బైక్ కాదు ఇది ఒక ఎమోషన్.. యూరప్ ఖండాన్ని శాసిస్తున్న మేడ్ ఇన్ ఇండియా బైక్

భారతీయ తయారీ రంగానికి, ముఖ్యంగా ఆటోమొబైల్ రంగానికి ఇది గర్వకారణమైన సమయం. మేడ్ ఇన్ ఇండియా ముద్రతో తయారైన ఒక స్పోర్ట్స్ బైక్ ఇప్పుడు యూరప్ దేశాల్లో, ముఖ్యంగా ఇటలీలో ప్రకంపనలు సృష్టిస్తోంది. ఏప్రిలియా (Aprilia) సంస్థకు చెందిన ఆర్ఎస్ 457 (RS 457) బైక్ ఇప్పుడు ఇటలీ మార్కెట్‌లో అమ్మకాల్లో రికార్డులు సృష్టిస్తోంది.

సాధారణంగా ఇటలీ అంటేనే సూపర్ బైక్‌లకు పెట్టింది పేరు. డుకాటీ (Ducati), కేటీఎం (KTM) వంటి దిగ్గజ సంస్థలకు అది సొంత గడ్డ. అలాంటి చోట మన దేశంలో తయారైన ఏప్రిలియా ఆర్ఎస్ 457 ఇప్పుడు సెన్సేషన్ క్రియేట్ చేస్తోంది. 2025-26 గణాంకాల ప్రకారం, ఇటలీలో అత్యధికంగా అమ్ముడవుతున్న ఫుల్లీ ఫెయిర్డ్ (Fully Faired) మోటార్‌సైకిళ్ల జాబితాలో ఏప్రిలియా ఆర్ఎస్ 660 మొదటి స్థానంలో ఉండగా, మన మహారాష్ట్రలోని బారామతి ప్లాంట్‌లో తయారైన ఆర్ఎస్ 457 రెండో స్థానంలో నిలిచింది. ఈ రెండు బైక్‌లు కలిసి ఇటలీ స్పోర్ట్స్ బైక్ మార్కెట్‌లో ఏకంగా 21 శాతం వాటాను కైవసం చేసుకోవడం విశేషం.

పియాజియో (Piaggio) గ్రూపునకు చెందిన ఏప్రిలియా సంస్థకు మహారాష్ట్రలో భారీ తయారీ కేంద్రం ఉంది. ఇక్కడే ఆర్ఎస్ 457 బైక్‌ను అంతర్జాతీయ ప్రమాణాలతో తయారు చేస్తున్నారు. ఇక్కడి నుండి ఈ బైక్ ప్రపంచంలోని అనేక దేశాలకు ఎగుమతి అవుతోంది. యూరప్ యువతకు ఈ బైక్ యొక్క డిజైన్, పవర్ మరియు హ్యాండ్లింగ్ బాగా నచ్చడంతో అమ్మకాలు ఒక్కసారిగా పుంజుకున్నాయి. ఒక ఇటాలియన్ బ్రాండ్ బైక్, భారత్‌లో తయారై, తిరిగి ఇటలీలోనే టాప్ సేలర్‌గా నిలవడం అనేది మేక్ ఇన్ ఇండియా విజయాన్ని చాటిచెబుతోంది.

ఈ బైక్ చూడటానికి ఎంత స్టైలిష్‌గా ఉంటుందో, రోడ్డు మీద అంతకంటే వేగంగా పరిగెడుతుంది. దీని సాంకేతిక వివరాల్లోకి వెళితే.. ఇందులో 457cc లిక్విడ్-కూల్డ్, పారలల్-ట్విన్ ఇంజిన్ ఉంది. ఇది 47.6 hp శక్తిని, 43.5 Nm టార్క్‌ను ఉత్పత్తి చేస్తుంది. 6-స్పీడ్ గేర్ బాక్స్ తో పాటు స్లిప్పర్ క్లచ్ సౌకర్యం కూడా ఉంది. ఇది కేవలం కొన్ని సెకన్లలోనే 100 కిమీ వేగాన్ని అందుకుంటుంది. దీని గరిష్ట వేగం గంటకు 180 కిలోమీటర్లకు పైగానే ఉంటుంది. బైక్ బరువు కేవలం 175 కిలోలు మాత్రమే ఉండటం వల్ల, ట్రాఫిక్‌లో లేదా మలుపుల్లో దీన్ని కంట్రోల్ చేయడం చాలా సులభం.

ఆర్ఎస్ 457 కేవలం వేగానికి మాత్రమే కాదు, టెక్నాలజీకి కూడా ప్రాధాన్యత ఇస్తుంది.
రైడ్-బై-వైర్: ఇది రైడర్‌కు ఖచ్చితమైన త్రాటిల్ రెస్పాన్స్‌ను అందిస్తుంది.
రైడింగ్ మోడ్స్: ఇందులో మూడు రకాల రైడింగ్ మోడ్స్ ఉన్నాయి, ఇవి రోడ్డు పరిస్థితులకు అనుగుణంగా బైక్ పనితీరును మారుస్తాయి.
డిస్ప్లే: 5-అంగుళాల టీఎఫ్‌టీ (TFT) కలర్ డిస్ప్లే ఉంది, ఇది బ్లూటూత్ కనెక్టివిటీని సపోర్ట్ చేస్తుంది.
సేఫ్టీ: డ్యూయల్ ఛానల్ ఏబీఎస్ (ABS), ట్రాక్షన్ కంట్రోల్ వంటి ఫీచర్లు రైడర్ భద్రతను నిర్ధారిస్తాయి.

ఈ బైక్ చూడటానికి ఏప్రిలియా ఐకానిక్ బైక్ RSV4 లాగే కనిపిస్తుంది. దీని డ్యూయల్ ఎల్‌ఈడీ హెడ్ లైట్లు, అగ్రెసివ్ బాడీ వర్క్, అల్యూమినియం పెరిమీటర్ ఫ్రేమ్ దీనికి ఒక ప్రీమియం లుక్ ఇస్తాయి. అడ్జస్టబుల్ యూఎస్‌డీ (USD) ఫోర్క్స్, వెనుక వైపు మోనోషాక్ సస్పెన్షన్ ఉండటం వల్ల రైడింగ్ చాలా కంఫర్టబుల్‌గా ఉంటుంది.

భారత మార్కెట్లో 2026 ఏప్రిలియా ఆర్ఎస్ 457 ఎక్స్-షోరూమ్ ధర సుమారు రూ.4.22 లక్షలుగా ఉంది. దీని రేసింగ్ వెర్షన్ (RS GP Replica) ధర రూ.4.37 లక్షలు. కంపెనీ దీనిపై 3 ఏళ్ల తయారీదారు వారంటీని, 3 ఉచిత సర్వీసులను, 2 ఏళ్ల రోడ్ సైడ్ అసిస్టెన్స్ (RSA) ను అందిస్తోంది. మధ్యతరగతి, యువతను ఆకట్టుకోవడానికి ఈ ధర సరిగ్గా సరిపోతుందని ఆటో నిపుణులు భావిస్తున్నారు.