చుక్క పెట్రోల్ అవసరం లేదు.. సింగిల్ ఛార్జ్‌తో 160 కిమీ రేంజ్.. స్టైలిష్ లుక్‎లో ఈ స్కూటరుకు సాటి లేదు

భారతదేశ ఎలక్ట్రిక్ టూ-వీలర్ (EV) మార్కెట్లోకి సరికొత్త ప్లేయర్ సైలెంట్‌గా ఎంట్రీ ఇచ్చి రికార్డులు తిరగరాస్తోంది. బెంగళూరుకు చెందిన స్టార్టప్ కంపెనీ రివర్ మొబిలిటీ (River Mobility) మార్కెట్లో ఉన్న దిగ్గజ బ్రాండ్లు టీవీఎస్ (TVS), బజాజ్ (Bajaj), ఓలా (Ola) వంటి వాటికి గట్టి పోటీ ఇస్తోంది. ఈ కంపెనీ మార్కెట్లో కేవలం ఒకే ఒక్క మోడల్ రివర్ ఇండి (River Indie) అనే ఎలక్ట్రిక్ స్కూటర్‌ను అమ్ముతోంది. అయినప్పటికీ, దీని సేల్స్ గ్రాఫ్ చూస్తే ఎవరైనా ఆశ్చర్యపోవాల్సిందే. లాంచ్ అయిన అతి తక్కువ కాలంలోనే ఈ స్కూటర్ ఏకంగా 43,000 కంటే ఎక్కువ యూనిట్ల అమ్మకాల మార్కును దాటేసింది. జూన్ 2026 నెలలో ఈ కంపెనీ 4,436 యూనిట్ల సేల్స్‌తో తన చరిత్రలోనే అత్యుత్తమ నెలవారీ అమ్మకాలను నమోదు చేసింది.

దేశంలోని మొత్తం 175 ఎలక్ట్రిక్ టూ-వీలర్ కంపెనీలలో రివర్ మొబిలిటీ అద్భుతమైన వృద్ధిని కనబరుస్తోంది. ఈ ఏడాది ప్రారంభంలో అంటే జనవరి, ఫిబ్రవరి, మార్చి (Q1 2026) త్రైమాసికంలో 8వ స్థానంలో ఉన్న ఈ స్టార్టప్.. ఏప్రిల్, మే, జూన్ (Q2 2026) నాటికి ఏడో స్థానానికి ఎగబాకింది.

వాహన్ (Vahan) పోర్టల్ డేటా ప్రకారం, ప్రారంభంలో ఈ స్కూటర్ అమ్మకాలు కాస్త నెమ్మదిగా సాగినప్పటికీ, 2025 సంవత్సరం నుంచి వీటికి విపరీతమైన డిమాండ్ పెరిగింది. కేవలం 2025 ఒక్క సంవత్సరంలోనే కంపెనీ 17,020 స్కూటర్లను డెలివరీ చేసి టాప్-9 స్థానంలో నిలిచింది. ఇక 2026 లో ఈ జోరు మరింత పుంజుకుంది.

ఈ ఏడాది మొదటి త్రైమాసికంలో 9,607 యూనిట్లు అమ్ముడవగా.. రెండవ త్రైమాసికం నాటికి అది 23 శాతం పెరిగి 11,776 యూనిట్లకు చేరుకుంది. కేవలం జూలై నెల మొదటి 12 రోజుల్లోనే ఏకంగా 2,176 మంది కస్టమర్లు రివర్ ఇండి స్కూటర్‌ను కొనుగోలు చేశారు. ప్రస్తుతం మార్కెట్లో ఉన్న విపరీతమైన క్రేజ్ చూస్తుంటే.. ఈ ఏడాది ముగిసేలోగా రివర్ మొబిలిటీ సంస్థ ఏకంగా 50,000 యూనిట్ల సేల్స్ మార్కును చాలా ఈజీగా దాటేస్తుందని మార్కెట్ నిపుణులు అంచనా వేస్తున్నారు.

మార్కెట్లో ఈ ప్రీమియం ఎలక్ట్రిక్ స్కూటర్ ఎక్స్-షోరూమ్ ధర సుమారు రూ.1,52,000 గా ఉంది. ఇది టీవీఎస్ ఐక్యూబ్, బజాజ్ చేతక్, ఏథర్ రిజ్టా వంటి టాప్-ఎండ్ మోడళ్లకు గట్టి పోటీ ఇస్తోంది. ఈ స్కూటర్ ఒకే ఒక వేరియంట్‌లో లభిస్తుంది. దీనిలోని శక్తివంతమైన బ్యాటరీని ఒక్కసారి ఛార్జ్ చేస్తే ఏకంగా 160 కిలోమీటర్ల మేర ప్రయాణించవచ్చని కంపెనీ క్లెయిమ్ చేస్తోంది.

దీనివల్ల నగరాల్లో రోజువారీ ప్రయాణాలకు మరియు వీకెండ్ రైడ్స్‌కు ఇది బెస్ట్ ఆప్షన్‌గా నిలుస్తోంది. దీని ప్రత్యేకత ఏంటంటే ఇందులో ఏకంగా 43 లీటర్ల అండర్-సీట్ స్టోరేజ్ (Boot Space) లభిస్తుంది. ప్రస్తుతం ఇండియాలో ఉన్న ఏ ఎలక్ట్రిక్ స్కూటర్ లోనూ ఇంత పెద్ద స్టోరేజ్ లేదు. ఇందులో ల్యాప్‌టాప్ బ్యాగ్స్, హెల్మెట్, నిత్యావసర సరుకులను చాలా సులభంగా సర్దుకోవచ్చు.

రివర్ మొబిలిటీ ప్రస్తుతం కర్ణాటకలోని హోస్కోట్ ప్లాంట్ నుంచి ఈ ఇండి స్కూటర్‌తో పాటు యమహా EC-06 మోడళ్లను తయారు చేస్తోంది. ఈ ప్లాంట్ వార్షిక ఉత్పాదక సామర్థ్యం 1.20 లక్షల యూనిట్లుగా ఉంది. ప్రస్తుతం పెరుగుతున్న డిమాండ్‌ను తట్టుకోవడానికి కంపెనీ కొత్త ప్లాంట్‌ను ఏర్పాటు చేసే ఆలోచనలో ఉంది.

ఎందుకంటే, 2027 మొదటి త్రైమాసికంలో మార్కెట్లోకి మరో రెండు సరికొత్త ఎలక్ట్రిక్ మోడళ్లను లాంచ్ చేయడానికి కంపెనీ సిద్ధమవుతోంది. దీనికంటే ముందే మ్యానుఫ్యాక్చరింగ్ కెపాసిటీని మరింత పెంచాలని రివర్ మొబిలిటీ పక్కా ప్లాన్ చేస్తోంది.