బండికి ఇది ఉంటే ప్రాణాలకు ఫుల్ గ్యారెంటీ.. ఈ ఫీచర్‌తో వస్తున్న టాప్-5 బడ్జెట్ స్కూటర్లు ఇవే

భారతదేశంలోని రద్దీగా ఉండే రోడ్లపై టూ వీలర్ ప్రయాణం ఎప్పుడూ సవాలుతో కూడుకున్నదే. ముఖ్యంగా అకస్మాత్తుగా బ్రేకులు వేయాల్సి వచ్చినప్పుడు చక్రాలు లాక్ అయిపోయి వాహనం అదుపు తప్పే ప్రమాదం ఉంటుంది. ఇలాంటి సమయాల్లో ప్రాణరక్షక కవచంలా పనిచేసేదే యాంటీ-లాక్ బ్రేకింగ్ సిస్టమ్ (ABS). సాధారణంగా ఖరీదైన బైక్‌లకే పరిమితమైన ఈ ఫీచర్, ఇప్పుడు స్కూటర్లలోనూ అందుబాటులోకి వస్తోంది. ప్రస్తుతం భారత మార్కెట్లో లభిస్తున్న టాప్-5 అత్యంత సరసమైన ఏబీఎస్ స్కూటర్ల వివరాలు తెలుసుకుందాం.

1. సుజుకి యాక్సెస్ 125 (Suzuki Access 125)
భారతదేశంలో అత్యధికంగా అమ్ముడవుతున్న 125సీసీ స్కూటర్లలో సుజుకి యాక్సెస్ ఒకటి. 125సీసీ విభాగంలో ఏబీఎస్ ఫీచర్‌ను పరిచయం చేసిన రెండో స్కూటర్‌గా ఇది రికార్డు సృష్టించింది. సుజుకి ఇందులో రెండు వేరియంట్లలో ఏబీఎస్ ఆప్షన్ ఇస్తోంది. రైడ్ కనెక్ట్ ఏబీఎస్ ధర రూ.92,328 కాగా, రైడ్ కనెక్ట్ టీఎఫ్ టీ ఏబీఎస్ ధర రూ. 98,378 (ఎక్స్-షోరూమ్)గా ఉంది.

ఈ స్కూటర్‌లో 124సీసీ సింగిల్ సిలిండర్ ఇంజన్ కలదు. ఇది 8.4 పీఎస్ పవర్, 10.2 ఎన్ఎమ్ టార్క్ ఉత్పత్తి చేస్తుంది. ముందు వైపు డిస్క్ బ్రేక్, వెనుక వైపు డ్రమ్ బ్రేక్ ఉండగా.. సింగిల్ ఛానల్ ఏబీఎస్ సేఫ్టీని అందిస్తుంది. బ్లూటూత్ కనెక్టివిటీ, డిజిటల్ మీటర్, ఎక్స్‌టర్నల్ ఫ్యూయల్ ఫిల్లర్ వంటి ఫీచర్లు దీని సొంతం.

2. టీవీఎస్ ఎన్‌టార్క్ 150 (TVS Ntorq 150)
టీవీఎస్ తన పాపులర్ ఎన్‌టార్క్ సిరీస్‌లో అత్యంత శక్తివంతమైన 150సీసీ మోడల్‌ను రీసెంట్‌గా లాంచ్ చేసింది. దీని ప్రారంభ ధర రూ. 1.09 లక్షలు. యువతను ఆకట్టుకునే స్పోర్టీ లుక్‌తో వచ్చే ఈ స్కూటర్, పెర్ఫార్మెన్స్ పరంగానూ అద్భుతంగా ఉంటుంది.

ఇందులో 149.7సీసీ ఎయిర్-కూల్డ్ ఇంజన్ ఉంది. ఇది 13.2 హెచ్‌పీ పవర్, 14.2 ఎన్ఎమ్ టార్క్ అందిస్తుంది. భద్రత కోసం ముందు డిస్క్ బ్రేక్‌తో పాటు సింగిల్ ఛానల్ ఏబీఎస్ అమర్చారు. స్మార్ట్‌ఫోన్ నోటిఫికేషన్లు, బ్లూటూత్ కనెక్టివిటీ వంటి ఫీచర్లతో ఈ స్మార్ట్ స్కూటర్ మార్కెట్లో దుమ్మురేపుతోంది.

