ఒక్కసారి ఛార్జ్ చేస్తే వారం రోజులు హాయిగా తిరగొచ్చు.. మార్కెట్లోకి కొత్త ఎలక్ట్రిక్ స్కూటర్ ఎంట్రీ!

భారతదేశంలో ఎలక్ట్రిక్ వాహనాల మార్కెట్ రోజురోజుకూ విస్తరిస్తోంది. పెరుగుతున్న ఇంధన ధరలు, పర్యావరణంపై అవగాహన, ప్రభుత్వ ప్రోత్సాహకాలు వంటి కారణాలతో ఎలక్ట్రిక్ స్కూటర్లకు డిమాండ్ గణనీయంగా పెరుగుతోంది. ఈ అవకాశాన్ని దృష్టిలో పెట్టుకుని ఇప్పటికే మార్కెట్లో ఉన్న కంపెనీలతో పాటు కొత్త బ్రాండ్లు కూడా తమ ఉత్పత్తులను వరుసగా పరిచయం చేస్తున్నాయి. ఈ జాబితాలో తాజాగా ప్రముఖ ద్విచక్ర వాహన తయారీ సంస్థ కీవే (Keeway) కూడా చేరింది. ఇప్పటివరకు భారతీయ మార్కెట్లో పెట్రోల్ బైక్‌లను మాత్రమే విక్రయించిన ఈ సంస్థ, తొలిసారిగా ప్రీమియం సెగ్మెంట్‌లో ఎలక్ట్రిక్ స్కూటర్‌ను విడుదల చేసి అందరి దృష్టిని ఆకర్షించింది. చైనాకు చెందిన ఎలక్ట్రిక్ స్కూటర్ తయారీ సంస్థ అభివృద్ధి చేసిన హైప్‌వోల్ట్ మోడల్‌ను, కీవే తన చైనా అనుబంధ సంస్థ EZI సహకారంతో భారత మార్కెట్లో ప్రవేశపెట్టింది.

అయితే దేశీయ వినియోగదారులకు మరింత ప్రత్యేకమైన గుర్తింపు కల్పించేందుకు దీనిని హైప్‌వోల్ట్-ఆర్ (Hypvolt-R) అనే పేరుతో విక్రయిస్తోంది. కీవే హైప్‌వోల్ట్-ఆర్ ఎలక్ట్రిక్ స్కూటర్‌ను భారతదేశంలో రూ.1.99 లక్షల (ఎక్స్-షోరూమ్) ప్రారంభ ధరతో విడుదల చేసింది. ఈ స్కూటర్‌ను కొనుగోలు చేయాలనుకునే వారు కేవలం రూ.5,000 టోకెన్ మొత్తాన్ని చెల్లించి ముందుగానే బుకింగ్ చేసుకునే అవకాశం ఉంది. ఈ మోడల్‌ను క్రిస్టల్ వైట్, ప్లాటినం గ్రే రెండు రంగుల్లో అందుబాటులోకి తీసుకువచ్చింది.

ఈ రెండు కలర్ ఆప్షన్లు స్కూటర్‌కు మరింత ప్రీమియం లుక్‌ను తీసుకువస్తాయి. పనితీరు విషయానికి వస్తే, హైప్‌వోల్ట్-ఆర్‌లో 5 kWh సామర్థ్యం గల లిథియం-అయాన్ బ్యాటరీ ప్యాక్‌ను అమర్చారు. ఈ బ్యాటరీని అవసరమైతే వాహనం నుంచి సులభంగా తీసివేసి ఛార్జ్ చేసుకునే విధంగా రూపొందించడం ప్రత్యేకతగా చెప్పుకోవచ్చు. పూర్తి ఛార్జ్‌పై ఈ స్కూటర్ గరిష్టంగా 180 కిలోమీటర్ల వరకు సర్టిఫైడ్ రేంజ్‌ను అందిస్తుందని కంపెనీ పేర్కొంది.

రోజువారీ ప్రయాణాలతో పాటు కొంత దూరం ఉన్న ప్రయాణాలకు కూడా ఇది అనుకూలంగా ఉండేలా రూపొందించబడింది. ఈ స్కూటర్‌కు శక్తినిచ్చే PMS ఎలక్ట్రిక్ మోటార్ గరిష్టంగా 12 kW పవర్‌ను ఉత్పత్తి చేయగలదు. దీంతో వేగవంతమైన యాక్సిలరేషన్‌తో పాటు స్మూత్ రైడింగ్ అనుభూతిని అందిస్తుంది. చురుకైన పనితీరు కనబరిచేలా మోటార్‌ను ట్యూన్ చేశారు. ముఖ్యంగా స్పోర్ట్ మోడ్‌లో గంటకు 115 కిలోమీటర్ల గరిష్ట వేగాన్ని అందుకోవడం దీని ప్రధాన ఆకర్షణ.

ఫీచర్ల పరంగా కీవే హైప్‌వోల్ట్-ఆర్‌లో ఆకర్షణీయమైన LED హెడ్‌లైట్, స్టైలిష్ LED లైట్ స్ట్రిప్, బ్లూటూత్ కనెక్టివిటీతో కూడిన 5-అంగుళాల TFT డిస్‌ప్లే ఉన్నాయి. రివర్స్ మోడ్, టైప్-A, టైప్-C ఛార్జింగ్ పోర్ట్‌లు, సీటు కింద 27 లీటర్ల విశాలమైన స్టోరేజ్ వంటి ఫీచర్లు రోజువారీ వినియోగాన్ని మరింత సౌకర్యవంతంగా మారుస్తాయి. 770 మి.మీ సీటు ఎత్తు ఉండటంతో తక్కువ ఎత్తు ఉన్నవారు కూడా ఈ స్కూటర్‌ను సులభంగా నడపగలరు.

భద్రత విషయంలో కూడా కీవే ఎలాంటి రాజీ పడలేదు. ఈ స్కూటర్‌లో డ్యూయల్-ఛానల్ ABSతో పాటు ట్రాక్షన్ కంట్రోల్, హిల్ హోల్డ్ అసిస్ట్, హిల్ డిసెంట్ కంట్రోల్, క్రూయిజ్ కంట్రోల్, బ్లైండ్ స్పాట్ డిటెక్షన్, రియర్ కెమెరా వంటి అడ్వాన్స్‌డ్ సేఫ్టీ ఫీచర్లను అందించింది. ఇవి రైడర్‌కు మరింత భద్రతతో పాటు ఆత్మవిశ్వాసాన్ని కల్పిస్తాయి.

రైడింగ్ కంఫర్ట్‌ను దృష్టిలో పెట్టుకుని ముందూ, వెనుకా 14-అంగుళాల ట్యూబ్‌లెస్ టైర్లను అమర్చారు. ముందు టెలిస్కోపిక్ ఫోర్క్, వెనుక 5-స్టెప్ అడ్జస్టబుల్ షాక్ అబ్జార్బర్‌లతో కూడిన సస్పెన్షన్ వ్యవస్థ రోడ్లపై మెరుగైన స్థిరత్వం, సౌకర్యవంతమైన ప్రయాణాన్ని అందిస్తుంది. మొత్తంగా, హైప్‌వోల్ట్-ఆర్ పనితీరు, ఫీచర్లు, భద్రత పరంగా ప్రీమియం ఎలక్ట్రిక్ స్కూటర్ కొనుగోలుదారులకు మంచి ఎంపికగా నిలిచే అవకాశాలు ఉన్నాయి.