ఇండియాలో ఆఫీసులకు సెట్ అయ్యే బెస్ట్ బైక్స్.. రోజూ 50-100 కి.మీ ఈజీగా తిరగొచ్చు!

భారతదేశంలో రోజూ ఆఫీసులకు వెళ్లే ఉద్యోగులు ఎక్కువగా మైలేజ్, తక్కువ నిర్వహణ ఖర్చు, సౌకర్యవంతమైన రైడింగ్ అనుభవం కలిగిన బైక్‌లను ఎంచుకుంటారు. ఈ విషయంలో 125cc సెగ్మెంట్‌కు ప్రత్యేక స్థానం ఉంది. ఎందుకంటే ఇవి 100cc బైక్‌ల కంటే మెరుగైన పనితీరును అందిస్తూనే, ఇంధన పొదుపులో కూడా ఆకట్టుకుంటాయి. ప్రస్తుతం ఈ సెగ్మెంట్‌లో హీరో సూపర్ స్ప్లెండర్, హోండా షైన్ 125, టీవీఎస్ రైడర్ 125 అత్యంత ప్రజాదరణ పొందిన మోడళ్లుగా ఉన్నాయి. రోజు ఆఫీసులకు ప్రయాణించే వారికి ఇవి మంచి విలువను అందించే బైక్‌గా చెప్పవచ్చు. ఇప్పుడు వీటి ధర, మైలేజ్ ఇతర వివరాలు ఒకసారి చూద్దాం.

హీరో సూపర్ స్ప్లెండర్: ఉద్యోగులకు అత్యంత నమ్మకమైన బైక్‌లలో సూపర్ స్ప్లెండర్ ఒకటి. ప్రతిరోజూ ఆఫీసులకు వెళ్లే వారికి ఇది ఒక బెస్ట్ ఛాయిస్‌. దీనికి ప్రధాన కారణం 124.7 సీసీ సామర్థ్యం గల విశ్వసనీయమైన ఇంజిన్, తక్కువ నిర్వహణ ఖర్చులు, అద్భుతమైన మైలేజ్. ఎలాంటి ఆర్భాటాలకు పోకుండా, అవసరమైన పనితీరు, మన్నికను అందించడంలో ఈ బైక్ ఎప్పుడూ ముందుంటుంది. ప్రస్తుతం దీని ఎక్స్-షోరూమ్ ధర రూ.81,068 నుంచి ప్రారంభమవుతోంది.

ఇంధన సామర్థ్యం విషయంలో కూడా సూపర్ స్ప్లెండర్ ఆకట్టుకుంటుంది. ఇది లీటరుకు దాదాపు 68 కిలోమీటర్ల వరకు మైలేజ్‌ను అందిస్తూ రోజువారీ ప్రయాణ ఖర్చులను గణనీయంగా తగ్గిస్తుంది. ముఖ్యంగా హీరో అందించే i3S (Idle Stop-Start System) టెక్నాలజీ ట్రాఫిక్ సిగ్నల్స్ లేదా ఎక్కువసేపు ఆగాల్సిన సందర్భాల్లో ఇంజిన్‌ను ఆటోమేటిక్‌గా ఆపివేసి, క్లచ్ నొక్కగానే మళ్లీ స్టార్ట్ చేస్తుంది. దీంతో అనవసరంగా ఇంధనం వృథా కాకుండా ఆదా అవుతుంది.

టీవీఎస్ రైడర్ 125: ఇది యువతతో పాటు ప్రతిరోజూ ఆఫీసుకు వెళ్లే ఉద్యోగులను కూడా ఆకట్టుకుంటున్న ప్రముఖ 125సీసీ బైక్. దీని ప్రారంభ ఎక్స్-షోరూమ్ ధర రూ.82,810 కాగా, లీటరుకు 55 నుంచి 60 కిలోమీటర్ల వరకు మైలేజీని అందిస్తుంది. మైలేజ్, పనితీరు, ఫీచర్ల కలయికతో ఈ బైక్ తన సెగ్మెంట్‌లో ప్రత్యేక గుర్తింపు సంపాదించుకుంది. డిజైన్ పరంగా చూస్తే, రోబోటిక్ స్టైల్ ఎల్ఈడీ హెడ్‌లైట్ కొత్త లుక్‌ను అందిస్తుంది.

శక్తివంతమైన ఇంజిన్ కారణంగా నగర ట్రాఫిక్‌లో వేగంగా స్పందిస్తూ చురుకైన రైడింగ్ అనుభూతిని అందిస్తుంది. దీంతో రోజువారీ ప్రయాణాలు సౌకర్యవంతంగా ఉంటుంది. ఫీచర్ల విషయానికి వస్తే, ఎకో, పవర్ అనే రెండు రైడింగ్ మోడ్‌లు, బ్లూటూత్ కనెక్టివిటీ, పూర్తి డిజిటల్ ఇన్‌స్ట్రుమెంట్ క్లస్టర్, టర్న్-బై-టర్న్ నావిగేషన్ వంటి ఆధునిక సదుపాయాలు ఇందులో ఉన్నాయి. అందువల్ల మైలేజ్‌తో పాటు స్టైల్, టెక్నాలజీ, పనితీరు కూడా కోరుకునే వారికి ఇది బెస్ట్.

హోండా షైన్ 125: హోండా షైన్ 125 భారత మార్కెట్లో అత్యంత ప్రజాదరణ పొందిన 125సీసీ కమ్యూటర్ బైక్‌లలో ఒకటి. దీని ప్రారంభ ఎక్స్-షోరూమ్ ధర రూ.81,502 కాగా, 124సీసీ eSP ఇంజిన్‌తో వస్తుంది. ఈ ఇంజిన్ స్మూత్ పనితీరును అందించడమే కాకుండా, లీటరుకు సుమారు 60 నుంచి 65 కిలోమీటర్ల వరకు మైలేజీని అందిస్తూ ఇంధన పొదుపులో కూడా ఆకట్టుకుంటుంది. డిజైన్ పరంగా హోండా షైన్ సింపుల్‌గా ఉంటుంది.

అయినా ప్రొఫెషనల్, క్లాసీ లుక్‌ను కలిగిస్తుంది. అందువల్ల యువతతో పాటు ఉద్యోగులు, కుటుంబ వినియోగదారులను కూడా సమానంగా ఆకర్షిస్తుంది. ముఖ్యంగా దీని ఇంజిన్ పనితీరు చాలా నిశ్శబ్దంగా ఉండటంతో రోజువారీ ప్రయాణాల్లో సౌకర్యవంతమైన రైడింగ్ అనుభూతిని అందిస్తుంది. అంతేకాకుండా మార్కెట్లో ఈ బైక్‌కు మంచి రీసేల్ విలువ కూడా ఉంది. సౌకర్యవంతమైన రైడింగ్ అనుభవం కారణంగా ఆఫీసుకు వెళ్లే ఉద్యోగులకు హోండా షైన్ 125 అత్యుత్తమ ఎంపికలలో ఒకటిగా నిలుస్తోంది.