దేశమంతా మెచ్చిన బెస్ట్ స్కూటర్లు.. కళ్లు మూసుకుని కొనచ్చు, 10 ఏళ్లు ఢోకా లేకుండా వాడొచ్చు!

రోజువారీ జీవితంలో ఆఫీసుకు వెళ్లడం నుంచి షాపింగ్ వరకు, చిన్న చిన్న పనులు పూర్తి చేయడానికి ఒక సరైన స్కూటర్ ఉంటే ఎంత సౌకర్యంగా ఉంటుందో చెప్పాల్సిన అవసరం లేదు. ట్రాఫిక్‌లో ఈజీగా నడిపించగలగడం, పార్కింగ్ సమస్యలు తక్కువగా ఉండటం, అలాగే తక్కువ ఖర్చుతో ప్రయాణం పూర్తి చేయగలగడం, ఈ అన్ని కారణాల వల్ల స్కూటర్లు నగర జీవనంలో ముఖ్యమైన భాగంగా మారాయి. అయితే, మార్కెట్లో ఎన్నో ఆప్షన్లు ఉన్నప్పుడు సరైన స్కూటర్‌ను ఎంచుకోవడం కొంచెం కష్టంగా అనిపించొచ్చు. ముఖ్యంగా మైలేజ్, కంఫర్ట్, ధర మూడు అంశాల్లో సమతుల్యత ఉండే మోడల్‌ను ఎంచుకోవాలని ఎక్కువ మంది భావిస్తారు. ఇలాంటి అవసరాలను దృష్టిలో పెట్టుకుని చూస్తే, TVS జూపిటర్, హోండా యాక్టివా, సుజుకి యాక్సెస్ స్కూటర్లు మంచి ఎంపికలుగా నిలుస్తాయి. వాటి గురించి ఈ కింది కథణంలో.

Honda Activa 110: రోజువారీ ప్రయాణానికి నమ్మకంగా నిలిచే స్కూటర్లలో హోండా యాక్టివా పేరు ప్రత్యేకంగా చెప్పుకోవాలి. భారతదేశంలో సంవత్సరాలుగా అత్యధికంగా అమ్ముడవుతున్న స్కూటర్‌గా ఇది ఒక స్టాండర్డ్‌ను సెట్ చేసింది. ధర పరంగా కూడా ఇది అందుబాటులో ఉండే ఆప్షన్. ఎక్స్-షోరూమ్ ధరలు సుమారు రూ.76,581 నుంచి ప్రారంభమవుతుండటం వల్ల, మధ్యతరగతి కుటుంబాలకు సులభంగా చేరువవుతుంది. మెటల్ బాడీ నిర్మాణం దీనికి గట్టి మన్నికను ఇస్తుంది.

దీని 109.51 సిసి ఇంజన్ రోజువారీ ఆఫీస్ ప్రయాణాలకు సరిపడే స్థిరమైన పనితీరును అందిస్తుంది. ఇది 50 కి.మీ వరకు మైలేజీ ఇవ్వగలదు. ఇక ఫీచర్ల విషయంలో కూడా యాక్టివా ఇప్పుడు మరింత ఆధునికంగా మారింది. "స్మార్ట్ కీ" వంటి సదుపాయాలు దీనికి టెక్నాలజీ టచ్‌ను ఇస్తుండగా, సైలెంట్ స్టార్ట్ సిస్టమ్ రైడింగ్‌ను మరింత స్మూత్‌గా చేస్తుంది. టెలిస్కోపిక్ సస్పెన్షన్ కారణంగా రోడ్డు గుంతలు ఉన్నా ప్రయాణం కంఫర్ట్‌గా ఉంటుంది.

TVS Jupiter 110: రోజువారీ ఆఫీస్ ప్రయాణాలకు సౌకర్యం, మైలేజ్ రెండూ కావాలనుకునే వారికి టీవీఎస్ జూపిటర్ ఒక నమ్మకమైన ఎంపికగా నిలుస్తోంది. నగర ట్రాఫిక్‌లో సులభంగా నడిపించగలిగే హ్యాండ్లింగ్, కంఫర్టబుల్ రైడింగ్ అనుభవం కారణంగా ఇది చాలా మందికి ఫేవరెట్‌గా మారింది. ధర పరంగా కూడా ఇది అందుబాటులోనే ఉంటుంది. ఎక్స్-షోరూమ్ ధర సుమారు రూ.75,500 నుంచి మొదలవుతుంది.

అదే టాప్ వేరియంట్ వరకు రూ.89,350 వరకు ఉంటుంది. ఈ రేంజ్‌లో లభించే ఫీచర్లు, పనితీరు చూస్తే ఇది మంచి విలువను అందించే స్కూటర్‌గా చెప్పుకోవచ్చు. ఇందులో ఉన్న 113.3 సిసి ఇంజన్ నగర ప్రయాణాలకు సరిపోయే స్థిరమైన పనితీరును అందిస్తుంది. ముఖ్యంగా ట్రాఫిక్‌లో కూడా సులభంగా మేనేజ్ చేయగలగడం దీని ప్రత్యేకత. మైలేజ్ విషయానికి వస్తే, లీటరుకు సుమారు 50 నుంచి 55 కిలోమీటర్ల వరకు ఇవ్వగలగలదు.

Suzuki Access 125: ప్రస్తుతం భారత మార్కెట్లో సుజుకి యాక్సెస్ 125 ఒక బెస్ట్ స్కూటర్‌గా మంచి గుర్తింపు పొందుతోంది. ధర పరంగా చూస్తే, ఎంట్రీ-లెవల్ వేరియంట్ సుమారు రూ.82,106 నుంచి ప్రారంభమై, టాప్ వేరియంట్ వరకు రూ.1,02,301 (ఎక్స్-షోరూమ్) వరకు వెళుతుంది. ఈ విభిన్న ధరల శ్రేణి వల్ల వినియోగదారులు తమ బడ్జెట్‌కు అనుగుణంగా సరైన వేరియంట్‌ను ఎంచుకునే అవకాశం పొందుతారు.

పర్ఫార్మెన్స్ విషయంలో ఇందులో 124 సిసి పెట్రోల్ ఇంజిన్ అందించబడింది. మంచి ఇంజన్ ట్యూనింగ్ కారణంగా నగర ప్రయాణాల్లో స్మూత్ రైడింగ్ అనుభవాన్ని అందిస్తుంది. మైలేజ్ పరంగా లీటరుకు సుమారు 45 నుంచి 64 కిలోమీటర్ల వరకు ఇవ్వగలగడం వల్ల, రోజువారీ ప్రయాణాలకు ఇది ఆర్థికంగా ఉపయోగపడుతుంది. గరిష్టంగా గంటకు 95 కిలోమీటర్ల వేగాన్ని అందుకోగలగడం వల్ల, అవసరమైనప్పుడు వేగం కూడా సరిపడే స్థాయిలో ఉంటుంది.