బుల్లెట్ లవర్లకు డబుల్ ధమాకా.. రాయల్ ఎన్‌ఫీల్డ్ బుల్లెట్ 650 వర్సెస్ క్లాసిక్ 650.. ఏ బైక్ కొంటే బెస్ట్?

భారతదేశంలో రాయల్ ఎన్‌ఫీల్డ్ (Royal Enfield) బైక్‌లకు ఉండే క్రేజ్ గురించి ప్రత్యేకంగా చెప్పక్కర్లేదు. రెట్రో లుకింగ్ బైక్స్ ఇష్టపడే వారి కోసం కంపెనీ ఒకే ధరలో రెండు పవర్‌ఫుల్ 650cc బైక్‌లను మార్కెట్లోకి తెచ్చింది. అవే రాయల్ ఎన్‌ఫీల్డ్ బుల్లెట్ 650(Bullet 650), క్లాసిక్ 650 (Classic 650). ఈ రెండు బైక్‌లలో ఒకే ఇంజన్, ఒకే బాడీ ఛాసిస్ ఉన్నప్పటికీ.. డిజైన్, సీటింగ్, కలర్ ఆప్షన్లలో కొన్ని ముఖ్యమైన తేడాలు ఉన్నాయి. కొత్త బైక్ కొనాలనుకునే వారికి ఈ రెండింటిలో ఏది బెస్ట్ ఆప్షనో వివరంగా తెలుసుకుందాం.

దేని లుక్స్ ఎలా ఉన్నాయి?
పైకి చూడటానికి ఈ రెండు బైక్‌లు ఒకేలా కనిపించినా, నిశితంగా గమనిస్తే చాలా తేడాలు ఉన్నాయి. బుల్లెట్ 650 మోడల్‌లో ట్యాంక్ పైన చేత్తో గీసిన పిన్‌స్ట్రైప్స్, మెటల్ ట్యాంక్ బ్యాడ్జింగ్, వెనుక వైపు కొంచెం బాక్సీ తరహా ఫెండర్ ఉంటాయి. దీని లుక్ చాలా సింపుల్‌గా, రాయల్‌గా ఉంటుంది. అదే క్లాసిక్ 650 విషయానికి వస్తే.. ఇందులో క్రోమ్ ఫినిషింగ్ ఎక్కువగా ఉంటుంది. స్విచ్ గేర్, వీల్ హబ్స్, బాడీపై మెరిసే క్రోమ్ డిటైలింగ్ వల్ల ఇది పాతకాలపు సాంప్రదాయ రెట్రో బైక్‌లా కనిపిస్తుంది. సింపుల్ అండ్ క్లీన్ లుక్ కావాలనుకునే వారికి బుల్లెట్, ఎక్కువ హంగులు మెరుపులు కావాలనుకునే వారికి క్లాసిక్ నచ్చుతుంది.

సీటింగ్ సెటప్, రైడింగ్ కంఫర్ట్
రైడింగ్ కంఫర్ట్ విషయంలో ఈ రెండు బైక్‌ల మధ్య చాలా స్పష్టమైన తేడా కనిపిస్తుంది. బుల్లెట్ 650 బైక్‌లో సింగిల్-పీస్ స్టెప్డ్ సీట్ ఉంటుంది. ఇది మంచి థిక్ ప్యాడింగ్‌తో రావడం వల్ల రైడర్‌తో పాటు వెనుక కూర్చునే పిల్లియన్‎కు కూడా అద్భుతమైన కంఫర్ట్‌ను ఇస్తుంది. లాంగ్ రైడ్స్ వెళ్ళినప్పుడు బ్యాక్ పెయిన్ రాకుండా చూసుకుంటుంది. దీని హ్యాండిల్‌బార్ పొజిషన్ కూడా చాలా నేచురల్‌గా ఉంటుంది. కానీ క్లాసిక్ 650 లో విడిగా తీసేయడానికి వీలుండే రిమూవబుల్ పిల్లియన్ సీట్ ఉంటుంది. ఒంటరిగా తిరగాలనుకుంటే వెనుక సీటు తీసేయవచ్చు, కానీ కంఫర్ట్ పరంగా బుల్లెట్ సీటే టాప్ అని చెప్పాలి.

