బడ్జెట్‌లో కొత్త బజాజ్ అవెంజర్ లాంచ్.. బైక్ కాదు బాస్.. రోడ్లపై రాజులా ఫీల్ ఇచ్చే 220cc స్ట్రీట్ వెర్షన్!

భారత క్రూయిజర్ బైక్ మార్కెట్లో తనకంటూ ప్రత్యేక గుర్తింపు సంపాదించుకున్న బజాజ్ అవెంజర్ (Bajaj Avenger) సిరీస్‌కు తాజాగా కొత్త సభ్యుడు చేరాడు. బజాజ్ ఆటో 2026 అవెంజర్ స్ట్రీట్ (Avenger Street 220)ను భారత మార్కెట్లో అధికారికంగా విడుదల చేసింది. రూ.1.30 లక్షల (ఎక్స్-షోరూమ్) ధరతో వచ్చిన ఈ బైక్, స్టైలిష్ లుక్, సౌకర్యవంతమైన రైడింగ్ పొజిషన్, శక్తివంతమైన ఇంజన్‌తో క్రూయిజర్ బైక్ ప్రియులను ఆకట్టుకునేలా రూపొందించబడింది. ఇప్పటి వరకు బజాజ్ అవెంజర్ శ్రేణిలో అవెంజర్ స్ట్రీట్ 160, అవెంజర్ క్రూయిజ్ 220 మోడళ్లను విక్రయిస్తూ వచ్చింది. అయితే, కంపెనీ తాజాగా చిన్న ఇంజన్ కలిగిన అవెంజర్ స్ట్రీట్ 160 ఉత్పత్తిని నిలిపివేయాలని నిర్ణయించింది.

దీంతో 160 సీసీ మోడల్ స్థానాన్ని మరింత శక్తివంతమైన 220 సీసీ ఇంజన్‌తో కూడిన అవెంజర్ స్ట్రీట్ 220 భర్తీ చేయనుంది. కొత్త స్ట్రీట్ 220 రాకతో అవెంజర్ లైనప్ మరింత సరళంగా మారింది. ప్రస్తుతం భారత మార్కెట్లో అవెంజర్ క్రూయిజ్ 220, స్ట్రీట్ 220 రెండు 220 సీసీ మోడళ్లు మాత్రమే అందుబాటులో ఉన్నాయి. అంటే, ఇకపై అవెంజర్ బ్రాండ్ పూర్తిగా 220 సీసీ సెగ్మెంట్‌పైనే దృష్టి సారించనుంది.

భారతదేశంలో అందుబాటు ధరలో క్రూయిజర్ బైక్ కొనాలనుకునే వారికి అవెంజర్ సిరీస్ ఎప్పటినుంచో ప్రముఖ ఎంపికగా ఉంది. ముఖ్యంగా పొడవైన హ్యాండిల్‌బార్, ముందుకు చాపిన ఫుట్‌పెగ్స్, తక్కువ సీట్ ఎత్తు, రిలాక్స్‌డ్ రైడింగ్ పొజిషన్ కారణంగా ఈ బైక్‌లు లాంగ్ రైడ్స్‌కు ఎంతో అనుకూలంగా ఉంటాయి. ఇప్పుడు Street 220 రాకతో అదే అనుభూతిని మరింత శక్తివంతమైన ఇంజన్‌తో అందించేందుకు బజాజ్ సిద్ధమైంది.

ఇప్పటి వరకు బజాజ్ అవెంజర్ శ్రేణిలో అత్యంత సరసమైన మోడల్‌గా అవెంజర్ స్ట్రీట్ 160 అందుబాటులో ఉండేది. ఈ బైక్‌ను కంపెనీ సుమారు రూ.1.12 లక్షల (ఎక్స్-షోరూమ్) ధరకు విక్రయించేది. అయితే ఇప్పుడు ఆ మోడల్‌ను నిలిపివేసి, దాని స్థానంలో స్ట్రీట్ 220ను బజాజ్ రూ.1.30 లక్షల(ఎక్స్-షోరూమ్) ధరకు మార్కెట్లో విడుదల చేసింది. అంటే, పాత స్ట్రీట్ 160తో పోలిస్తే ఈ కొత్త బైక్ ధర దాదాపు రూ.18,000 ఎక్కువ.

కొత్త బజాజ్ అవెంజర్ స్ట్రీట్ 220లో కంపెనీ ఇప్పటికే అవెంజర్ క్రూయిజ్ 220లో ఉపయోగిస్తున్న అదే 220cc ఎయిర్/ఆయిల్-కూల్డ్ ఇంజన్‌ను అందించింది. సింగిల్-సిలిండర్‌తో పనిచేసే ఈ ఇంజన్ 8,500 rpm వద్ద 19 bhp శక్తిని, 7,000 rpm వద్ద 17.6 Nm గరిష్ట టార్క్‌ను ఉత్పత్తి చేస్తుంది. నగర ప్రయాణాలతో పాటు హైవే రైడింగ్‌కు కూడా అనుకూలంగా ఉండేలా దీనికి 5-స్పీడ్ గేర్‌బాక్స్‌ను జత చేశారు.

ఈ ఇంజన్ ఇప్పటికే అవెంజర్ క్రూయిజ్ 220లో తన పనితీరును నిరూపించుకున్నందున, కొత్త స్ట్రీట్ 220 నుంచి అదే స్థాయి పనితీరు ఆశించవచ్చు. డిజైన్, కలర్ ఆప్షన్ల విషయానికి వస్తే, బజాజ్ కొత్త స్ట్రీట్ 220ను ఎబోనీ బ్లాక్, కాక్‌టెయిల్ వైన్ రెడ్ అనే రెండు రంగుల్లో విడుదల చేసింది. ఆసక్తికరమైన విషయం ఏమిటంటే, గతంలో విక్రయించిన అవెంజర్ స్ట్రీట్ 160 కూడా ఇదే కలర్ ఆప్షన్లలో అందుబాటులో ఉండేది.

దీంతో స్ట్రీట్ సిరీస్‌కు ఉన్న ప్రత్యేక గుర్తింపును కంపెనీ కొనసాగించింది. మరోవైపు, మరింత క్లాసిక్ క్రూయిజర్ లుక్ కోరుకునే వారి కోసం అవెంజర్ క్రూయిజ్ 220ను మూన్ వైట్, అన్‌బర్న్ట్ బ్లాక్ అనే ప్రత్యేక రంగుల్లో విక్రయిస్తున్నారు. ఈ రంగులు క్రూయిజ్ మోడల్‌కు మరింత ప్రీమియం,టూరింగ్ బైక్ ఫీల్‌ను అందిస్తాయి. మొత్తంగా, కొత్త అవెంజర్ స్ట్రీట్ 220లో బజాజ్ పనితీరు, స్టైలింగ్ మధ్య మంచి సమతుల్యతను అందించే ప్రయత్నం చేసింది.