ఈ ఎన్‌ఫీల్డ్ బైక్‌కి ఎందుకింత క్రేజ్? ఒకే నెలలో 20 వేల మందికి పైగా షోరూమ్‌కు క్యూ కట్టారు

భారతదేశంలో క్లాసిక్ బైక్‌లకు ప్రత్యేక గుర్తింపును తెచ్చిన రాయల్ ఎన్‌ఫీల్డ్ (Royal Enfield) బ్రాండ్‌లో అత్యంత అందుబాటు ధరలో లభించే మోడల్‌గా హంటర్ 350 (Hunter 350) నిలుస్తోంది. రాయల్ ఎన్ఫీల్డ్ బైక్ అనగానే భారీ లుక్, ఘనమైన ఇంజిన్ సౌండ్, ప్రీమియం ఫీలింగ్ గుర్తుకు వస్తాయి. అయితే ఆ బ్రాండ్ అనుభూతిని తక్కువ ధరలో అందుబాటులోకి తీసుకొచ్చిన మోడల్ హంటర్ 350 కావడం దీని ప్రత్యేకత. తక్కువ ధర, యూత్‌ఫుల్ డిజైన్, నగర ప్రయాణాలకు అనువైన కాంపాక్ట్ సైజ్ ఈ మూడు ప్రధాన కారణాల వల్ల హంటర్ 350 ప్రతి నెలా భారత మార్కెట్లో మంచి అమ్మకాలను నమోదు చేస్తోంది. ముఖ్యంగా యువతలో ఈ బైక్‌కు భారీ ఆదరణ కనిపిస్తోంది.

జనవరి 2026లో కూడా ఈ బైక్ తన జోరును కొనసాగించింది. ఆ నెలలో మొత్తం 20,329 యూనిట్లు అమ్ముడవడం విశేషం. ఇది ఒక సాధారణ సంఖ్య కాదు; ప్రీమియం సెగ్మెంట్‌లో ఇంత స్థాయిలో అమ్మకాలు నమోదు కావడం బ్రాండ్ బలం ఎంత ఉందో తెలియజేస్తోంది. గత సంవత్సరం జనవరి 2025లో 15,914 యూనిట్లు మాత్రమే అమ్ముడవగా, ఈసారి 4,415 యూనిట్లు అదనంగా విక్రయించబడ్డాయి.

ఈ లెక్క ప్రకారం చూస్తే, సంవత్సరానికి సుమారు 27.74 శాతం వృద్ధి నమోదు కావడం గమనార్హం. అంటే, ఒకే ఏడాదిలో హంటర్ 350పై డిమాండ్ గణనీయంగా పెరిగిందని స్పష్టమవుతోంది. మార్కెట్లో పోటీ పెరుగుతున్నా, ఇతర బ్రాండ్లు కొత్త మోడళ్లు తీసుకొస్తున్నా, రాయల్ ఎన్ఫీల్డ్ హంటర్ 350 తన స్థానాన్ని మరింత బలంగా నిలబెట్టుకుంది. క్లాసిక్ స్టైల్‌తో పాటు ఆధునిక టచ్ కలగలిపిన దీని డిజైన్ జనాలను ఆకట్టుకుంటుంది.

హంటర్ 350 సంవత్సర ప్రాతిపదికన మంచి వృద్ధిని నమోదు చేసినప్పటికీ, నెలవారీగా మాత్రం స్వల్ప తగ్గుదల కనిపించింది. డిసెంబర్ 2025లో మొత్తం 20,654 వాహనాలు అమ్ముడవగా, జనవరి 2026లో ఆ సంఖ్య 20,329కు చేరింది. అంటే కొన్ని వందల వాహనాల తేడా మాత్రమే ఉంది. ఇది పెద్దగా ఆందోళన కలిగించే విషయం కాదు; కాలానుగుణ మార్పులు, కొనుగోలు ధోరణులు, పండుగల ప్రభావం వంటి కారణాలతో ఇలాంటి స్వల్ప హెచ్చుతగ్గులు సహజమే.

భారత దేశంలో ఈ వాహనం ప్రారంభ ధర సుమారు రూ. 1.38 లక్షలు (ఎక్స్ షోరూమ్). ఈ ధరతో రాయల్ ఎన్ఫీల్డ్ సంస్థ నుంచి లభించే అత్యంత సరసమైన మోటార్ సైకిల్‌గా ఇది నిలిచింది. తక్కువ ధరలోనే శక్తివంతమైన 350 ఘన సెంటీమీటర్ల ఇంజిన్ అనుభవం, ఆకర్షణీయమైన రూపకల్పన, నగర ప్రయాణాలకు అనువైన నిర్మాణం ఇవి కలిసి దీన్ని యువతకు ప్రత్యేకంగా దగ్గర చేస్తున్నాయి.

హంటర్ 350 శక్తివంతమైన 349cc ఎయిర్-ఆయిల్-కూల్డ్ సింగిల్-సిలిండర్ ఇంజిన్‌తో పనిచేస్తుంది, ఇది 20.2 hp శక్తిని, 27 Nm టార్క్‌ను 5-స్పీడ్ గేర్‌బాక్స్‌కు జతచేయబడి 20.2 hp శక్తిని ఉత్పత్తి చేస్తుంది. నగర రహదారులపై చురుకైన నడకతో పాటు, దూర ప్రయాణాల్లో కూడా స్థిరమైన పనితీరును ఈ ఇంజిన్ అందిస్తుంది. మైలేజ్ విషయానికి వస్తే, రాయల్ ఎన్ఫీల్డ్ హంటర్ 350 లీటరుకు సుమారు 36 కిలోమీటర్ల వరకు ప్రయాణిస్తుంది.

ఇది చాలా తేలికైనది కూడా. 90 శాతం పెట్రోల్ నింపినప్పుడు, రాయల్ ఎన్ఫీల్డ్ హంటర్ 350 బరువు కేవలం 181 కిలోలు. కాబట్టి దీనిని రైడ్ చేయడం కూడా చాలా సులభంగా ఉంటుంది. తక్కువ బరవుతో రాయల్ ఎన్‌ఫీల్డ్ బైక్ కావాలనుకును వారికి ఇది బాగా అనుకూలంగా ఉంటుంది. సాధారణంగా ఎన్‌ఫీల్డ్ బైకులు బరువుగా ఉంటాయి. కానీ ఇది మాత్రం తక్కువ బరువుతో కంఫర్ట్ ఫీలింగ్ ఇస్తుంది.