ఫోన్ కంటే పెద్ద డిస్ప్లే.. స్కూటర్ లోనే మ్యాపులు చూసేయొచ్చు.. దేశం గర్వించే టెక్నాలజీతో సుజుకి సెన్సేషన్

సుజుకి మోటార్‌సైకిల్ ఇండియా నుంచి సరికొత్త బర్గ్‌మాన్ స్ట్రీట్ సెకండ్ జనరేషన్ స్కూటర్ లాంచ్ అయ్యింది. గురుగ్రామ్ వేదికగా సుజుకి మోటార్‌సైకిల్ ఇండియా తన ఐకానిక్ స్కూటర్ బర్గ్‌మాన్ స్ట్రీట్ (Burgman Street)లో సెకండ్ జనరేషన్ మోడల్‌ను ఘనంగా విడుదల చేసింది. 2018లో తొలిసారి భారత్‌లోకి అడుగుపెట్టిన ఈ మ్యాక్సీ స్టైల్ స్కూటర్, అతి తక్కువ కాలంలోనే 125cc సెగ్మెంట్‌లో ఒక ప్రత్యేక గుర్తింపు తెచ్చుకుంది. ఇప్పుడు వన్‌ అండ్ ఓన్లీ (ONE & ONLY) అనే కాన్సెప్ట్‌తో మరింత పవర్‌ఫుల్ గా, స్టైలిష్ గా మన ముందుకు వచ్చింది. కేవలం మూడు ఏళ్లలోనే దీని అమ్మకాలు రెట్టింపు అయ్యాయంటే ఈ స్కూటర్ కు ఉన్న క్రేజ్ ఏంటో అర్థం చేసుకోవచ్చు.

డిజైన్ లో స్లీక్ మోడ్రన్ మ్యాజిక్
కొత్త బర్గ్‌మాన్ స్ట్రీట్ చూడటానికి చాలా షార్ప్‌గా, అదే సమయంలో ఎంతో ఎలిగెంట్‌గా కనిపిస్తుంది. దీని బాడీ వర్క్ మీద ఉన్న కర్వ్‌లు కారు లాంటి ప్రీమియం అనుభూతిని ఇస్తాయి. ఇందులో బాడీ మౌంటెడ్ స్ప్లిట్ లెన్స్ LED హెడ్‌లైట్లు, సరికొత్త LED టర్న్ సిగ్నల్స్, వెనుక భాగంలో అప్‌డేటెడ్ LED కాంబినేషన్ లైట్లను అమర్చారు. డార్క్ స్మోక్డ్ విండ్‌స్క్రీన్, మెటాలిక్ ఫినిషింగ్ ఎంబ్లమ్స్, పైనకి వాలి ఉన్న స్టైలిష్ మఫ్లర్ (సైలెన్సర్) దీనికి విదేశీ స్కూటర్ లాంటి లుక్ ఇస్తాయి.

మరింత సౌకర్యం.. మెరుగైన పెర్ఫార్మెన్స్
నగరాల్లో ప్రయాణించే వారికి సౌకర్యం ఎంత ముఖ్యమో సుజుకి బాగా గుర్తిస్తోంది. అందుకే ఈ కొత్త మోడల్‌లో తేలికపాటి, దృఢమైన ఫ్రేమ్‌ను వాడారు. దీనివల్ల ట్రాఫిక్‌లో స్కూటర్‌ను సులభంగా తిప్పవచ్చు. పొడవైన వీల్‌బేస్, ట్యూన్డ్ సస్పెన్షన్ వల్ల హైవేల మీద కూడా స్కూటర్ చాలా నిలకడగా వెళ్తుంది. కాళ్ళు చాపుకోవడానికి ఫ్లెక్సిబుల్ ఫ్లోర్‌బోర్డ్, వెడల్పాటి సీటు దీని ప్రత్యేకతలు. కంబైన్డ్ బ్రేక్ సిస్టమ్ (CBS) ఉండటం వల్ల బ్రేకులు వేసినప్పుడు బండి స్కిడ్ అవ్వకుండా సురక్షితంగా ఆగుతుంది.