ఇంజన్, మెకానికల్ ఫీచర్స్
లుక్స్, సీటింగ్ లో తేడాలు ఉన్నప్పటికీ, బైక్ లోపల ఉండే ప్రాణం అంటే ఇంజన్ మాత్రం రెండింటికీ ఒకటే. ఈ రెండు బైక్‌లలోనూ 648cc ఎయిర్/ఆయిల్-కూల్డ్ ప్యారలల్-ట్విన్ ఇంజన్‌ను వాడారు. ఇది 7,250rpm వద్ద 47hp పవర్, 5,650rpm వద్ద 52.3Nm గరిష్ట టార్క్‌ను జనరేట్ చేస్తుంది. దీనికి 6-స్పీడ్ గేర్‌బాక్స్, స్లిప్-అండ్-అసిస్ట్ క్లచ్‌ను జతచేశారు. సస్పెన్షన్ పరంగా ముందు వైపు 120mm ట్రావెల్‌తో షోవా టెలిస్కోపిక్ ఫోర్క్స్, వెనుక వైపు 90mm ట్రావెల్‌తో ట్విన్ షాక్స్ ఉన్నాయి. రెండు బైక్‌ల బరువు కూడా సమానంగా 243 కేజీలు ఉంటుంది.

ఫీచర్లు, సేఫ్టీ
రాయల్ ఎన్‌ఫీల్డ్ ఈ రెండు బైక్‌లలో ఫీచర్లను కూడా ఒకేలా షేర్ చేసింది. బుల్లెట్ 650, క్లాసిక్ 650 రెండింటిలోనూ డిజి-అనలాగ్ ఇన్‌స్ట్రుమెంట్ క్లస్టర్ ఉంటుంది. దారి వెతుక్కోవడానికి వీలుగా టర్న్-బై-టర్న్ డైరెక్షన్లు చూపే ట్రిప్పర్ నావిగేషన్ పాడ్ (Tripper navigation pod) కూడా ఇరు బైక్‌లలో ఇచ్చారు. మొబైల్ ఛార్జింగ్ కోసం యూఎస్‌బీ ఛార్జర్ (USB Charger), బ్రేకింగ్ సేఫ్టీ కోసం డ్యూయల్-ఛానల్ ఏబీఎస్ (Dual-channel ABS) స్టాండర్డ్‌గా వస్తాయి. అలాగే రెండింటికీ 19/18-ఇంచుల ట్యూబ్డ్ వైర్-స్పోక్ వీల్స్ ఉంటాయి. గ్రౌండ్ క్లియరెన్స్ 154mm, సీట్ హైట్ 800mm గా సమానంగా ఉంటుంది.

బడ్జెట్ పరంగా ఏది బెస్ట్?
ధరల విషయానికి వస్తే, బుల్లెట్ 650 కేవలం రెండు కలర్ వేరియంట్లలో మాత్రమే వస్తుంది. కానన్ బ్లాక్, బాటిల్‌షిప్ బ్లూ కలర్స్ ఉన్న ఈ బైక్ ఎక్స్-షోరూమ్ ధర రూ.3.65 లక్షలుగా ఉంది. ఇక క్లాసిక్ 650 బేస్ వేరియంట్లు (బ్రంటింగ్‌థోర్ప్ బ్లూ, వల్లం రెడ్) ధర కూడా రూ.3.65 లక్షల నుంచే ప్రారంభమవుతుంది. కానీ ఇందులో కలర్స్ పెరిగే కొద్దీ ధరలు మారుతుంటాయి. టీల్ కలర్ ధర రూ.3.70 లక్షలు, బ్లాక్ క్రోమ్ ధర రూ.3.79 లక్షలు, టాప్ ఎండ్ వెర్షన్ అయిన 125వ యానివర్సరీ ఎడిషన్ (125th Anniversary Edition) ధర రూ.3.90 లక్షల వరకు ఉంటుంది.

ఏ బైక్ కొనుక్కోవాలి?
మీరు రూ.3.65 లక్షల బడ్జెట్‌లో మంచి క్లీన్ లుకింగ్ డిజైన్, లాంగ్ రైడింగ్‌కు అద్భుతమైన కంఫర్ట్ ఇచ్చే సింగిల్ పీస్ థిక్ సీట్ కావాలనుకుంటే కళ్ళు మూసుకుని బుల్లెట్ 650 వైపు వెళ్ళిపోవచ్చు. అలా కాకుండా, బైక్ నిండా క్రోమ్ మెరుపులతో హెవీ రెట్రో లుక్ ఉండాలి, విభిన్నమైన కలర్ ఆప్షన్లు కావాలి, బడ్జెట్ కొంచెం ఎక్కువైనా పర్లేదు అనుకుంటే క్లాసిక్ 650 పర్ఫెక్ట్ మ్యాచ్ అవుతుంది.