కార్ రేంజ్ ఫీచర్లు..రోడ్డు మీద ఈ స్కూటర్ వెళ్తుంటే కళ్లు తిప్పుకోలేరు..స్టైల్ చూస్తే దిమ్మతిరగాల్సిందే

యువతను ఆకట్టుకోవడంలో ముందుండే హోండా డియో ఇప్పుడు సరికొత్త హంగులతో మన ముందుకు వచ్చేస్తోంది. 125cc సెగ్మెంట్‌లో అప్పటికే క్రేజ్ సంపాదించుకున్న హోండా డియో 125, ఇప్పుడు మరింత స్టైలిష్‌గా X ఎడిషన్ రూపంలో ఆవిష్కృతమైంది. త్వరలోనే మార్కెట్లోకి విడుదల కానున్న ఈ స్కూటర్, కేవలం లుక్ పరంగానే కాకుండా టెక్నాలజీ పరంగా కూడా అదిరిపోయే అప్‌డేట్స్‌ను మోసుకొస్తోంది.

హోండా మోటార్‌సైకిల్ అండ్ స్కూటర్ ఇండియా (HMSI) తన అత్యంత ప్రజాదరణ పొందిన డియో సిరీస్‌లో మరో సంచలన మార్పుకు శ్రీకారం చుట్టింది. 125cc స్కూటర్ల విభాగంలో ఇప్పటికే మంచి మార్కెట్ ఉన్న డియోను మరింత స్పోర్టీగా మార్చుతూ హోండా డియో 125 X ఎడిషన్ (Honda Dio 125 X Edition)ను ఆవిష్కరించింది. ఈ స్పెషల్ ఎడిషన్ స్కూటర్ త్వరలోనే షోరూమ్‌లలో సందడి చేయనుంది. ముఖ్యంగా కాలేజీ వెళ్లే యువతను, సిటీ రైడర్లను దృష్టిలో ఉంచుకుని దీని డిజైన్‌ను రూపొందించారు.

డియో 125 X ఎడిషన్ చూడగానే ఆకట్టుకునేలా డ్యూయల్ టోన్ బాడీ ఫినిషింగ్‌తో వస్తోంది. బ్లూ, సిల్వర్ కలర్ కాంబినేషన్‌లో వచ్చే ఈ స్కూటర్, రెగ్యులర్ మోడల్ కంటే చాలా భిన్నంగా కనిపిస్తుంది. బాడీ ప్యానెల్స్, ఫ్రంట్ ఏప్రాన్‌పై ఉన్న X ఎడిషన్ గ్రాఫిక్స్ దీనికి మరింత దూకుడును ఇచ్చాయి. వీటన్నింటికీ తోడు, ఆరెంజ్ కలర్ అల్లాయ్ వీల్స్ ఈ స్కూటర్ స్పోర్టీ లుక్‌ను రెట్టింపు చేస్తున్నాయి. ఇది చూడటానికి హై-ఎండ్ స్పోర్ట్స్ బైక్ లాంటి అనుభూతిని ఇస్తుంది.

ఈ కొత్త ఎడిషన్‌లో అతిపెద్ద మార్పు ఏంటంటే TFT ఇన్‌స్ట్రుమెంట్ క్లస్టర్. పూర్తిగా డిజిటల్ రూపంలో ఉండే ఈ డిస్‌ప్లే ద్వారా స్పీడోమీటర్, ఓడోమీటర్, ట్రిప్ మీటర్లతో పాటు రియల్ టైమ్ ఇంధన సమాచారాన్ని కూడా తెలుసుకోవచ్చు. స్మార్ట్‌ఫోన్ కనెక్టివిటీ ఫీచర్ కూడా ఉండే అవకాశం ఉంది, దీనివల్ల కాల్/SMS అలర్ట్స్ మీ మీటర్ మీదనే చూడొచ్చు. ఇక మొబైల్ ఛార్జింగ్ కోసం గ్లోవ్ బాక్స్‌లో USB టైప్-సి పోర్ట్, బయటి నుంచే పెట్రోల్ కొట్టించుకునే విధంగా ఎక్స్‌టర్నల్ ఫ్యూయల్ ఫిల్లర్ వంటి ఫీచర్లు రైడర్ల సౌకర్యాన్ని పెంచుతాయి.

పవర్ విషయంలో హోండా ఎక్కడా వెనక్కి తగ్గలేదు. ఇందులో 123.92 cc, సింగిల్-సిలిండర్, ఎయిర్-కూల్డ్ ఇంజిన్ ఉంది. ఇది హోండా అత్యాధునిక PGM-FI (ప్రోగ్రామ్డ్ ఫ్యూయల్ ఇంజెక్షన్) టెక్నాలజీతో వస్తుంది. ఇది 6,500 rpm వద్ద 8.30 PS పవర్‌ను, 5,000 rpm వద్ద 10.5 Nm గరిష్ట టార్క్‌ను ఉత్పత్తి చేస్తుంది. అంటే సిటీ ట్రాఫిక్‌లో దూసుకుపోవడానికి ఇది పక్కా సరిపోతుంది.

పెట్రోల్ ధరలు మండిపోతున్న ఈ రోజుల్లో మైలేజీ చాలా ముఖ్యం. అందుకే హోండా ఇందులో ఐడ్లింగ్ స్టాప్ సిస్టమ్‎ను ఇచ్చింది. ట్రాఫిక్ సిగ్నల్ దగ్గర స్కూటర్ ఆగగానే ఆటోమేటిక్‌గా ఇంజిన్ ఆఫ్ అయిపోతుంది, మళ్లీ థ్రోటిల్ ఇవ్వగానే స్టార్ట్ అవుతుంది. దీనివల్ల ఇంధనం ఆదా అవుతుంది. సేఫ్టీ కోసం సైడ్ స్టాండ్ వేసి ఉన్నప్పుడు ఇంజిన్ స్టార్ట్ అవ్వకుండా ఉండే సైడ్-స్టాండ్ ఇంజిన్ కట్-ఆఫ్ ఫీచర్ కూడా ఇందులో ఉంది.

ఇక బ్రేకింగ్ విషయానికి వస్తే ముందు భాగంలో డిస్క్ బ్రేక్, టెలిస్కోపిక్ సస్పెన్షన్ ప్రయాణాన్ని సాఫీగా చేస్తాయి. దీని ధర రెగ్యులర్ మోడల్ కంటే కొంచెం ఎక్కువగా ఉండే అవకాశం ఉంది (సుమారు రూ.93,000 ఎక్స్-షోరూమ్). త్వరలోనే హోండా డీలర్‌షిప్‌ల వద్ద బుకింగ్స్ ప్రారంభం కానున్నాయి.

అదే సమయంలో టాటా మోటార్స్ కూడా తన ఐకానిక్ సియెర్రా (Tata Sierra)ను ROQ ఎడిషన్ పేరుతో సరికొత్త అవతారంలో చూపిస్తోంది. ఆఫ్‌రోడ్ ప్రియుల కోసం రూ.లక్ష అదనపు ప్యాకేజీతో రూఫ్ ర్యాక్, ఫోల్డబుల్ నిచ్చెన, మ్యాట్ బ్లాక్ క్లాడింగ్‌తో ఇది మరింత రఫ్ అండ్ టఫ్ లుక్‌లో వస్తోంది. దీనితో పాటు పిక్నిక్ సీట్లు, ఆండ్రాయిడ్ కనెక్టివిటీ వంటి ఫీచర్లు దీనిని ఒక అడ్వెంచర్ వాహనంగా మార్చాయి.