మోడీ ఇజ్రాయెల్ టూర్‌లో అట్రాక్షన్‌గా ఎన్‌ఫీల్డ్ బైక్.. ఇద్దరు ప్రధానుల స్పెషల్ పోజ్

భారత ప్రధాన మంత్రి నరేంద్ర మోడీ (Narendra Modi) ఇజ్రాయెల్ పర్యటన ప్రపంచవ్యాప్తంగా విశేష ప్రాధాన్యం పొందింది. భారత్-ఇజ్రాయెల్ సంబంధాలను మరింత బలపరిచే ఈ పర్యటనలో ఆయన ఇజ్రాయెల్ పార్లమెంట్‌ను ఉద్దేశించి చేసిన ప్రసంగం ప్రత్యేకంగా నిలిచింది. రెండు దేశాల మధ్య సాంకేతిక, రక్షణ, వ్యవసాయం, ఆవిష్కరణ రంగాల్లో భాగస్వామ్యాన్ని మరింత విస్తరించాలనే దృఢ సంకల్పాన్ని ఆయన వ్యక్తం చేశారు. ఈ పర్యటనలో జెరూసలేం నగరంలో జరిగిన టెక్నాలజీ అండ్ ఇన్నోవేషన్ ఎగ్జిబిషన్ ప్రత్యేక ఆకర్షణగా నిలిచింది. ఈ కార్యక్రమంలో ప్రధాని మోదీతో పాటు ఇజ్రాయెల్ ప్రధాని బెంజమిన్ నెతన్యాహు (Benjamin Netanyahu) కూడా పాల్గొన్నారు.

ఇరుదేశాల ఆధునిక సాంకేతికత, స్టార్టప్ సంస్కృతి, ఆవిష్కరణలను ప్రతిబింబించేలా ఏర్పాటైన ఈ ఎగ్జిబిషన్‌లో అనేక కొత్త ఆవిష్కరణలు ప్రదర్శించబడ్డాయి. ఈ వేడుకలో ప్రపంచ దృష్టిని ఆకర్షించిన ఒక ప్రత్యేక క్షణం ఏమిటంటే, ఇద్దరు ప్రధానులు కలిసి రాయల్ ఎన్‌ఫీల్డ్ (Royal Enfield) మోటార్‌సైకిల్ పక్కన నిలబడి ఫొటోలకు పోజులివ్వడం. భారతీయ వారసత్వానికి ప్రతీకగా నిలిచే రాయల్ ఎన్‌ఫీల్డ్ బైక్‌తో ఇద్దరు నేతలు కలిసి కనిపించడం ఒక సింబాలిక్ సందేశంగా మారింది.

ఇది కేవలం ఒక ఫోటో అవకాశం మాత్రమే కాదు; భారత్ తయారీ సామర్థ్యం, ఇంజినీరింగ్ నైపుణ్యం, గ్లోబల్ బ్రాండ్‌గా ఎదుగుతున్న భారతీయ ఉత్పత్తుల ప్రతిష్టను ప్రపంచానికి తెలియజేసే సందర్భంగా నిలిచింది. సాంకేతికత, ఆవిష్కరణలపై దృష్టి పెట్టిన ఈ ఎగ్జిబిషన్‌లో భారతీయ కంపెనీలు, స్టార్టప్స్ తమ ప్రతిభను చూపించాయి. ఈ చిత్రాలలో కనిపిస్తున్న రాయల్ ఎన్‌ఫీల్డ్ మోటార్‌సైకిల్ సాధారణ మోడల్ కాదు. అది Royal Enfield Goan Classic 350.

రాయల్ ఎన్‌ఫీల్డ్ అత్యంత ప్రజాదరణ పొందిన Royal Enfield Classic 350 ఆధారంగా రూపొందించిన ఈ ప్రత్యేక ఎడిషన్, బాబర్-స్టైల్ డిజైన్‌తో మోటార్‌సైకిల్ ప్రియులను ఆకట్టుకునేలా రూపొందించబడింది. 2024 నవంబర్ చివరిలో అధికారికంగా పరిచయం చేసిన ఈ మోడల్, క్లాసిక్ లుక్‌కు కాస్త కస్టమ్ టచ్ జోడించినట్టుగా కనిపిస్తుంది. గోవాన్ క్లాసిక్ 350 ప్రధాన ప్రత్యేకత దాని సింగిల్-సీట్ సెటప్, లో-స్లంగ్ బాబర్ స్టాన్స్.

సంప్రదాయ క్లాసిక్ 350 కంటే ఇది మరింత రగ్గడ్, కస్టమ్ బిల్ట్ బైక్‌లా అనిపిస్తుంది. ముందుభాగంలో రౌండ్ హెడ్‌ల్యాంప్, రేట్రో డిజైన్ ఎలిమెంట్స్ అలాగే ఉంచినా, ప్రొఫైల్ మరింత స్టైలిష్‌గా ఉంటుంది. రాయల్ ఎన్‌ఫీల్డ్ ఈ మోడల్‌ను 'ట్రిప్ టీల్' అనే ప్రత్యేక మూడు-టోన్ కలర్ ఆప్షన్‌లో ఎక్కువగా ప్రమోట్ చేస్తోంది. ఈ రంగు స్కీమ్‌లో నీలం-ఆకుపచ్చ షేడ్‌తో పాటు ఎరుపు, తెలుపు కలయిక ఉంటుంది.

భారత ప్రధాన మంత్రి నరేంద్ర మోడీ, ఇజ్రాయెల్ ప్రధాన మంత్రి బెంజమిన్ నెతన్యాహుతో కలిసి కనిపించిన బైక్ కూడా ఇదే 'ట్రిప్ టీల్' కలర్‌లో ఉండటం విశేషం. గోవాన్ క్లాసిక్ 350 కేవలం లుక్స్‌తోనే కాకుండా, పనితీరుతో కూడా ఆకట్టుకునే బైక్. ఇందులో రాయల్ ఎన్‌ఫీల్డ్ ప్రసిద్ధ 349cc 'J-సిరీస్' సింగిల్-సిలిండర్, ఎయిర్-ఆయిల్ కూల్డ్ ఇంజిన్ అమర్చబడి ఉంది. ఇదే ఇంజిన్ ప్లాట్‌ఫామ్‌ను క్లాసిక్ 350 లో కూడా ఉపయోగిస్తున్నారు.

ఈ శక్తివంతమైన ఇంజిన్ 6,100 rpm వద్ద 20.2 bhp గరిష్ట శక్తిని ఉత్పత్తి చేస్తుంది. అలాగే 4,000 rpm వద్ద 27 Nm పీక్ టార్క్‌ను అందిస్తుంది. ఈ టార్క్ డెలివరీ ప్రత్యేకంగా నగర రోడ్లపై సాఫ్ట్, స్టేబుల్ రైడింగ్ అనుభవాన్ని ఇస్తుంది. తక్కువ rpmల వద్దే మంచి టార్క్ లభించడం వల్ల ట్రాఫిక్‌లో గేర్ మార్చాల్సిన అవసరం తగ్గుతుంది. ఈ ఇంజిన్‌ను 5-స్పీడ్ గేర్‌బాక్స్‌తో జత చేశారు.