బైక్ సెకండ్ హ్యాండ్‎కు అమ్మినా వారంటీ పోదు.. స్పోర్ట్స్ బైక్‌లపై 4 ఏళ్ల స్టాండర్డ్ వారంటీ ప్రకటించిన కేటీఎం

భారతదేశంలోని స్పోర్ట్స్ బైక్ ప్రేమికులకు కేటీఎం (KTM) అంటే ఒక క్రేజ్. వేగం, స్టైల్, పవర్‌ఫుల్ ఇంజిన్‌లకు మారుపేరుగా నిలిచిన ఈ ఆస్ట్రియన్ బైక్ తయారీ సంస్థ, ఇప్పుడు తన కస్టమర్ల కోసం ఒక సంచలన నిర్ణయాన్ని తీసుకుంది. తమ బైక్‌లపై నమ్మకాన్ని మరింత పెంచేందుకు, అమ్మకాలను భారీగా పెంచుకునే లక్ష్యంతో, కేటీఎం తన వారంటీ ప్రోగ్రామ్‌లో కీలక మార్పులు చేసింది. ఇప్పటివరకు ఉన్న వారంటీ కాలాన్ని ఏకంగా రెట్టింపు చేస్తూ కంపెనీ పెద్ద ప్రకటన చేసింది. దీనివల్ల కొత్తగా బైక్ కొనేవారికే కాకుండా, పాత బైక్‌ను రీసేల్ చేసేటప్పుడు కూడా కస్టమర్లకు భారీ ప్రయోజనం కలగనుంది.

అసలు విషయం ఏంటి?
సాధారణంగా కేటీఎం బైక్‌లపై ఇప్పటివరకు 2 సంవత్సరాల స్టాండర్డ్ వారంటీ మాత్రమే లభించేది. కానీ, తాజా ప్రకటన ప్రకారం.. కేటీఎం తన అన్ని రోడ్-లీగల్ మెషీన్లపై (రోడ్లపై తిరిగే బైక్‌లు) వారంటీని 4 ఏళ్లకు పెంచింది. అంటే పాత వారంటీతో పోలిస్తే ఇది ఇప్పుడు రెట్టింపు అన్నమాట. 2025 మోడల్ ఇయర్ (MY2025) తర్వాత తయారయ్యే ప్రతి బైక్‌కు ఈ 4 ఏళ్ల వారంటీ వర్తిస్తుందని కంపెనీ స్పష్టం చేసింది. కేటీఎం వద్ద ప్రస్తుతం 125సీసీ నుంచి 1,350సీసీ వరకు రకరకాల ఇంజిన్ సామర్థ్యాలు కలిగిన బైక్‌లు ఉన్నాయి. ఈ కొత్త రూల్ చిన్న బైక్‌ల నుంచి అత్యంత ఖరీదైన మల్టీ-సిలిండర్ బైక్‌ల వరకు అన్నింటికీ వర్తిస్తుంది.

బజాజ్ భాగస్వామ్యం, క్వాలిటీ భరోసా
భారతదేశంలో కేటీఎం బైక్‌లను బజాజ్ ఆటో (Bajaj Auto) తయారు చేస్తున్న సంగతి తెలిసిందే. ముఖ్యంగా 400సీసీ లోపు ఉన్న సింగిల్-సిలిండర్ బైక్‌లన్నీ పుణేలోని ప్లాంట్‌లో తయారవుతున్నాయి. ఈ బైక్‌లతో పాటు విదేశాల్లో తయారయ్యే పెద్ద ఇంజిన్ బైక్‌లపై కూడా ఈ 4 ఏళ్ల వారంటీని వర్తింపజేయడం గమనార్హం. గతంలో కేటీఎం 790సీసీ, 890సీసీ ట్విన్-సిలిండర్ బైక్‌లలో కొన్ని ఇంజిన్ సమస్యలు (ముఖ్యంగా కామ్‌షాఫ్ట్ దెబ్బతినడం) తలెత్తాయి. ఆ సమస్యలను కంపెనీ ఇప్పుడు పూర్తిగా పరిష్కరించిందని, అందుకే ధైర్యంగా వారంటీని పెంచిందని మార్కెట్ నిపుణులు భావిస్తున్నారు. ఈ నిర్ణయం వల్ల కస్టమర్లలో కంపెనీపై నమ్మకం రెట్టింపు కానుంది.

యజమాని మారినా వారంటీ మారదు
ఈ వారంటీ ప్రోగ్రామ్‌లో మరో గొప్ప విషయం ఏమిటంటే.. ఇది బైక్ యజమానితో సంబంధం లేకుండా బైక్‌కు అనుసంధానించబడి ఉంటుంది. అంటే, మీరు ఒక కేటీఎం బైక్ కొని, రెండేళ్ల తర్వాత దాన్ని వేరే ఎవరికైనా అమ్మేసినా, ఆ బైక్ వారంటీ మిగిలిన రెండేళ్ల పాటు కొత్త యజమానికి కూడా వర్తిస్తుంది. అయితే, ఒక ముఖ్యమైన నిబంధన ఏమిటంటే.. బైక్ సర్వీసింగ్ కచ్చితంగా కేటీఎం అథరైజ్డ్ డీలర్ల వద్దే చేయించి ఉండాలి. దీనివల్ల బైక్ రీసేల్ వాల్యూ కూడా పెరుగుతుంది. ఒకవేళ మీరు సెకండ్ హ్యాండ్ లో కేటీఎం బైక్ కొనాలనుకున్నా, అది వారంటీలో ఉంటే నిశ్చింతగా కొనుగోలు చేయవచ్చు.

ఆర్థిక ఇబ్బందుల నుంచి గట్టెక్కే ప్లాన్
కేటీఎం మాతృ సంస్థ కొంతకాలంగా కొన్ని ఆర్థిక పరమైన సవాళ్లను ఎదుర్కొంటోంది. అయినప్పటికీ, కస్టమర్ సర్వీస్ విషయంలో రాజీ పడకుండా ఇలాంటి నిర్ణయాలు తీసుకోవడం గమనార్హం. బజాజ్ మద్దతు ఉండటంతో భారత మార్కెట్లో కేటీఎం దూకుడుగా వెళ్తోంది. ప్రస్తుతం మార్కెట్లో ఉన్న పోటీని తట్టుకోవడానికి, ముఖ్యంగా హోండా, యమహా వంటి సంస్థల నుంచి ఎదురవుతున్న పోటీని ఎదుర్కోవడానికి ఈ 4 ఏళ్ల వారంటీ ఒక బ్రహ్మాస్త్రంలా పనిచేయనుంది. కేటీఎం ఆర్‌సీ 200, ఆర్‌సీ 390, డ్యూక్ సిరీస్, అడ్వెంచర్ బైక్‌లు కొనేవారికి ఇది ఒక పండగ లాంటి వార్త అనే చెప్పాలి.