అందం.. ఆకర్షణ.. ఇప్పుడు అదిరిపోయే భద్రత.. సుజుకి యాక్సెస్‎లో ఇక ఫుల్ సేఫ్టీ వచ్చేసింది భయ్యా

భారతదేశ టూ వీలర్ మార్కెట్లో 125cc స్కూటర్ల విభాగం ఎప్పుడూ హాట్ కేకులాగే ఉంటుంది. ఇక్కడ ఇన్నాళ్లూ హోండా యాక్టివా 125, టీవీఎస్ జూపిటర్ 125 జెండా ఎగురవేస్తూ వస్తున్నాయి. అయితే వీటికి గట్టి పోటీనిస్తూ, జపాన్ దిగ్గజం సుజుకి తన ఐకానిక్ మోడల్ సుజుకి యాక్సెస్ 125(Suzuki Access 125)లో సరికొత్త మార్పులు చేసి మార్కెట్లోకి వదిలింది. ఈసారి కేవలం లుక్స్ మాత్రమే కాదు, భద్రతకు పెద్దపీట వేస్తూ రెండు కొత్త వేరియంట్లను సుజుకి పరిచయం చేసింది. అవే రైడ్ కనెక్ట్ ఏబీఎస్ ఎడిషన్, రైడ్ కనెక్ట్ TFT ఏబీఎస్ ఎడిషన్. ఈ కొత్త వేరియంట్ల రాకతో హోండా, టీవీఎస్ కంపెనీలకు ముచ్చెమటలు పట్టడం ఖాయంగా కనిపిస్తోంది.

చాలామంది స్కూటర్ కొనేటప్పుడు కేవలం మైలేజీ, ధర మాత్రమే చూస్తారు. కానీ సుజుకి ఈసారి భద్రత పై దృష్టి పెట్టింది. ఈ రెండు కొత్త వేరియంట్లలోనూ సింగిల్ ఛానల్ ఏబీఎస్ (Anti-lock Braking System) సౌకర్యాన్ని అందించారు. సాధారణంగా వానాకాలంలో లేదా ఇసుక ఉన్న రోడ్ల మీద హఠాత్తుగా బ్రేక్ వేస్తే స్కూటర్ స్కిడ్ అయి పడిపోయే ప్రమాదం ఉంటుంది. కానీ ఏబీఎస్ ఉండటం వల్ల చక్రం లాక్ అవ్వదు, తద్వారా స్కూటర్ స్థిరంగా ఆగుతుంది. ప్రాణాలు కాపాడే ఈ ఫీచర్ ఇప్పుడు యాక్సెస్ లో రావడం గొప్ప విషయమని ఆటోమొబైల్ నిపుణులు చెబుతున్నారు.

సుజుకి ఈ స్కూటర్లను బడ్జెట్ కు తగినట్లే లాంచ్ చేసింది. సుజుకి యాక్సెస్ రైడ్ కనెక్ట్ ఏబీఎస్ ఎడిషన్ ఎక్స్-షోరూమ్ ధర సుమారు రూ.92,328 గా ఉంది. సుజుకి యాక్సెస్ రైడ్ కనెక్ట్ TFT ఏబీఎస్ ఎడిషన్లో అదనంగా కలర్ TFT డిస్‌ప్లే ఉంటుంది. దీని ధర సుమారు రూ.98,378 (ఎక్స్-షోరూమ్).

సుజుకి యాక్సెస్ ఎప్పుడూ తన స్మూత్ ఇంజిన్ కు పెట్టింది పేరు. ఈ కొత్త వేరియంట్లలో కూడా అదే నమ్మకమైన 124 cc, సింగిల్ సిలిండర్, ఎయిర్ కూల్డ్ ఇంజిన్ ను అమర్చారు. ఇది 6,500 RPM వద్ద 8.43 BHP పవర్‌ను, 5,000 RPM వద్ద 10.2 NM టార్క్‌ను ఉత్పత్తి చేస్తుంది. అంటే సిటీ ట్రాఫిక్ లో దూసుకుపోవాలన్నా, హైవే మీద స్థిరంగా వెళ్లాలన్నా ఈ ఇంజిన్ మీకు సూపర్ ఫీల్ ఇస్తుంది. దీనికి జతగా ఉన్న CVT గేర్ బాక్స్ రైడింగ్ ను మరింత సులభతరం చేస్తుంది.

