ప్రపంచమంతా పెట్రోల్ దొరక్కపోయినా భయంలేదు.. ఎన్ని కిలోమీటర్లైనా దీంతో దూసుకెళ్లొచ్చు

ప్రస్తుతం పశ్చిమాసియాలో నెలకొన్న యుద్ధ ఉద్రిక్తతలు ప్రపంచవ్యాప్తంగా ఇంధన సరఫరాపై పెను ప్రభావాన్ని చూపుతున్నాయి. ఇరాన్-అమెరికా మధ్య సాగుతున్న ఈ పోరు వల్ల ముడి చమురు దిగుమతులు తగ్గిపోతాయేమో, పెట్రోల్, డీజిల్ ధరలు ఆకాశాన్నంటుతాయేమో అన్న భయం సామాన్యుల్లో మొదలైంది. ఇప్పటికే కొన్ని ప్రాంతాల్లో ప్రజలు క్యూలు కట్టి పెట్రోల్ నిల్వ చేసుకుంటున్న దృశ్యాలు కనిపిస్తున్నాయి. ఇలాంటి అనిశ్చిత పరిస్థితుల్లో పెట్రోల్ ఖర్చు లేని ప్రత్యామ్నాయ మార్గాల వైపు చూడటం తెలివైన పని. ముఖ్యంగా చిన్న చిన్న దూరాలకు ప్రయాణించే వారు, విద్యార్థులు, ఆఫీసులకు వెళ్లేవారు 'ఎలెక్ట్రిక్ సైకిళ్ల' (E-Bikes) వైపు మొగ్గు చూపుతున్నారు. రూ. 50,000 లోపు బడ్జెట్‌లో అందుబాటులో ఉన్న కొన్ని బెస్ట్ ఎలక్ట్రిక్ సైకిళ్ల వివరాలు మీకోసం..

ఇమొటోరాడ్ టీ-రెక్స్ ఎయిర్ (EMotorad T-Rex Air)
స్టైలిష్ లుక్ మరియు అద్భుతమైన పనితీరును కోరుకునే వారికి ఇమొటోరాడ్ టీ-రెక్స్ ఎయిర్ ఒక గొప్ప ఎంపిక. దీని ధర సుమారు రూ. 36,499. ఈ సైకిల్‌లో 10.2 Ah సామర్థ్యం గల బ్యాటరీని అమర్చారు. ఇది ఒక్కసారి ఛార్జ్ చేస్తే 50 కిలోమీటర్ల వరకు ప్రయాణించే వీలు కల్పిస్తుంది. గంటకు 25 కిలోమీటర్ల గరిష్ట వేగంతో ప్రయాణించే ఈ ఈ-బైక్, నగరాల్లో ట్రాఫిక్ ఇబ్బందుల నుంచి తప్పించుకోవడానికి చక్కగా సరిపోతుంది. కంపెనీ దీనిపై ఏకంగా 5 ఏళ్ల వరకు వారంటీని కూడా అందిస్తోంది, ఇది కొనుగోలుదారులకు పెద్ద ఊరట.

బీఎస్ఏ అర్బన్ రేంజర్ (BSA Urban Ranger)
సైకిల్ అనగానే గుర్తుకు వచ్చే పాత తరం బ్రాండ్ బీఎస్ఏ ఇప్పుడు ఎలక్ట్రిక్ విభాగంలోనూ సత్తా చాటుతోంది. రూ. 34,999 ధర కలిగిన బీఎస్ఏ అర్బన్ రేంజర్ లో 36V 250W BLDC మోటార్ ఉంది. దీని ఫ్రేమ్ కింది భాగంలో 5.8 Ah లిథియం-అయన్ బ్యాటరీని చాలా తెలివిగా అమర్చారు. పెడల్-అసిస్ట్ మోడ్ (మనం తొక్కుతుంటే బ్యాటరీ సాయం చేయడం)లో ఇది 45 కిలోమీటర్ల రేంజ్ ఇస్తుంది. కేవలం నాలుగు గంటల్లోనే దీని బ్యాటరీ ఫుల్ అవుతుంది. రాత్రి వేళల్లో కూడా సురక్షితంగా ప్రయాణించేందుకు ఇందులో ఎల్ఈడీ డిస్‌ప్లే, లైట్లు కూడా ఉన్నాయి.