3. ఏప్రిలియా ఎస్‌ఆర్ 175 (Aprilia SR 175)
ఇటాలియన్ బ్రాండ్ ఏప్రిలియా నుంచి వచ్చిన పవర్‌ఫుల్ స్కూటర్ ఎస్‌ఆర్ 175. పాత ఎస్‌ఆర్ 160 స్థానంలో వచ్చిన ఈ మోడల్ ధర రూ. 1.26 లక్షలు. స్కూటర్లలో రేసింగ్ అనుభూతిని కోరుకునే వారికి ఇది సరైన ఎంపిక.

ఇందులో 174.7సీసీ భారీ ఇంజన్ ఉంటుంది. ఇది 12.9 హెచ్‌పీ శక్తిని ఇస్తుంది. దీని ప్రత్యేకత ఏంటంటే.. ఇందులో 14 అంగుళాల పెద్ద చక్రాలు ఉంటాయి. ఇవి హై-స్పీడ్ వద్ద మంచి స్టెబిలిటీని ఇస్తాయి. దీనికి ముందు డిస్క్ బ్రేక్, సింగిల్ ఛానల్ ఏబీఎస్ తోడుగా ఉంటాయి. టీఎఫ్ టీ డిస్‌ప్లే, ఎల్ఈడీ లైటింగ్ దీనికి ప్రీమియం లుక్ ఇస్తాయి.

4. వీఎల్ఎఫ్ మాబ్‌స్టర్ 135 (VLF Mobster 135)
ఇటలీకి చెందిన మరో బ్రాండ్ వీఎల్ఎఫ్. మాబ్‌స్టర్ 135 ధర రూ. 1.30 లక్షలు. ఈ జాబితాలో డ్యూయల్ ఛానల్ ఏబీఎస్ (ముందు, వెనుక రెండు చక్రాలకు ఏబీఎస్) ఉన్న ఏకైక స్కూటర్ ఇదే కావడం విశేషం.

ఇందులో 125సీసీ ఇంజన్ ఉన్నప్పటికీ, అది 12.1 హెచ్‌పీ పవర్ ఇస్తుంది. దీని బ్రేకింగ్ సిస్టమ్ అత్యంత శక్తివంతమైనది. ముందు 230ఎమ్ఎమ్, వెనుక 220ఎమ్ఎమ్ డిస్క్ బ్రేక్‌లు ఉన్నాయి. సేఫ్టీ కోసం ఏబీఎస్ మాత్రమే కాకుండా ట్రాక్షన్ కంట్రోల్ ఫీచర్ కూడా ఇచ్చారు. కీ-లెస్ ఇగ్నిషన్, 5 అంగుళాల టీఎఫ్ టీ డిస్‌ప్లే దీని మరిన్ని ప్రత్యేకతలు.

5. హీరో జూమ్ 160 (Hero Xoom 160)
లిక్విడ్-కూల్డ్ ఇంజన్‌తో వస్తున్న హీరో యొక్క అత్యంత శక్తివంతమైన స్కూటర్ జూమ్ 160. దీని ధర రూ. 1.37 లక్షలు. అడ్వెంచర్ టూరింగ్ తరహా డిజైన్‌తో వచ్చే ఈ స్కూటర్, లాంగ్ రైడ్స్‌కు కూడా అనుకూలంగా ఉంటుంది.

ఇందులో 156సీసీ లిక్విడ్-కూల్డ్ ఇంజన్ ఉంది. ఇది 14.6 హెచ్‌పీ పవర్, 14 ఎన్ఎమ్ టార్క్ ఇస్తుంది. ముందు డిస్క్ బ్రేక్, సింగిల్ ఛానల్ ఏబీఎస్ కలిగి ఉంది. పెద్ద విండ్‌స్క్రీన్, లాంగ్ ట్రావెల్ టెలిస్కోపిక్ ఫోర్క్స్ వల్ల రోడ్లపై ప్రయాణం చాలా సులభంగా ఉంటుంది.