బడ్జెట్ ధరలో బుల్లెట్ స్పీడ్.. కుర్రాళ్లకు పిచ్చెక్కించే టాప్ 5 బడ్జెట్ స్పోర్ట్స్ బైక్స్ ఇవే

తక్కువ బడ్జెట్‌లో అదిరిపోయే లుక్, మెరుపు వేగం, గుండెలు అదిరిపోయే పెర్ఫార్మెన్స్ ఇచ్చే స్పోర్ట్స్ బైక్ కొనాలని చాలా మంది కలలు కంటారు. ఒకప్పుడు స్పోర్ట్స్ బైక్ అంటే లక్షల్లో పోయాల్సి వచ్చేది, కానీ ఇప్పుడు పరిస్థితి మారింది. ప్రముఖ దిగ్గజ సంస్థలు సామాన్యులకు సైతం అందుబాటులో ఉండేలా 125cc నుంచి 200cc లోపు బడ్జెట్ ఫ్రెండ్లీ స్పోర్ట్స్ బైక్‌లను మార్కెట్లోకి తెచ్చాయి. కేవలం 89 వేల రూపాయల నుంచే స్టైలిష్ బైక్‌లు లభిస్తున్నాయి. అవేంటో, వాటి ప్రత్యేకతలు ఏంటో వివరంగా తెలుసుకుందాం.

1. హీరో ఎక్స్‌ట్రీమ్ 125ఆర్ (Hero Xtreme 125R):
ఈ జాబితాలో అందరికంటే చౌకైనది, అందరికంటే స్టైలిష్‌గా ఉండేది హీరో ఎక్స్‌ట్రీమ్ 125ఆర్. దీని ఎక్స్-షోరూమ్ ధర సుమారు రూ.89,000 నుంచి ప్రారంభమవుతుంది. తక్కువ బడ్జెట్‌లో స్పోర్టీ లుక్ కావాలనుకునే యువతకు ఇది వరం లాంటిది. ఇందులో 124.7cc ఇంజిన్ ఉంది, ఇది 11.4 bhp పవర్‌ను ఉత్పత్తి చేస్తుంది. దీని అతిపెద్ద ప్లస్ పాయింట్ మైలేజ్. ఇది లీటరుకు సుమారు 66 కిలోమీటర్ల వరకు మైలేజ్ ఇస్తుంది. ఎల్‌ఈడీ హెడ్ ల్యాంప్స్, షార్ప్ డిజైన్ చూస్తే ఇది 125సీసీ బైక్ అంటే ఎవరూ నమ్మరు. మధ్యతరగతి కుర్రాళ్లకు ఇది పక్కా స్పోర్ట్స్ మెషిన్.

2. టీవీఎస్ అపాచీ ఆర్‌టీఆర్ 160 4వి (TVS Apache RTR 160 4V):
రేసింగ్ ప్రియులకు అపాచీ అంటే ఒక ఎమోషన్. ఈ బైక్ సుమారు రూ.1.16 లక్షల నుంచి రూ.1.39 లక్షల ధరలో లభిస్తోంది. ఇందులో 159.7cc పవర్ఫుల్ ఇంజిన్ ఉంది, ఇది 17.3 bhp పవర్‌ను ఇస్తుంది. ఇది రయ్ మంటూ దూసుకుపోవడమే కాదు, ఇందులో రెయిన్, అర్బన్, స్పోర్ట్ అనే మూడు రైడింగ్ మోడ్స్ కూడా ఉన్నాయి. స్మార్ట్ కనెక్ట్ ఫీచర్ ద్వారా మీ ఫోన్‌ను బైక్‌కు కనెక్ట్ చేసుకోవచ్చు. లీటరుకు 45 కిలోమీటర్ల మైలేజీతో సిటీ రైడింగ్‌కు ఇది బెస్ట్ ఆప్షన్.

3. బజాజ్ పల్సర్ ఎన్160 (Bajaj Pulsar N160):
పల్సర్ సిరీస్‌లో వచ్చిన కొత్త తరం బైక్ ఇది. దీని ధర రూ.1.13 లక్షల నుంచి రూ.1.26 లక్షల వరకు ఉంటుంది. ఇందులో 164.8cc ఇంజిన్ అమర్చారు. ఈ బైక్ చూడటానికి చాలా అగ్రెసివ్‌గా ఉంటుంది. ఇందులో ఉన్న అండర్-బెల్లీ ఎగ్జాస్ట్ సౌండ్ కుర్రాళ్లకు కిక్ ఇస్తుంది. ముఖ్యంగా ఈ సెగ్మెంట్‌లో డ్యూయల్ ఛానల్ ఏబీఎస్ (ABS) ఫీచర్‌తో వస్తున్న ఏకైక బైక్ ఇదే కావచ్చు. దీనివల్ల బైక్ వేగంగా వెళ్తున్నప్పుడు సడన్ బ్రేక్ వేసినా స్కిడ్ అవ్వకుండా సురక్షితంగా ఆగుతుంది. ఇది సుమారు 44 కిలోమీటర్ల మైలేజీని ఇస్తుంది.

4. బజాజ్ పల్సర్ ఎన్ఎస్200 (Bajaj Pulsar NS200):
మీకు అసలైన వేగం కావాలంటే పల్సర్ ఎన్ఎస్200 వైపు చూడాల్సిందే. దీని ధర రూ.1.33 లక్షల నుంచి రూ.1.58 లక్షల మధ్య ఉంటుంది. ఇందులో 199.5cc పవర్‌ఫుల్ ఇంజిన్ ఉంది, ఇది ఏకంగా 24.1 bhp పవర్‌ను విడుదల చేస్తుంది. వేగంగా దూసుకెళ్లడంలో దీనికి దీనికి సాటి లేదు. అగ్రెసివ్ లుక్, పెరిమీటర్ ఫ్రేమ్ దీనికి ప్రత్యేక ఆకర్షణ. అయితే పవర్ ఎక్కువ కాబట్టి మైలేజ్ కొంచెం తక్కువగా (36 kmpl) ఉంటుంది. కానీ ప్యూర్ స్పోర్ట్స్ బైక్ అనుభూతిని ఇది పక్కాగా అందిస్తుంది.

5. యమహా ఎంటి 15 వి2 (Yamaha MT 15 V2):
యూత్ ఐకాన్ బైక్ అంటే యమహా ఎంటి 15. దీని ధర రూ. 1.59 లక్షల నుంచి రూ.1.74 లక్షల వరకు ఉంటుంది. ఇందులో 155cc ఇంజిన్ ఉన్నప్పటికీ, దీని పెర్ఫార్మెన్స్ మాత్రం అద్భుతంగా ఉంటుంది. వీవీఏ (VVA) టెక్నాలజీ వల్ల ఇంజిన్ స్మూత్‌గా ఉంటుంది. స్లిప్పర్ క్లచ్ ఫీచర్ వల్ల గేర్లు మార్చడం చాలా తేలిక. దీని డిజైన్ చూడటానికి ఒక ఏలియన్ లాగా లేదా రోబో లాగా చాలా కొత్తగా ఉంటుంది. ఇది లీటరుకు 47 కిలోమీటర్ల మైలేజీని ఇస్తుంది. తక్కువ బరువు ఉండటం వల్ల ట్రాఫిక్‌లో సులభంగా నడపవచ్చు.