ఇకో-బైక్ రెడ్ (Eco-Bike Red)
అత్యంత తక్కువ బడ్జెట్‌లో ఫీచర్లు కోరుకునే వారికి ఇకో-బైక్ రెడ్ మంచి ఆప్షన్. దీని ప్రారంభ ధర రూ. 27,990. ఇందులో 7.8 Ah బ్యాటరీ ఉంటుంది, ఇది 40 కిలోమీటర్ల వరకు ప్రయాణించేందుకు సహకరిస్తుంది. దీని స్పెషాలిటీ ఏంటంటే.. ఇందులో రిమూవబుల్ బ్యాటరీ ఉంటుంది. అంటే మీరు బ్యాటరీని సైకిల్ నుంచి విడదీసి మీ ఇంట్లోకి తీసుకువెళ్లి ఛార్జ్ చేసుకోవచ్చు. డ్యూయల్ డిస్క్ బ్రేక్స్, ఐపి65 వాటర్ రెసిస్టెన్స్ (వర్షంలో తడిసినా పర్వాలేదు) వంటి ఫీచర్లు దీని సొంతం. సుమారు 120 కిలోల బరువును ఇది సునాయాసంగా మోయగలదు.

హీరో లెక్ట్రో వై3 (Hero Lectro Y3)
భారతదేశంలో అత్యంత విశ్వసనీయమైన బ్రాండ్ హీరో నుంచి వచ్చిన మోడల్ వై3. దీని ధర కేవలం రూ. 25,999 మాత్రమే. తక్కువ ధరలో ఈ-బైక్ కావాలనుకునే విద్యార్థులకు ఇది సరైన జోడి. ఇందులో హైమ్ (HYM) ఎలక్ట్రిక్ మోటార్ ఉంటుంది. ఒక్కసారి ఛార్జ్ చేస్తే 40 కిలోమీటర్ల వరకు ప్రయాణించవచ్చు. రాత్రి ప్రయాణాల్లో సేఫ్టీ కోసం ఇంటిగ్రేటెడ్ లైటింగ్, హారన్ కూడా ఇందులో ఉన్నాయి. సింపుల్ డిజైన్ తో పాటు ఈ సైకిల్ మెయింటెనెన్స్ కూడా చాలా తక్కువగా ఉంటుంది.

హీరో లెక్ట్రో వై5 (Hero Lectro Y5)
హీరో లెక్ట్రో సిరీస్‌లోనే కొంచెం ఎక్కువ రేంజ్ కావాలనుకునే వారి కోసం వై5 మోడల్ అందుబాటులో ఉంది. దీని ధర సుమారు రూ. 30,999. ఇది ఏకంగా 60 కిలోమీటర్ల వరకు రేంజ్ ఇస్తుంది, కాబట్టి లాంగ్ డ్రైవ్స్ కు లేదా ఎక్కువ దూరం ఆఫీసులకు వెళ్లే వారికి ఇది అనువైనది. ఇందులో కలర్ డిజిటల్ డిస్‌ప్లే ఉంటుంది, ఇది మన ప్రయాణ వేగం, బ్యాటరీ లెవెల్ వంటి వివరాలను చూపిస్తుంది. హీరో బ్రాండ్ నమ్మకం, మెరుగైన బ్యాటరీ లైఫ్ దీనికి అదనపు బలాలు.

పెట్రోల్ రేట్లు పెరిగినా, సరఫరా తగ్గినా టెన్షన్ పడకుండా ఉండాలంటే ఇప్పుడే ఇలాంటి ఈ-బైక్స్ పై ఒక లుక్కేయండి. పర్యావరణానికి మేలు చేయడంతో పాటు మీ ఆరోగ్యాన్ని, జేబును కూడా ఇవి కాపాడుతాయి.