12 లక్షల మందిని ఫిదా చేసిన డుగ్ డుగ్ బండి.. బ్రెజిల్ నుంచి బీహార్ వరకు దీనిదే హవా

రాయల్ ఎన్‌ఫీల్డ్ అంటే కేవలం ఒక బైక్ మాత్రమే కాదు, అదొక ఎమోషన్. ఈ విషయాన్ని మరోసారి నిరూపిస్తూ.. 2025-26 ఆర్థిక సంవత్సరంలో కంపెనీ సంచలన విజయాన్ని నమోదు చేసింది. గత ఆర్థిక సంవత్సరంలో మొత్తం 12,38,659 యూనిట్లను విక్రయించి, అంతకుముందు ఏడాదితో పోలిస్తే ఏకంగా 23 శాతం వృద్ధిని సాధించింది. 2024-25లో ఈ సంఖ్య 10,09,900గా ఉండేది. కేవలం ఏడాది కాలంలోనే అదనంగా రెండు లక్షలకు పైగా బైకులను రోడ్లపైకి తెచ్చి తన సత్తా చాటింది.

గ్లోబల్ మార్కెట్‌లో కింగ్..హిమాలయన్ 450
ఈ భారీ విజయానికి ప్రధాన కారణం హిమాలయన్ 450. ఈ అడ్వెంచర్ బైక్ కేవలం ఇండియాలోనే కాకుండా విదేశాల్లోనూ ప్రకంపనలు సృష్టిస్తోంది. ఈ ఆర్థిక సంవత్సరంలో ఈ ఒక్క మోడల్ అమ్మకాలే 38 వేల యూనిట్లకు పైగా నమోదయ్యాయి. అంతర్జాతీయ మార్కెట్లలో హిమాలయన్ సేల్స్ ఏకంగా 53 శాతం వృద్ధిని నమోదు చేయడం విశేషం. బ్రెజిల్ వంటి దేశాల్లో తన కేటగిరీలో ఈ బైక్ ఇప్పుడు తిరుగులేని లీడర్‌గా ఎదిగింది. సాహసయాత్రలు ఇష్టపడే కుర్రకారుకు ఇది ఫేవరెట్ ఛాయిస్‌గా మారింది.

350 సీసీ సెగ్మెంట్‌దే హవా
ఎన్ని కొత్త మోడల్స్ వచ్చినా, రాయల్ ఎన్‌ఫీల్డ్ క్లాసిక్ లుక్‌కు ఉండే క్రేజే వేరు. ముఖ్యంగా 350 సీసీ లోపు ఉన్న మోడల్స్ (క్లాసిక్ 350, బుల్లెట్ 350, హంటర్ 350, మిటియోర్ 350) కంపెనీ అమ్మకాల్లో సింహభాగం వహిస్తున్నాయి. ఈ ఏడాది 350 సీసీ సెగ్మెంట్‌లో 10,87,051 యూనిట్లు అమ్ముడయ్యాయి. అంటే దాదాపు 25 శాతం పెరుగుదల అన్నమాట. మధ్యతరగతి బైక్ ప్రియులు ఇప్పటికీ హంటర్ 350, క్లాసిక్ 350 వైపే మొగ్గు చూపుతున్నారని ఈ గణాంకాలు చెబుతున్నాయి.

మార్చి నెలలోనూ మాస్ పర్ఫార్మెన్స్
కేవలం ఏడాది మొత్తమే కాదు, 2026 మార్చి నెలలో కూడా రాయల్ ఎన్‌ఫీల్డ్ తన జోరును కొనసాగించింది. మార్చి నెలలో మొత్తం 1,12,334 యూనిట్ల విక్రయాలు జరిగాయి. గత ఏడాది ఇదే నెలలో జరిగిన 1,01,021 యూనిట్ల అమ్మకాలతో పోలిస్తే ఇది 11 శాతం ఎక్కువ. స్థానిక మార్కెట్‌లో (ఇండియాలో) కంపెనీ పట్టు క్రమంగా పెరుగుతోంది. ఎగుమతుల్లో స్వల్ప హెచ్చుతగ్గులు ఉన్నప్పటికీ, ఓవరాల్‌గా గ్లోబల్ బ్రాండ్‌గా ఎన్‌ఫీల్డ్ ఎదుగుదల ఆగడం లేదు.

పెద్ద బైకులపై పెరుగుతున్న మక్కువ
350 సీసీ పైన ఉండే శక్తివంతమైన బైకుల సెగ్మెంట్‌లో కూడా కంపెనీ స్థిరమైన వృద్ధిని కనబరిచింది. సూపర్ మిటియోర్ 650, ఇంటర్సెప్టర్ 650 వంటి మోడల్స్ ఈ విభాగంలో ఉన్నాయి. ఈ సెగ్మెంట్‌లో ఏడాది మొత్తం మీద 1,51,608 యూనిట్లు అమ్ముడయ్యాయి. గతేడాదితో పోలిస్తే ఇందులో 7 శాతం వృద్ధి నమోదైంది. కేవలం సిటీ రైడింగ్ మాత్రమే కాకుండా, లాంగ్ టూరింగ్ చేసే వారి సంఖ్య పెరగడం ఈ విభాగం వృద్ధికి దోహదపడింది.

త్వరలో రాబోతున్న ఎలక్ట్రిక్ బుల్లెట్
భవిష్యత్తు అవసరాలకు అనుగుణంగా రాయల్ ఎన్‌ఫీల్డ్ ఇప్పుడు ఎలక్ట్రిక్ వాహన రంగంలోకి అడుగుపెట్టేందుకు సిద్ధమైంది. హిమాలయన్ మోడల్‌పై ఆధారపడిన ఎలక్ట్రిక్ బైక్ (EV) ప్రస్తుతం టెస్టింగ్ దశలో ఉంది. త్వరలోనే ఇది మార్కెట్లోకి వచ్చే అవకాశం ఉంది. పెట్రోల్ బైకుల శబ్దం, పవర్ ఇష్టపడే అభిమానులు ఈ ఎలక్ట్రిక్ వెర్షన్‌ను ఎలా రిసీవ్ చేసుకుంటారో చూడాలి. కానీ, పర్యావరణ హితమైన ప్రయాణం కోసం కంపెనీ చేస్తున్న ఈ ప్రయత్నం ప్రశంసనీయం.