ఏకంగా కస్టమర్లకు రూ.8 కోట్ల ఆదా.. 3.2 కోట్ల కిలోమీటర్ల మైలురాయి దాటి 8వ వింతగా నిలిచిన ఎలక్ట్రిక్ బైక్

భారతదేశ ఎలక్ట్రిక్ వాహన రంగంలో ఒక సరికొత్త విప్లవం నడుస్తోంది. పెట్రోల్ ధరలు మండిపోతున్న వేళ, సామాన్యుడికి ఊరటనిస్తూ ఓబెన్ ఎలక్ట్రిక్ (Oben Electric) సంస్థ సంచలన మైలురాయిని అందుకుంది. కమ్యూటర్ ఎలక్ట్రిక్ మోటార్ సైకిల్ విభాగంలో ఓబెన్ ఎలక్ట్రిక్ అత్యంత వేగంగా అభివృద్ధి చెందుతున్న బ్రాండ్‌గా అవతరించింది. కంపెనీ విడుదల చేసిన తాజా గణాంకాల ప్రకారం..వారి వినియోగదారులు అందరూ కలిసి ఇప్పటివరకు 3.2 కోట్ల కిలోమీటర్లకు పైగా దూరాన్ని ప్రయాణించారు.

ఈ విజయం కేవలం రెండేళ్లలోనే సాధించడం గమనార్హం. ఓబెన్ అందిస్తున్న రోర్ (Rorr), రోర్ ఈజీ (Rorr EZ), రోర్ ఈజీ సిగ్మా (Rorr EZ Sigma) మోడళ్లు భారతీయ రోడ్లపై తమ సత్తా చాటుతున్నాయి. ముఖ్యంగా రోజువారీ ఆఫీసు పనులకు వెళ్లేవారు, నగరాల్లో తిరిగే యువత ఈ బైక్‌లను ఎక్కువగా ఇష్టపడుతున్నారు. ఈ మైలురాయి కేవలం కంపెనీ విజయం మాత్రమే కాదు, సామాన్యుడి విజయం కూడా.

పెట్రోల్ బైక్‌లతో పోలిస్తే ఎలక్ట్రిక్ బైక్‌లు వాడటం వల్ల రైడర్లు ఇప్పటివరకు దాదాపు రూ.8 కోట్లను ఇంధన ఖర్చుల రూపంలో ఆదా చేశారు. అంటే ప్రతి రైడర్ తన జేబులో వేల రూపాయలను మిగుల్చుకోగలిగారు. ఆర్థిక లాభమే కాకుండా, పర్యావరణానికి కూడా ఓబెన్ బైక్‌లు ఎంతో మేలు చేస్తున్నాయి. ఈ ప్రయాణం వల్ల దాదాపు 385 మెట్రిక్ టన్నుల కార్బన్ డయాక్సైడ్ (CO2) ఉద్గారాలు తగ్గడమనేది విశేషం. గాలి కాలుష్యాన్ని తగ్గించి భావి తరాలకు స్వచ్ఛమైన గాలిని అందించడంలో ఈ వాహనాలు కీలక పాత్ర పోషిస్తున్నాయి.

ఓబెన్ ఎలక్ట్రిక్ బైక్‌ల వినియోగం దేశవ్యాప్తంగా ఉన్నప్పటికీ, కొన్ని రాష్ట్రాల్లో దీని ప్రభావం చాలా ఎక్కువగా ఉంది. కర్ణాటక, ఉత్తరప్రదేశ్, ఢిల్లీ రాష్ట్రాలలో ఈ బైక్‌లను అత్యధికంగా ఉపయోగిస్తున్నట్లు డేటా వెల్లడిస్తోంది. ఇక్కడి రోడ్ల పరిస్థితులు, ట్రాఫిక్ ఇబ్బందులను అధిగమించడానికి ఓబెన్ బైక్‌లు సరిగ్గా సరిపోతాయని రైడర్లు భావిస్తున్నారు.

