సుజుకి యాక్సెస్ స్కూటర్‌కు భారీ డిమాండ్.. సేల్స్ చూసి ఇండస్ట్రీ షాక్, ఏడాది ప్రారంభంలోనే దుమ్మురేపింది

జపాన్‌కు చెందిన ప్రముఖ ద్విచక్ర వాహన తయారీ సంస్థ సుజుకి (Suzuki) భారత మార్కెట్లో తనకంటూ ప్రత్యేక గుర్తింపు సంపాదించుకుంది. నమ్మకమైన ఇంజిన్ పనితీరు, తక్కువ నిర్వహణ ఖర్చు, మంచి మైలేజీ ఈ మూడు అంశాలు సుజుకి వాహనాలను భారతీయ వినియోగదారులలో ప్రాచుర్యం పొందేలా చేశాయి. ముఖ్యంగా స్కూటర్ సెగ్మెంట్‌లో అయితే, కంపెనీ స్థానం మరింత బలంగా ఉంది. ఆ విభాగంలోనే అత్యంత ప్రజాదరణ పొందిన మోడల్ సుజుకి యాక్సెస్ 125 (Suzuki Access 125). నగర ప్రయాణాలకు అనుకూలమైన డిజైన్, సౌకర్యవంతమైన సీటింగ్, మంచి మైలేజీ, స్మూత్ రైడింగ్ అనుభవం కారణంగా ఈ స్కూటర్ ప్రతి నెలా అత్యధికంగా అమ్ముడవుతున్న మోడళ్లలో ఒకటిగా నిలుస్తోంది.

యువత నుంచి కుటుంబాల వరకు విభిన్న వర్గాల వినియోగదారులు యాక్సెస్‌ను తమ రోజువారీ ప్రయాణాల కోసం ఎంచుకుంటున్నారు. 2026 సంవత్సరాన్ని ఈ మోడల్ అద్భుతమైన గణాంకాలతో ప్రారంభించింది. జనవరి 2026లో భారతదేశవ్యాప్తంగా మొత్తం 69,042 సుజుకి యాక్సెస్ స్కూటర్లు అమ్ముడయ్యాయి. గత ఏడాది అదే నెలలో, అంటే జనవరి 2025లో, 54,587 యూనిట్లు మాత్రమే విక్రయించబడ్డాయి. అంటే ఈసారి 14,455 యూనిట్లు అదనంగా అమ్ముడయ్యాయి.

ఇది శాతం పరంగా చూస్తే 26.48 శాతం వృద్ధి అని చెప్పుకోవచ్చు. ద్విచక్ర వాహనాల మార్కెట్లో ఇది గణనీయమైన పెరుగుదలగా భావించాలి. ఈ వృద్ధి వెనుక అనేక కారణాలు ఉన్నాయి. నగర ట్రాఫిక్ పరిస్థితుల్లో సులభంగా నడపగలగడం, ఇంధన సామర్థ్యం, సుజుకి బ్రాండ్‌పై ఉన్న విశ్వాసం ఇవన్నీ కలిపి యాక్సెస్ 125 అమ్మకాలను పెంచుతున్నాయి. అదనంగా, వివిధ రంగుల్లో లభించడం, ఆధునిక ఫీచర్లను అందించడం కూడా యువతను ఆకర్షిస్తోంది.

భారత స్కూటర్ మార్కెట్లో స్థిరమైన డిమాండ్‌ను కొనసాగిస్తున్న సుజుకి యాక్సెస్ 125 ధర పరంగా కూడా వినియోగదారులకు అందుబాటులోనే ఉంది. ఈ స్కూటర్ ప్రారంభ ఎక్స్-షోరూమ్ ధర రూ. 78,184 నుండి మొదలవుతుంది. అంటే బడ్జెట్ పరిధిలోనే మంచి బ్రాండ్, పనితీరు, ఫీచర్లు ప్యాకేజీగా అందుబాటులోకి వస్తుంది. ఇంజిన్ విషయానికి వస్తే, యాక్సెస్ 125లో 124cc ఎయిర్-కూల్డ్, సింగిల్-సిలిండర్ ఇంజిన్ అమర్చారు.

ఈ ఇంజిన్ 8.4 హెచ్‌పి శక్తిని, 10.2 ఎన్ఎమ్ టార్క్‌ను ఉత్పత్తి చేస్తుంది. నగర ప్రయాణాలకు సరిపోయే స్మూత్ పవర్ డెలివరీ దీనికి ప్రధాన బలం. ట్రాఫిక్ పరిస్థితుల్లో సులభంగా నడపగలగడం, సైలెంట్ పనితీరు, మంచి మైలేజీ కారణంగా ఇది రోజువారీ వినియోగానికి అనుకూలంగా మారింది. ఫీచర్ల పరంగా కూడా యాక్సెస్ 125 తన సెగ్మెంట్‌లో ముందంజలో ఉంది. రైడ్ కనెక్ట్ టెక్నాలజీ ద్వారా స్మార్ట్‌ఫోన్ కనెక్టివిటీ సదుపాయం అందించబడింది.

4.2-అంగుళాల TFT డిజిటల్ డిస్‌ప్లే రైడర్‌కు అవసరమైన సమాచారం స్పష్టంగా చూపిస్తుంది. కాల్ అలర్ట్స్, మెసేజ్ నోటిఫికేషన్స్, నావిగేషన్ వివరాలు డిస్‌ప్లేలో చూడవచ్చు. భద్రత పరంగా, 125cc విభాగంలో సింగిల్-ఛానల్ ABS అందించిన తొలి స్కూటర్‌గా యాక్సెస్ ప్రత్యేక గుర్తింపు పొందింది. కొత్తగా ప్రారంభించిన వెర్షన్‌లో కూడా సింగిల్-ఛానల్ ABS కొనసాగించడం విశేషం. అదనంగా LED లైటింగ్ వ్యవస్థ, USB ఛార్జింగ్ పోర్ట్ వంటి ఆధునిక సదుపాయాలు అందుబాటులో ఉన్నాయి.

ఇది ఎలక్ట్రిక్ వేరియంట్‌లో కూడా కొనుగోలు చేయడానికి ఉంది. సుజుకి ఈ-యాక్సెస్ పేరుతో అమ్ముడవుతున్న ఈ ఎలక్ట్రిక్ స్కూటర్ ప్రారంభ ధర రూ.1,91,962గా నిర్ణయించారు. సుజుకి యాక్సెస్ స్కూటర్ CNG వెర్షన్‌ను అభివృద్ధి చేస్తోందని సమాచారం. దీని మైలేజ్ కిలోకు 90 కిలోమీటర్లు ఉండవచ్చని, అతి త్వరలోనే ఇది అమ్మకానికి అందుబాటులో ఉండే అవకాశం ఉంది.