రూ. 76,500కే హైబ్రిడ్ స్కూటర్.. తక్కువ ధరలో ప్రీమియం ఫీల్.. కొత్త లుక్‌లో యమహా ఫాసినో

యువతలో స్టైల్‌కు, పనితీరుకు సమాన ప్రాధాన్యత ఇస్తూ ప్రత్యేక గుర్తింపు పొందిన యమహా ఫాసినో 125 Fi హైబ్రిడ్ (Yamaha Fascino 125 Fi Hybrid) ఇప్పుడు మరింత ఆకర్షణీయమైన రూపంతో తిరిగి మార్కెట్లోకి అడుగుపెట్టింది. ఇప్పటికే భారత మార్కెట్లో భారీ ఆదరణ పొందిన ఈ స్కూటర్, ప్రారంభమైనప్పటి నుండి 15 లక్షల యూనిట్ల ఉత్పత్తి అనే గొప్ప మైలురాయిని చేరుకోవడం విశేషం. ఈ విజయాన్ని పురస్కరించుకుని, కంపెనీ వినియోగదారుల అభిరుచులకు అనుగుణంగా డిజైన్‌లో మార్పులు చేస్తూ కొత్త అప్‌డేట్‌ను తీసుకువచ్చింది. ప్రస్తుతం యువతలో మారుతున్న అభిరుచులు, ట్రెండ్స్‌ను గమనించిన యమహా, ఫాసినో 125లో ముఖ్యంగా వెనుక భాగంలో గణనీయమైన మార్పులు చేసింది.

స్కూటర్‌ను మరింత కాంపాక్ట్‌గా, స్టైలిష్‌గా మార్చేందుకు వెనుక భాగం పొడవును తగ్గించి, ఆకట్టుకునేలా తీర్చిదిద్దారు. ఈ మార్పులు స్కూటర్‌కు ఒక మోడ్రన్ అండ్ స్పోర్టీ టచ్‌ను అందిస్తూ, నగర ట్రాఫిక్‌లో సులభంగా హ్యాండిల్ చేసుకునే విధంగా మారుస్తున్నాయి. రీడిజైన్ చేసిన టెయిల్ సెక్షన్ ఈ స్కూటర్‌కు ప్రధాన ఆకర్షణగా నిలుస్తోంది. కొత్త టెయిల్ లైట్లు, ఇండికేటర్లు మరింత ప్రీమియం ఫీల్‌ను ఇస్తూ, రాత్రివేళల్లో కూడా ప్రత్యేకంగా కనిపించేలా డిజైన్ చేశారు.

ముఖ్యంగా 'ఐకానిక్' టెయిల్ లైట్ డిజైన్ స్కూటర్‌కు ఒక సమతుల్యమైన లుక్‌ను అందిస్తూ, చూసే వారికి వెంటనే ఆకట్టుకునే విధంగా ఉంటుంది. ఈ చిన్నచిన్న మార్పులే ఫాసినోను మరో స్థాయికి తీసుకెళ్లాయని చెప్పాలి. ఈ డిజైన్ అప్‌డేట్ వెనుక ఉన్న అసలు బలం వినియోగదారుల ఫీడ్‌బ్యాక్. భారతదేశంలోని యమహా ఆర్ & డి టీమ్ వినియోగదారుల అభిప్రాయాలను లోతుగా విశ్లేషించి, వారి అవసరాలకు సరిపోయేలా ఈ మార్పులను రూపొందించింది.

కొత్త అప్‌డేట్‌‌లో ముందు భాగంలో కూడా ఆకర్షణీయమైన మార్పులను పొందింది. ముఖ్యంగా స్కూటర్ ఫ్రంట్ డిజైన్‌ను మరింత స్టైలిష్‌గా చూపించేందుకు కొత్త డీకాల్స్‌ను జోడించారు. ఇవి స్కూటర్‌కు యూత్‌ఫుల్, ప్రీమియం లుక్‌ను ఇస్తూ, రోడ్డుపై ప్రత్యేకంగా కనిపించేలా చేస్తాయి. ప్రతి చిన్న డిజైన్ ఎలిమెంట్‌ను కూడా శ్రద్ధగా రూపొందించినట్లు స్పష్టంగా తెలుస్తోంది. ఈ స్కూటర్ మొత్తం పొడవును 1780 మిల్లీమీటర్లకు తగ్గించింది.

మెకానికల్ పరంగా చూస్తే, ఈ అప్‌డేట్‌లో ఎటువంటి మార్పులు చేయలేదు. ఇదే విశ్వసనీయమైన 125cc ఎయిర్-కూల్డ్, ఫ్యూయల్-ఇంజెక్టెడ్ ఇంజన్‌ను కొనసాగించారు. అయితే, యమహా ప్రత్యేకత అయిన బ్లూ కోర్ హైబ్రిడ్ టెక్నాలజీ ఈ స్కూటర్ పనితీరును మరింత మెరుగుపరుస్తుంది. ఈ టెక్నాలజీ వల్ల ఇంజన్ శక్తి మాత్రమే కాదు, ఇంధన సామర్థ్యమూ పెరుగుతుంది. ఇందులో ఉన్న స్మార్ట్ మోటార్ జనరేటర్(SMG) ఫీచర్ స్కూటర్‌ను చాలా సైలెంట్‌గా స్టార్ట్ చేయడంలో సహాయపడుతుంది.

స్టాప్ అండ్ స్టార్ట్ సిస్టమ్ ట్రాఫిక్ సిగ్నల్స్ వద్ద ఇంజన్‌ను ఆటోమేటిక్‌గా ఆపి, మళ్లీ వేగంగా స్టార్ట్ చేయడం ద్వారా ఇంధనాన్ని ఆదా చేస్తుంది. ఇవన్నీ కలిపి స్కూటర్‌ను మరింత ఎఫిషియెంట్‌గా మారుస్తాయి. అదే సమయంలో, ఈ హైబ్రిడ్ సిస్టమ్ ప్రత్యేకంగా ఎత్తైన రోడ్లపై ఎక్కేటప్పుడు లేదా ఎక్కువ బరువుతో ప్రయాణించేటప్పుడు అదనపు పవర్‌ను అందిస్తుంది. దీనివల్ల రైడింగ్ అనుభవం సాఫీగా, కంఫర్ట్‌గా ఉంటుంది.

ఈ స్కూటర్ డ్రమ్ బ్రేక్ వెర్షన్ ధర రూ. 76,500, డిస్క్ బ్రేక్ వెర్షన్ రూ. 88,000 (ఎక్స్-షోరూమ్ ఢిల్లీ). ఇక టాప్-ఎండ్ ఫాసినో S వేరియంట్ ప్రారంభ ధర రూ. 95,200గా ఉంది. రంగుల పరంగా మ్యాట్ గ్రే, మ్యాట్ బ్లాక్ వంటి ఆధునిక కలర్స్‌తో పాటు మరికొన్ని ఆకర్షణీయమైన ఆప్షన్స్‌లో ఈ స్కూటర్ అందుబాటులోకి వచ్చింది. ఇవి యువతకు మరింతగా నచ్చేలా డిజైన్ చేయబడినట్లు స్పష్టంగా తెలుస్తోంది.