సుజుకి తన కస్టమర్ల అభిరుచులకు తగ్గట్లుగా రంగుల విషయంలో ఎక్కడా తగ్గలేదు. రెండు వేరియంట్లలోనూ చెరో 5 ఆకర్షణీయమైన కలర్ ఆప్షన్లను ఇచ్చింది:

రైడ్ కనెక్ట్ ఏబీఎస్ ఎడిషన్: మెటాలిక్ మ్యాట్ బ్లాక్, మెటాలిక్ మ్యాట్ స్టెల్లార్ బ్లూ, పర్ల్ గ్రేస్ వైట్, సాలిడ్ ఐస్ గ్రీన్, పర్ల్ షైనీ బీజ్.
రైడ్ కనెక్ట్ TFT ఏబీఎస్ ఎడిషన్: పైన చెప్పిన రంగులతో పాటు ప్రత్యేకంగా పర్ల్ మ్యాట్ ఆక్వా సిల్వర్ రంగులో ఇది లభిస్తుంది. ముఖ్యంగా ఈ మ్యాట్ ఫినిషింగ్ రంగులు యువతను అమితంగా ఆకట్టుకుంటున్నాయి.

ఈ స్కూటర్ కేవలం మెకానికల్ గానే కాదు, డిజిటల్ గా కూడా చాలా అడ్వాన్స్‌డ్ గా ఉంది. రైడ్ కనెక్ట్ ఫీచర్ ద్వారా మీ స్మార్ట్ ఫోన్ ను స్కూటర్ కు కనెక్ట్ చేసుకోవచ్చు. దీనివల్ల మీకు వచ్చే కాల్స్, ఎస్ఎంఎస్ అలర్ట్స్, వాట్సాప్ నోటిఫికేషన్లు నేరుగా స్కూటర్ స్క్రీన్ మీదే కనిపిస్తాయి. అంతేకాదు, టర్న్-బై-టర్న్ నావిగేషన్ సదుపాయం కూడా ఉండటం వల్ల తెలియని దారుల్లో కూడా ఫోన్ చూడకుండానే సులభంగా ప్రయాణించవచ్చు. TFT ఎడిషన్ లో ఉండే కలర్ స్క్రీన్ అయితే ప్రీమియం కార్ల అనుభూతిని ఇస్తుంది.

ప్రస్తుతం మార్కెట్లో హోండా యాక్టివా 125, టీవీఎస్ జూపిటర్ 125 లు గట్టి సవాల్ విసురుతున్నాయి. హోండా తన బ్రాండ్ వాల్యూ నమ్ముకోగా, టీవీఎస్ తన ఫ్యూయల్ ట్యాంక్ ప్లేస్‌మెంట్ (ముందు వైపు), పెద్ద అండర్ సీట్ స్టోరేజ్ తో దూసుకుపోతోంది. అయితే ఇప్పుడు సుజుకి యాక్సెస్ ఏబీఎస్, TFT నావిగేషన్ వంటి ఫీచర్లతో రావడం వల్ల, టెక్నాలజీ, సేఫ్టీ కోరుకునే కస్టమర్లు సుజుకి వైపు మొగ్గు చూపే అవకాశం ఉంది. ధర విషయంలో కూడా సుజుకి చాలా తెలివిగా పోటీ ఇస్తోంది.

డ్రైవ్‌స్పార్క్ తెలుగు అభిప్రాయం : ఏబీఎస్ అనేది నేటి కాలంలో లగ్జరీ కాదు, అవసరం. ముఖ్యంగా చిన్న చక్రాలు ఉండే స్కూటర్లకు ఇది చాలా ముఖ్యం. సుజుకి కేవలం 125cc స్కూటర్ లోనే ఈ ఫీచర్ తేవడం ఆహ్వానించదగ్గ పరిణామం. ఒకవేళ మీరు స్టైలిష్ గా ఉంటూ, రోడ్డు మీద సేఫ్ గా ప్రయాణించాలి అనుకుంటే, ఖచ్చితంగా సుజుకి యాక్సెస్ 125 కొత్త వేరియంట్లు మీ ఫస్ట్ ఛాయిస్ కావాలి.