ఈ ఒక్క స్కూటర్‌కు కంపెనీ దండం పెట్టాల్సిందే! రోడ్డెక్కిన 6 లక్షల ఏథర్ ఎలక్ట్రిక్ స్కూటర్లు

భారతదేశంలో ఎలక్ట్రిక్ వాహనాల విప్లవం రోజురోజుకీ వేగం పెంచుకుంటున్న ఈ సమయంలో, వినియోగదారుల విశ్వాసాన్ని గెలుచుకున్న బ్రాండ్‌లలో ఏథర్ ఎనర్జీ (Ather Energy) ఒకటి. ప్రారంభం నుంచే నాణ్యత, ఆధునిక టెక్నాలజీ, పనితీరుపై దృష్టి పెట్టిన ఈ సంస్థ, ఇతర కంపెనీలతో పోలిస్తే కొంచెం భిన్నమైన దారిని ఎంచుకుంది. సాదాసీదా కమ్యూటర్ వాహనంగా కాకుండా, స్మార్ట్ ఫీచర్లు, ప్రీమియం అనుభవం కలిగిన ఎలక్ట్రిక్ స్కూటర్‌ను వినియోగదారులకు అందించాలనే లక్ష్యంతో ముందుకు సాగింది. ఈ దృక్పథానికి ఫలితంగా వచ్చిన Ather 450, 450 సిరీస్ మోడళ్లు, భారత మార్కెట్లో కొత్త ట్రెండ్‌ను సృష్టించాయి. వేగం, రేంజ్ మాత్రమే కాకుండా, కనెక్టెడ్ ఫీచర్లు, రెగ్యులర్ సాఫ్ట్‌వేర్ అప్‌డేట్స్ వంటి అంశాలు ఈ బ్రాండ్‌ను ప్రత్యేకంగా నిలబెట్టాయి.

ఈ కారణంగానే "ఏథర్ స్కూటర్ తీసుకున్నవాళ్లు తిరిగి వెనక్కి చూసే పరిస్థితి రావడం అరుదు" అనే అభిప్రాయం కూడా వినిపిస్తోంది. ఈ విజయ ప్రయాణంలో తాజాగా ఏథర్ ఎనర్జీ మరో కీలక మైలురాయిని చేరుకుంది. అమ్మకాల పరంగా దేశంలో మూడవ అతిపెద్ద ఎలక్ట్రిక్ ద్విచక్ర వాహన తయారీదారుగా నిలిచిన ఈ సంస్థ, 6 లక్షల యూనిట్ల అమ్మకాల మార్క్‌ను దాటడం గమనార్హం.

వాహన్ పోర్టల్ గణాంకాల ప్రకారం, ఇప్పటివరకు మొత్తం 6,04,497 యూనిట్లను విక్రయించడం ద్వారా వృద్ధిని మరోసారి నిరూపించింది. ఇక్కడ ప్రత్యేకంగా చెప్పుకోవాల్సిన విషయం ఏమిటంటే, 2018లో కార్యకలాపాలు ప్రారంభించిన ఈ బ్రాండ్ మొత్తం అమ్మకాలలో దాదాపు సగం, అంటే 50 శాతం కేవలం గత 16 నెలల్లోనే నమోదు కావడం. ఇది కేవలం కంపెనీ ఎదుగుదల మాత్రమే కాదు, దేశంలో ఎలక్ట్రిక్ వాహనాలపై పెరుగుతున్న డిమాండ్‌ను కూడా ప్రతిబింబిస్తుంది.

ఏథర్ ఎనర్జీ ప్రారంభ దశలో ఎదుర్కొన్న సవాళ్లు, ఆ తర్వాత సాధించిన వేగవంతమైన ఎదుగుదల లిపి చూస్తే ఇది ఒక ఆసక్తికరమైన విజయగాథగా కనిపిస్తుంది. 2018లో మార్కెట్లోకి అడుగుపెట్టిన ఈ బ్రాండ్‌కు మొదటి నాలుగేళ్లు అంత సులభంగా సాగలేదు. 2018 నుంచి 2021 వరకు అమ్మకాలు చాలా పరిమితంగా ఉండటానికి ప్రధాన కారణాల్లో ఒకటి కోవిడ్-19 మహమ్మారి ప్రభావం. ఆ రెండు సంవత్సరాల్లో ఆటోమొబైల్ రంగం మొత్తమే మందగించింది.

ప్రారంభంలో కంపెనీ తన కార్యకలాపాలను ప్రధానంగా బెంగళూరు వంటి కొన్ని నగరాలకు మాత్రమే పరిమితం చేయడం కూడా అమ్మకాల పెరుగుదలను కొంతవరకు తగ్గించింది. అయినప్పటికీ, టెక్నాలజీ, క్వాలిటీ విషయంలో ఎలాంటి రాజీ పడకుండా ముందుకు సాగిన ఏథర్, క్రమంగా వినియోగదారుల విశ్వాసాన్ని సంపాదించడం ప్రారంభించింది. ఈ మార్పు 2022లో స్పష్టంగా కనిపించింది. ఆ సంవత్సరంలో కంపెనీ 51,811 యూనిట్లను విక్రయించి, ఎలక్ట్రిక్ టూ-వీలర్ మార్కెట్లో 8 శాతం వాటాను దక్కించుకుంది.

ఇది కంపెనీకి ఒక టర్నింగ్ పాయింట్‌గా నిలిచింది. ఆ తర్వాత 2023లో అమ్మకాలు తొలిసారిగా 1 లక్ష యూనిట్లను దాటడం, మార్కెట్ వాటా 12 శాతానికి పెరగడం ఈ బ్రాండ్ వేగంగా ఎదుగుతోందనే సంకేతాన్ని ఇచ్చాయి. ఈ వృద్ధి 2024లో కూడా కొనసాగింది. ఆ సంవత్సరంలో కంపెనీ 1.26 లక్షలకు పైగా యూనిట్లను రిటైల్ చేయడం జరిగింది. ఇక 2025లో అయితే ఈ ఎదుగుదల మరింత స్పష్టంగా కనిపించింది.

ఈ సంస్థ మొత్తం 2,01,129 ఎలక్ట్రిక్ స్కూటర్లను విక్రయించి, ఏడాదికి 59 శాతం వృద్ధిని నమోదు చేసింది. అదే సమయంలో మార్కెట్ వాటాను 16 శాతానికి పెంచుకోవడం కూడా గమనార్హం. 2026లో కూడా ఈ వేగం తగ్గే సూచనలు కనిపించడం లేదు. వాహన్ గణాంకాల ప్రకారం, జనవరి 1 నుంచి ఏప్రిల్ 22 మధ్యకాలంలోనే 99,159 స్కూటర్లు వినియోగదారులకు డెలివరీ చేయబడ్డాయి. అంటే ఏడాది ప్రారంభం నుంచే ముందుకు సాగుతోంది.

ఈ వేగవంతమైన వృద్ధికి ప్రధాన కారణాల్లో ఒకటి Ather Rizta. ప్రస్తుతం కంపెనీ మొత్తం అమ్మకాలలో 70 నుంచి 75 శాతం వరకు వాటాను ఈ మోడల్ ఒక్కటే కలిగి ఉంది. BaaS ద్వారా స్కూటర్లను కొనుగోలు చేయడానికి ఆసక్తి చూపిస్తున్నారు. Ather Rizta S వేరియంట్ సాధారణంగా రూ. 1.17 లక్షల నుండి ప్రారంభమవుతుండగా, BaaS ఆప్షన్‌తో కొనుగోలు చేస్తే ధర సుమారు రూ. 76,000 వరకు తగ్గుతుంది.