రూ.97 వేలకే 200కిమీ రేంజ్ ఇచ్చే స్కూటర్లు.. మధ్య తరగతి వారి కోసం టాప్ 5 ఎలక్ట్రిక్ స్కూటర్లు ఇవే

భారతదేశంలో ఎలక్ట్రిక్ వాహనాల హవా రోజురోజుకు పెరిగిపోతుంది. ముఖ్యంగా పెట్రోల్ ధరలు ఆకాశాన్నంటుతున్న ఈ సమయంలో సామాన్యులు ఇప్పుడు ఎలక్ట్రిక్ స్కూటర్ల వైపు వేగంగా మొగ్గు చూపుతున్నారు. ఒకప్పుడు ఈవీ స్కూటర్ అంటే ఖరీదైన వాహనం అనుకునేవారు. కానీ ఇప్పుడు పరిస్థితి పూర్తిగా మారిపోయింది. రూ. లక్షలోపే మంచి రేంజ్, మంచి ఫీచర్లు, స్టైలిష్ డిజైన్‌తో స్కూటర్లు మార్కెట్లోకి వచ్చేస్తున్నాయి.

ఇప్పటికే బజాజ్, టీవీఎస్, ఓలా, హోండా వంటి కంపెనీలు మధ్యతరగతి ప్రజలను టార్గెట్ చేస్తూ బడ్జెట్ ఫ్రెండ్లీ ఎలక్ట్రిక్ స్కూటర్లను విడుదల చేస్తున్నాయి. ముఖ్యంగా రోజూ ఆఫీసులకు వెళ్లేవారు, డెలివరీ ఉద్యోగులు, కాలేజీ స్టూడెంట్లు ఇప్పుడు పెట్రోల్ బండ్లను పక్కనపెట్టి ఈవీలను ఎంచుకుంటున్నారు. మీరు కూడా కొత్త స్కూటర్ కొనాలని ప్లాన్ చేస్తుంటే, లక్ష రూపాయల బడ్జెట్‌లో టాప్-5 బెస్ట్ ఆప్షన్స్ ఇక్కడ ఉన్నాయి.

1. బజాజ్ చేతక్ 2903:
బజాజ్ కంపెనీ తన ఐకానిక్ చేతక్‎ను ఎలక్ట్రిక్ రూపంలో అద్భుతంగా తీర్చిదిద్దింది. ఇందులో బడ్జెట్ ఫ్రెండ్లీ మోడల్ అయిన చేతక్ 2903 ఎక్స్-షోరూమ్ ధర రూ.98,498గా ఉంది. ఇందులో 2.9kWh సామర్థ్యం గల బ్యాటరీని అమర్చారు. ఇది ఒక్కసారి ఛార్జ్ చేస్తే 123 కిలోమీటర్ల రేంజ్ ఇస్తుంది. కేవలం 4 గంటల్లోనే 80 శాతం ఛార్జింగ్ పూర్తి చేసుకునే ఈ స్కూటర్, గంటకు 63 కి.మీ గరిష్ట వేగంతో ప్రయాణిస్తుంది. హిల్ హోల్డ్ అసిస్ట్, స్మార్ట్‌ఫోన్ కనెక్టివిటీ, ఎకో, స్పోర్ట్ అనే రెండు రైడ్ మోడ్స్ దీని ప్రత్యేకత.

2. ఓలా S1 X సిరీస్:
ఎలక్ట్రిక్ స్కూటర్ల మార్కెట్లో ఓలా ఒక విప్లవాన్నే సృష్టించింది. ముఖ్యంగా రూ.64,999 నుంచే ప్రారంభమయ్యే ఓలా S1 X మోడల్స్ అందరినీ ఆకట్టుకుంటున్నాయి. ఇందులో మూడు వేరియంట్లు ఉన్నాయి. 2kWh వెర్షన్ 95 కి.మీ రేంజ్ ఇస్తుండగా, 3kWh వెర్షన్ 151 కి.మీ రేంజ్ ఇస్తుంది. ఇక హై-ఎండ్ వేరియంట్ అయిన 4kWh మోడల్ ధర రూ. 97,499 కాగా, ఇది ఏకంగా 193 కిలోమీటర్ల సర్టిఫైడ్ రేంజ్‌తో దూసుకుపోతుంది. తక్కువ ధరలో ఎక్కువ మైలేజ్ కోరుకునే వారికి ఇది బెస్ట్ ఆప్షన్.

3. టీవీఎస్ ఐక్యూబ్:
నమ్మకమైన బ్రాండ్ కావాలనుకునే వారికి టీవీఎస్ ఐక్యూబ్ (TVS iQube) సరైన ఎంపిక. దీని బేస్ మోడల్ (2.2kWh) ఎక్స్-షోరూమ్ ధర రూ.89,999. ఇది ఒక్కసారి ఛార్జ్ చేస్తే 75 కిలోమీటర్ల వరకు ప్రయాణించే వీలు కల్పిస్తుంది. కేవలం 2 గంటల 45 నిమిషాల్లోనే 80 శాతం ఛార్జింగ్ పూర్తి కావడం దీని ప్లస్ పాయింట్. టైటానియం గ్రే, పెర్ల్ వైట్ వంటి ఆకర్షణీయమైన రంగుల్లో లభించే ఈ స్కూటర్, పట్టణ ప్రాంతాల్లో రోజువారీ ప్రయాణాలకు ఎంతో అనుకూలంగా ఉంటుంది.

4. హోండా QC1:
హోండా నుంచి వచ్చిన QC1 ఎలక్ట్రిక్ స్కూటర్ మార్కెట్లో గట్టి పోటీనిస్తోంది. దీని ధర రూ.90,000 (ఎక్స్-షోరూమ్). ఇందులో 1.5kWh బ్యాటరీ, 1.8kW మోటార్ కలవు. ఇది గంటకు 50 కిలోమీటర్ల వేగంతో వెళ్తూ, సింగిల్ ఛార్జ్‌పై 80 కిలోమీటర్ల రేంజ్ ఇస్తుంది. బ్యాటరీ పూర్తిగా ఛార్జ్ కావడానికి సుమారు 6 గంటల 50 నిమిషాలు పడుతుంది. హోండా బ్రాండ్ విలువ, బిల్డ్ క్వాలిటీ కోరుకునే వారికి ఇది మంచి ఎంపిక.

5. ఓలా రోడ్‌స్టర్ X:
మీకు స్కూటర్ కంటే బైక్ అంటేనే ఇష్టమైతే, ఓలా రోడ్‌స్టర్ X సిద్ధంగా ఉంది. దీని ప్రారంభ ధర రూ.84,999. ఇందులో 2.5kWh బ్యాటరీ వెర్షన్ 140 కి.మీ రేంజ్ ఇస్తుంది. అలాగే రూ.94,999 ధర కలిగిన 3.5kWh బ్యాటరీ వెర్షన్ ఏకంగా 196 కిలోమీటర్ల సర్టిఫైడ్ రేంజ్‌తో వస్తోంది. దీని డెలివరీలు మే 2025లో ప్రారంభం కానున్నాయి. స్పోర్టీ లుక్, హై-రేంజ్ కలిగిన ఈ ఎలక్ట్రిక్ మోటార్ సైకిల్ యువతను విశేషంగా ఆకర్షిస్తోంది.