉదయం 7 గంటలకు ఆంపియర్ నెక్సస్ తన ప్రయాణాన్ని ప్రారంభించింది. కేవలం 22 నిమిషాల 10 సెకన్లలోనే బెలుకురిచ్చి నుంచి కొల్లి హిల్స్ శిఖరాగ్రానికి చేరుకుని అందరినీ ఆశ్చర్యపరిచింది. ఈ సాహసాన్ని ఏషియా బుక్ ఆఫ్ రికార్డ్స్ అధికారులు స్వయంగా పరిశీలించి ధృవీకరించారు.

ఈ రికార్డు సాధించడంలో ఆంపియర్ నెక్సస్‌లోని అత్యాధునిక సాంకేతికత కీలక పాత్ర పోషించింది.
LFP బ్యాటరీ టెక్నాలజీ: ఇందులో వాడిన బ్యాటరీ మైనస్ 40 డిగ్రీల చలిలోనూ, ప్లస్ 60 డిగ్రీల ఎండలోనూ స్థిరంగా పనిచేస్తుంది. కొండలు ఎక్కేటప్పుడు ఇంజిన్ వేడెక్కకుండా ఇది కాపాడుతుంది.
స్ట్రాంగ్ ఛాసిస్: దీని డ్యూయల్ ఫ్రేమ్ స్టీల్ ఛాసిస్ అత్యంత కఠినమైన రోడ్లపై కూడా వాహనం బ్యాలెన్స్ తప్పకుండా చూస్తుంది.

కొండలు ఎక్కేటప్పుడు కావాల్సిన తక్షణ శక్తిని (Torque) దీని మోటార్ అందిస్తుంది. అలాగే కిందకు దిగేటప్పుడు రీజెన్ బ్రేకింగ్ ద్వారా బ్యాటరీని ఆదా చేస్తూ సురక్షితంగా ప్రయాణించేలా చేస్తుంది.
ట్రాక్షన్ కంట్రోల్: జారుడుగా ఉండే రోడ్లపై కూడా టైర్లు పట్టు కోల్పోకుండా ఈ ఫీచర్ అద్భుతంగా పనిచేస్తుంది.

భారతదేశం కోసం.. భారతీయుల కోసం
గ్రీవ్స్ ఎಲೆಕ್ట్రిక్ మొబిలిటీ మేనేజింగ్ డైరెక్టర్ వికాస్ సింగ్ మాట్లాడుతూ.. "భారతదేశ రోడ్లు ప్రపంచంలోనే అత్యంత సవాలుతో కూడుకున్నవి. మేము మా వాహనాలను కేవలం ల్యాబ్‌లలో టెస్ట్ చేయడమే కాదు, నిజ జీవితంలోని కఠినమైన పరిస్థితులను తట్టుకునేలా తయారు చేస్తాం. కొల్లి కొండల విజయం మా ఇంజనీరింగ్ సామర్థ్యానికి నిదర్శనం" అని గర్వంగా ప్రకటించారు. ఈ రికార్డు కేవలం కంపెనీకి మాత్రమే కాదు, మేక్ ఇన్ ఇండియా ఉత్పత్తులపై ఉన్న నమ్మకాన్ని కూడా పెంచింది.

విదేశాల్లోనూ ఆంపియర్ హవా
కేవలం భారతదేశంలోనే కాకుండా నేపాల్, శ్రీలంక, ఫిలిప్పీన్స్, ఆఫ్రికా దేశాల్లో కూడా ఆంపియర్ స్కూటర్లు తమ ఉనికిని చాటుకుంటున్నాయి. ఎలక్ట్రిక్ వాహనాలు కేవలం నగరాలకే పరిమితం కాదని, అవి కొండలు, కోనలు కూడా అలవోకగా ఎక్కగలవని ఈ రికార్డు నిరూపించింది. మన్నిక మరియు భద్రతలో ఆంపియర్ నెక్సస్ తనకంటూ ఒక ప్రత్యేక స్థానాన్ని సంపాదించుకుంది.

ఈవీల భవిష్యత్తు ఇదే
సాధారణంగా ఎలక్ట్రిక్ స్కూటర్లు కొండలు ఎక్కలేవని, మధ్యలో ఆగిపోతాయనే అపోహ చాలామందిలో ఉంది. కానీ ఆంపియర్ నెక్సస్ సాధించిన ఈ ఏషియా బుక్ ఆఫ్ రికార్డ్స్ ఆ అపోహలన్నింటినీ పటాపంచలు చేసింది. పర్యావరణానికి మేలు చేయడమే కాకుండా, పెర్ఫార్మెన్స్‌లో కూడా తక్కువ కాదని ఈ స్కూటర్ నిరూపించింది.