వీటిని మించిన బైక్‌లు దొరకడం కష్టం.. 15 ఏళ్లు ఈజీగా వాడొచ్చు.. లీటరుకు 65-90 కిమీ మైలేజ్!

ఇంధన ధరలు పెరుగుతున్న ఈ రోజుల్లో, ఎక్కువ మైలేజీ అందించే బైక్‌లకే భారతీయులు అధిక ప్రాధాన్యం ఇస్తున్నారు. ముఖ్యంగా రోజువారీ ప్రయాణాల కోసం ఉపయోగించే 100cc సెగ్మెంట్ బైక్‌లు తక్కువ ఖర్చుతో ఎక్కువ దూరం ప్రయాణించే సామర్థ్యంతో ఇప్పటికీ మార్కెట్లో మంచి డిమాండ్‌ను కొనసాగిస్తున్నాయి. తక్కువ నిర్వహణ వ్యయం, నమ్మకమైన పనితీరు, అందుబాటు ధరలు వీటి ప్రధాన ఆకర్షణలు. హీరో స్ప్లెండర్ ప్లస్, హోండా షైన్ 100, బజాజ్ ప్లాటినా 100 బైక్‌లు, ఒక్క లీటర్ పెట్రోల్‌తో వీలైనంత ఎక్కువ మైలేజీ అందించేలా ప్రత్యేకంగా రూపొందించబడ్డాయి. దీంతో ఉద్యోగులు, విద్యార్థులు, రోజువారీ ప్రయాణికులకు ఇవి అత్యంత ప్రయోజనకరమైన ఎంపికలుగా నిలుస్తున్నాయి. ఈ కథనంలో ఈ మూడు బైకుల గురించి చూద్దాం.

హీరో స్ప్లెండర్ ప్లస్: నగరాల్లో ఉద్యోగానికి వెళ్లే ఉద్యోగుల నుంచి, కాలేజీలకు వెళ్లే విద్యార్థుల వరకు, గ్రామీణ ప్రాంతాల్లో రోజువారీ అవసరాల కోసం బైక్‌ను ఉపయోగించే వినియోగదారుల వరకు అన్ని వర్గాల ప్రజల్లో హీరో స్ప్లెండర్ ప్లస్‌కు ప్రత్యేక స్థానం ఉంది. ఇది రూ.77,500 ప్రారంభ ఎక్స్-షోరూమ్ ధరతో లభిస్తుంది. ఈ బైక్ లీటర్ పెట్రోల్‌కు సుమారు 65 నుంచి 70 కిలోమీటర్ల వరకు మైలేజీని అందించగలదు.

ఈ బైక్‌లో 97.2cc సామర్థ్యం గల ఇంజిన్‌ను అందించారు. సర్వీస్ ఖర్చులు తక్కువగా ఉండటం, విడిభాగాలు దేశవ్యాప్తంగా సులభంగా అందుబాటులో ఉండటం, నిర్వహణలో పెద్దగా ఖర్చు లేకపోవడం వంటి అంశాలు దీని డిమాండ్‌కు కారణాలు. పెరుగుతున్న పెట్రోల్ ధరల నేపథ్యంలో మైలేజీ పరంగా రోజువారీ ప్రయాణికులకు గణనీయమైన ఆదాను అందిస్తుంది. అందుకే ఎక్కువ దూరం ప్రయాణించే ఉద్యోగులు, చిన్న వ్యాపారులు, విద్యార్థులు ఈ బైక్‌ను ఎక్కువగా ఎంచుకుంటుంటారు.

హోండా షైన్ 100: భారత కమ్యూటర్ బైక్ మార్కెట్లో Honda ప్రవేశపెట్టిన హోండా షైన్ 100 చాలా తక్కువ కాలంలోనే తనకంటూ ప్రత్యేక గుర్తింపును సంపాదించుకుంది. రోజువారీ ప్రయాణాలకు అనువైన, తక్కువ ఖర్చుతో ఎక్కువ మైలేజీ అందించే బైక్ కోసం ఎదురుచూస్తున్న వినియోగదారులను లక్ష్యంగా చేసుకుని తీసుకొచ్చిన ఈ మోడల్, ప్రస్తుతం 100cc సెగ్మెంట్‌లో ప్రముఖ ఎంపికలలో ఒకటిగా మారింది.

ఈ బైక్‌లో 98.98cc సామర్థ్యం గల సింగిల్ సిలిండర్ ఇంజిన్‌ను అందించారు. హోండా ప్రత్యేకంగా అభివృద్ధి చేసిన ఈ ఇంజిన్, పనితీరు, ఇంధన పొదుపు మధ్య అద్భుతమైన సమతుల్యతను అందించేలా రూపొందించబడింది. సాధారణ రైడింగ్ పరిస్థితుల్లో ఈ బైక్ లీటర్ పెట్రోల్‌కు సుమారు 65 నుంచి 68 కిలోమీటర్ల వరకు మైలేజీని అందించగలదని కంపెనీ పేర్కొంటోంది. దీని ధర రూ.65,950 ప్రారంభ ఎక్స్-షోరూమ్ ధరతో అందుబాటులో ఉంది.

బజాజ్ ప్లాటినా 100: సుమారు రూ.68,000 ప్రారంభ ఎక్స్-షోరూమ్ ధరతో లభించే ఈ బైక్, తక్కువ బడ్జెట్‌లో ఎక్కువ ప్రయోజనాలు కోరుకునే వారికి మంచి ఎంపిక. ఈ బైక్‌లో 102cc సామర్థ్యం గల ఇంజిన్‌ను అందించారు. మైలేజీ విషయానికి వస్తే, ప్లాటినా 100 తన సెగ్మెంట్‌లో అత్యుత్తమ బైక్‌లలో ఒకటిగా నిలుస్తుంది. రైడింగ్ పరిస్థితులను బట్టి లీటర్ పెట్రోల్‌కు సుమారు 75 నుంచి 90 కిలోమీటర్ల వరకు మైలేజీని అందించగలదు.

అయితే ఈ బైక్ ప్రత్యేకత కేవలం మైలేజీ మాత్రమే కాదు. సౌకర్యవంతమైన సస్పెన్షన్ సెటప్, విశాలమైన సీటు కూడా ప్లాటినా 100కు మంచి పేరును తీసుకువచ్చాయి. రోజువారీ నగర ప్రయాణాల్లో గుంతలు, ఎత్తుపల్లాలు ఉన్న రోడ్లపై కూడా ఇది సౌకర్యవంతమైన రైడింగ్ అనుభవాన్ని అందిస్తుంది. అలాగే సుదూర ప్రయాణాల్లో కూడా రైడర్‌కు ఎక్కువ అలసట కలగకుండా ఉండేలా బైక్‌ను రూపొందించారు.