ఇంజిన్ సామర్థ్యం, టెక్నాలజీ
ఈ స్కూటర్‌లో సుజుకి ఎకో పర్ఫార్మెన్స్ (SEP) టెక్నాలజీతో కూడిన 124cc, 4-స్ట్రోక్, సింగిల్ సిలిండర్ ఇంజిన్‌ను వాడారు. ఇది 6.2 kW పవర్, 10.2 Nm టార్క్‌ను ఉత్పత్తి చేస్తుంది. తక్కువ, మీడియం స్పీడులో కూడా స్మూత్ గా వెళ్లేలా దీన్ని రూపొందించారు. మైలేజ్ విషయంలోనూ ఇది వినియోగదారులను నిరాశపరచదు. యాక్సెస్ 125 (Access 125)లో వాడే అదే నమ్మకమైన ఇంజిన్ ప్లాట్‌ఫారమ్ మీద దీన్ని నిర్మించడం విశేషం.

ప్రాక్టికాలిటీ, స్టోరేజ్
స్కూటర్ అంటే సామాన్లు పెట్టుకోవడానికి వీలుగా ఉండాలి కదా. అందుకే ఇందులో 24.6 లీటర్ల భారీ అండర్ సీట్ స్టోరేజ్‌ను అందించారు. ముందు భాగంలో స్టోరేజ్ పాకెట్స్, రెండు యుటిలిటీ హుక్స్, ఫోన్ ఛార్జింగ్ కోసం USB అవుట్‌లెట్ కూడా ఉన్నాయి. ఇక పెట్రోల్ పోయించుకోవడానికి సీటు దిగాల్సిన పని లేకుండా, వెనుక వైపున టెయిల్ మౌంటెడ్ ఫ్యూయల్ లిడ్ ఇచ్చారు. ఫ్యూయల్ ట్యాంక్ కెపాసిటీ 5.5 లీటర్లు.

రైడ్ కనెక్ట్ TFT ఎడిషన్ - హైటెక్ ఫీచర్లు
ఈ స్కూటర్ రెండు వేరియంట్లలో లభిస్తుంది. అందులో రైడ్ కనెక్ట్ TFT ఎడిషన్ చాలా స్పెషల్. ఇందులో 4.2 ఇంచుల కలర్ TFT LCD స్క్రీన్ ఉంటుంది. ఇది మీ స్మార్ట్‌ఫోన్‌కు కనెక్ట్ అయ్యి నావిగేషన్, కాల్ అలర్ట్స్ వంటి సమాచారాన్ని చూపిస్తుంది. అలాగే ఇందులో కీలెస్ సిస్టమ్ (Keyless System) కూడా ఉంది. అంటే జేబులో కీ ఉంటే చాలు, బటన్ నొక్కి బండి స్టార్ట్ చేయొచ్చు. ఆన్సర్-బ్యాక్ ఫంక్షన్ ద్వారా పార్కింగ్‌లో మీ స్కూటర్ ఎక్కడుందో ఈజీగా కనిపెట్టవచ్చు.

ధర, లభ్యత
కొత్త బర్గ్‌మాన్ స్ట్రీట్ ఏప్రిల్ 8, 2026 నుంచి అన్ని సుజుకి షోరూమ్‌లలో అందుబాటులో ఉంటుంది.
రైడ్ కనెక్ట్ ఎడిషన్: రూ.1,01,944 (ఎక్స్‌షోరూమ్ ఢిల్లీ). ఇది రాయల్ బ్రాంజ్, మ్యాట్ బ్లాక్ వంటి 5 రంగుల్లో దొరుకుతుంది.
రైడ్ కనెక్ట్ TFT ఎడిషన్: రూ.1,13,220 (ఎక్స్‌షోరూమ్ ఢిల్లీ). ఇది డ్యూయల్ టోన్ కలర్స్ (కాపర్ ఫినిషింగ్‌తో) లభిస్తుంది.