ఓబెన్ ఫౌండర్, సీఈఓ మధుమిత అగర్వాల్ మాట్లాడుతూ.. "భారతీయ రైడర్లు తమ రోజువారీ ప్రయాణాల్లో స్థిరత్వం, నమ్మకం, తక్కువ మెయింటెనెన్స్ ఖర్చులను కోరుకుంటారు. 3.2 కోట్ల కిలోమీటర్ల ప్రయాణం మా ఉత్పత్తులపై వినియోగదారులకు ఉన్న నమ్మకాన్ని తెలియజేస్తోంది" అని సంతోషం వ్యక్తం చేశారు.

ఓబెన్ ఎలక్ట్రిక్ సంస్థ ఏడాదికి ఏడాది ఏకంగా 375 శాతం వృద్ధిని నమోదు చేస్తోంది. ఈ డిమాండ్‌ను దృష్టిలో ఉంచుకుని, కంపెనీ రాబోయే రెండేళ్లలో దేశవ్యాప్తంగా 500 షోరూమ్‌లను ఏర్పాటు చేయాలని లక్ష్యంగా పెట్టుకుంది. దీనివల్ల టైర్-2, టైర్-3 నగరాల్లో కూడా వినియోగదారులకు ఈ బైక్‌లు అందుబాటులోకి రానున్నాయి. కేవలం షోరూమ్‌లే కాకుండా, ఓబెన్ కేర్ (Oben Care) అనే కార్యక్రమం ద్వారా అమ్మకాల తర్వాత మెరుగైన సర్వీసును అందించడానికి కంపెనీ కట్టుబడి ఉంది. 24/7 కస్టమర్ అసిస్టెన్స్, సులభంగా లభించే విడిభాగాలు ఈ బ్రాండ్‌కు ఉన్న ప్రధాన బలం.

ఓబెన్ ఎలక్ట్రిక్ బైక్‌ల ప్రత్యేకత ఏమిటంటే.. వీటిలో ఉపయోగించే ఎల్‌ఎఫ్‌పి బ్యాటరీ సిస్టమ్స్, మోటార్లు, వెహికల్ కంట్రోల్ యూనిట్లు, ఫాస్ట్ ఛార్జర్లను కంపెనీ సొంతంగానే అభివృద్ధి చేస్తోంది. బెంగళూరులోని 3.5 ఎకరాల అత్యాధునిక తయారీ కేంద్రంలో ఈ విడిభాగాలను తయారు చేస్తున్నారు. దీనివల్ల భారతీయ వాతావరణ పరిస్థితులకు అనుగుణంగా బైక్‌లు పని చేస్తాయి. ముఖ్యంగా మన దేశంలో ఉండే ఎండలు, వానలకు తట్టుకునేలా ఈ బ్యాటరీ టెక్నాలజీని డిజైన్ చేశారు.

ఓబెన్ రోర్ మోడల్స్, ధరల వివరాలు
ఓబెన్ ప్రస్తుతం మూడు వేరియంట్లలో లభ్యమవుతోంది:
ఓబెన్ రోర్ (Standard): దీని ధర సుమారు రూ.1.49 లక్షలు (ఎక్స్-షోరూమ్). ఒక్కసారి ఛార్జ్ చేస్తే ఏకంగా 187 కిలోమీటర్ల రేంజ్ ఇస్తుంది. కేవలం 3 సెకన్లలోనే 0 నుంచి 40 కి.మీ వేగాన్ని అందుకోగలదు. దీని టాప్ స్పీడ్ గంటకు 100 కి.మీ.

ఓబెన్ రోర్ ఈజీ (Rorr EZ): సామాన్యుల కోసం రూపొందించిన ఈ మోడల్ ధర రూ.99,999 నుంచి ప్రారంభమవుతుంది. ఇది 175 కిలోమీటర్ల రేంజ్ ఇస్తుంది. గంటకు 95 కి.మీ వేగంతో దూసుకెళ్లగలదు.
రోర్ ఈజీ సిగ్మా (Rorr EZ Sigma): దీని ధర రూ.1.09 లక్షలు. ఇది 140 కిలోమీటర్ల రేంజ్ ఇస్తుంది.
ఈ బైక్‌లన్నింటికీ బ్యాటరీ, మోటార్‌పై 3 ఏళ్లు లేదా 40,000 కిలోమీటర్ల వారంటీని కంపెనీ అందిస్తోంది. అంటే కస్టమర్లకు ఎలాంటి టెన్షన్ లేకుండా ప్రయాణించే అవకాశం ఉంది.