పదే పదే ఇక క్లచ్ నొక్కాల్సిన అవసరం లేదు..హోండా తెచ్చిన ఈ కొత్త బైక్ చూస్తే ఫిదా అవ్వాల్సిందే!

భారతీయ బైక్ లవర్స్ కోసం హోండా మోటార్‌సైకిల్స్ అండ్ స్కూటర్స్ ఇండియా ఒక అద్భుతమైన వార్తను తీసుకొచ్చింది. తన పాపులర్ అడ్వెంచర్ టూరర్ మోడల్ NX500ను సరికొత్త ఈ-క్లచ్(E-Clutch) టెక్నాలజీతో మార్కెట్లోకి విడుదల చేసింది. క్లచ్‌తో పనిలేకుండా గేర్లు మార్చుకునే వెసులుబాటు కల్పించే ఈ టెక్నాలజీ బైక్ రైడింగ్ అనుభవాన్ని పూర్తిగా మార్చేయనుంది. దేశవ్యాప్తంగా ఉన్న హోండా బిగ్ వింగ్ షోరూమ్‌లలో ఈ బైక్ బుకింగ్‌లు ఇప్పటికే ప్రారంభమయ్యాయి.

ఏమిటీ ఈ ఈ-క్లచ్ మ్యాజిక్ ?
బైక్ నడిపేటప్పుడు ముఖ్యంగా ట్రాఫిక్‌లో క్లచ్ పదే పదే నొక్కడం వల్ల రైడర్లు త్వరగా అలసిపోతుంటారు. దీనికి పరిష్కారంగా హోండా ఈ ఆటోమేటిక్ క్లచ్ వ్యవస్థను తెచ్చింది. బైక్ స్టార్ట్ చేసేటప్పుడు, ఆపేటప్పుడు లేదా గేర్లు మార్చేటప్పుడు రైడర్ క్లచ్ లివర్‌ను తాకాల్సిన అవసరం లేదు.

అంతా కంప్యూటరైజ్డ్ సిస్టమ్ ద్వారా ఆటోమేటిక్‌గా జరుగుతుంది. ఒకవేళ రైడర్‌కు మ్యాన్యువల్‌గా క్లచ్ వాడాలని అనిపిస్తే, ఎప్పుడైనా సరే లివర్‌ను నొక్కి నియంత్రణలోకి తీసుకోవచ్చు. ఈ అదనపు టెక్నాలజీ వల్ల బైక్ బరువు కేవలం ఐదు కిలోలు మాత్రమే పెరిగింది.

ధర, లభ్యత
ఈ సరికొత్త హోండా NX500 ఈ-క్లచ్ మోడల్ ధరను కంపెనీ రూ.7,43,900 (ఎక్స్-షోరూమ్)గా నిర్ణయించింది. అడ్వెంచర్, లాంగ్ జర్నీలను ఇష్టపడే వారికి ఈ ధరలో ఇది ఒక ప్రీమియం ఎంపికగా నిలవనుంది. దేశవ్యాప్తంగా ఉన్న హోండా ప్రీమియం డీలర్‌షిప్‌ల ద్వారా వినియోగదారులు తమ బైక్‌ను బుక్ చేసుకోవచ్చు. నగర ప్రయాణాల్లోనూ, సుదూర హైవే ట్రిప్పుల్లోనూ ఇది రైడర్ అలసటను భారీగా తగ్గిస్తుందని కంపెనీ చెబుతోంది.

పవర్ఫుల్ ఇంజిన్, పర్ఫామెన్స్
ఈ బైక్ లో 471సీసీ, లిక్విడ్-కూల్డ్, ప్యారలల్-ట్విన్ ఇంజిన్‌ను అమర్చారు. ఇది 8,600 ఆర్పీఎం వద్ద 46.9 బీహెచ్‌పీ శక్తిని, 6,500 ఆర్పీఎం వద్ద 43 ఎన్ఎమ్ టార్క్‌ను ఉత్పత్తి చేస్తుంది. ఆరు గేర్ల బాక్స్‌తో వచ్చే ఈ ఇంజిన్, తక్కువ, మధ్యస్థ వేగాల్లో అద్భుతమైన టార్క్‌ను అందిస్తుంది. దీనివల్ల కొండ ప్రాంతాల్లో లేదా బురద రోడ్లపై ప్రయాణించడం ఎంతో సులభమవుతుంది.

అత్యాధునిక టెక్నాలజీ, డిజైన్
హోండా NX500 కేవలం ఇంజిన్ పరంగానే కాకుండా ఫీచర్ల పరంగా కూడా టాప్ క్లాస్‌లో ఉంది. ఇందులో 5 అంగుళాల పూర్తి రంగుల టీఎఫ్ టీ డిస్‌ప్లే ఉంది. దీనికి హోండా రోడ్ సింక్ ద్వారా మీ ఫోన్‌ను కనెక్ట్ చేసుకోవచ్చు. తద్వారా నావిగేషన్, కాల్స్, మ్యూజిక్ వంటివి స్క్రీన్ మీదే చూసుకోవచ్చు. సేఫ్టీ కోసం డ్యూయల్ ఛానల్ ఏబీఎస్, హోండా సెలెక్టబుల్ టార్క్ కంట్రోల్ (HSTC) వంటి ఫీచర్లు కూడా ఉన్నాయి.

మరిన్ని మెకానికల్ విశేషాలు
ఈ అడ్వెంచర్ బైక్ స్టీల్ డైమండ్ ఫ్రేమ్‌పై నిర్మించబడింది. ముందు భాగంలో షోవా యూఎస్‌డీ ఫోర్కులు, వెనుక ప్రిలోడ్ అడ్జస్టబుల్ మోనోషాక్ సస్పెన్షన్ ఉన్నాయి. ముందు 19 అంగుళాలు, వెనుక 17 అంగుళాల చక్రాలతో ఇది ఎలాంటి కఠినమైన దారులనైనా సులభంగా దాటేస్తుంది.

ఎల్‌ఈడీ లైటింగ్ బైక్ కు మరింత ప్రీమియం లుక్‌ను ఇస్తుంది. సిటీ ట్రాఫిక్‌లో తిరిగే వారికి, అడ్వెంచర్ ఇష్టపడే వారికి హోండా NX500 ఒక పర్ఫెక్ట్ ప్యాకేజీ అని చెప్పవచ్చు. ఈ కొత్త టెక్నాలజీ ఇండియాలో హోండా మార్కెట్‌ను మరో స్థాయికి తీసుకెళ్లడం ఖాయంగా కనిపిస్తోంది.