హెల్మెట్ రెడీ చేసుకోండి..బుల్లెట్ సప్పుడు ఊరంతా వినపడాల్సిందే..రూ.2.50లక్షల్లోపు టాప్ 6 బైకులివే

రాయల్ ఎన్‌ఫీల్డ్.. ఈ పేరు వింటేనే బైక్ లవర్స్‌లో ఒక రకమైన పూనకం వస్తుంది. ఆ గంభీరమైన డుగ్ డుగ్ శబ్దం, క్లాసిక్ లుక్ ఏ బైకుకూ రాదు. అందుకే చాలామంది సామాన్యుల నుంచి సెలబ్రిటీల వరకు ఈ బుల్లెట్ బైక్ కొనాలని కలలు కంటుంటారు. అయితే, రాయల్ ఎన్‌ఫీల్డ్ అంటే భారీ ధర ఉంటుందని చాలామంది భయపడతారు. కానీ, ప్రస్తుతం మార్కెట్లో రూ.2.50 లక్షల కంటే తక్కువ బడ్జెట్ లోనే అదిరిపోయే మోడల్స్ అందుబాటులో ఉన్నాయి. మీరు మొదటిసారి రాయల్ ఎన్‌ఫీల్డ్ కొనాలని ప్లాన్ చేస్తుంటే, మీ బడ్జెట్ కు తగ్గట్టుగా ఉన్న టాప్ 6 బైకుల వివరాలు తెలుసుకుందాం.

1. రాయల్ ఎన్‌ఫీల్డ్ హంటర్ 350 (Hunter 350)
మీరు ఒక తేలికపాటి, స్టైలిష్ బైక్ కావాలనుకుంటే హంటర్ 350 బెస్ట్ ఆప్షన్. ఇది చూడటానికి చాలా మోడ్రన్‌గా ఉంటుంది. సిటీ ట్రాఫిక్‌లో ఈ బైక్ నడపడం చాలా సులభం. ఇందులో 349.34 సీసీ ఇంజిన్ ఉంటుంది. ఇది 20.2 bhp పవర్, 27 Nm టార్క్‌ను ఉత్పత్తి చేస్తుంది. వేగంగా ఛార్జ్ అయ్యే యూఎస్‌బీ పోర్ట్, ఎల్ఈడీ హెడ్‌లైట్ వంటి మోడ్రన్ ఫీచర్లు ఇందులో ఉన్నాయి. దీని ధర రూ.1.37 లక్షల నుంచి రూ.1.66 లక్షల వరకు (ఎక్స్-షోరూమ్) ఉంటుంది.

2. రాయల్ ఎన్‌ఫీల్డ్ బుల్లెట్ 350 (Bullet 350)
చాలా ఏళ్లుగా రాయల్ ఎన్‌ఫీల్డ్ బ్రాండ్‌ను మోస్తున్న బైక్ ఇది. ఒకసారి బుల్లెట్ ఎక్కితే ఆ కిక్కే వేరు అనిపించేలా దీని డిజైన్ ఉంటుంది. పాత తరం వారికే కాకుండా నేటి యువతకు కూడా ఇది ఫేవరెట్. ఇందులో 349 సీసీ పవర్‌ఫుల్ ఇంజిన్ ఉంది. ఇది క్లీన్ అండ్ సింపుల్ లుక్ కోరుకునే వారికి పర్ఫెక్ట్ ఛాయిస్. మన్నికకు ఈ బైక్ మారుపేరు. దీని ధర రూ.1.63 లక్షల నుంచి రూ.2.04 లక్షల వరకు (ఎక్స్-షోరూమ్) ఉంటుంది.

3. రాయల్ ఎన్‌ఫీల్డ్ క్లాసిక్ 350 (Classic 350)
రాయల్ ఎన్‌ఫీల్డ్ కంపెనీకి అత్యధిక సేల్స్ తెచ్చిపెట్టే బైక్ ఏదైనా ఉందంటే అది క్లాసిక్ 350 మాత్రమే. ఇది రోజూ ఆఫీసుకు వెళ్లడానికి లేదా ఫ్యామిలీతో బయటకు వెళ్లడానికి చాలా సౌకర్యంగా ఉంటుంది. ఇందులో అడ్జస్టబుల్ లీవర్స్, గేర్ పొజిషన్ ఇండికేటర్ వంటి అడ్వాన్సుడ్ ఫీచర్లు ఉన్నాయి. ఈ బైక్ క్లాసిక్ లుక్ మిమ్మల్ని రోడ్డుపై ప్రత్యేకంగా చూపిస్తుంది. దీని ధర రూ.1.82 లక్షల నుంచి రూ.2.17 లక్షల వరకు (ఎక్స్-షోరూమ్) ఉంటుంది.

4. రాయల్ ఎన్‌ఫీల్డ్ మీటియోర్ 350 (Meteor 350)
మీరు లాంగ్ రైడ్స్ వెళ్లడం ఇష్టపడే వారైతే మీటియోర్ 350 మీ కోసమే పుట్టింది. దీనిని క్రూజర్ బైక్ అని పిలుస్తారు. అంటే సుదూర ప్రయాణాలు చేసినా నడుము నొప్పి రాకుండా ఉండేలా దీని సీటింగ్ డిజైన్ ఉంటుంది. ఇందులో 15 లీటర్ల పెద్ద ఫ్యూయల్ ట్యాంక్ ఉంది. గూగుల్ మ్యాప్స్ లాంటి నేవిగేషన్ ఫీచర్ ఇందులో ఉండటం వల్ల మీరు కొత్త దారుల్లో కూడా ధైర్యంగా వెళ్లవచ్చు. దీని ధర రూ. 1.95 లక్షల నుంచి రూ. 2.18 లక్షల వరకు (ఎక్స్-షోరూమ్).

5. రాయల్ ఎన్‌ఫీల్డ్ గోవన్ క్లాసిక్ 350 (Goan Classic 350)
నలుగురిలోనూ ప్రత్యేకంగా కనిపించాలనుకునే వారి కోసం గోవన్ క్లాసిక్ బెస్ట్. ఇది బాబర్ స్టైల్ డిజైన్‌తో వస్తుంది. వెనుక వైపు సీటు తీసేసి సింగిల్ సీటర్ గా కూడా దీనిని మార్చుకోవచ్చు. దీని రెట్రో లుక్, విభిన్నమైన కలర్ ఆప్షన్స్ మిమ్మల్ని ఇట్టే ఆకర్షిస్తాయి. ఇంజిన్ పర్ఫార్మెన్స్ పరంగా ఇది క్లాసిక్ 350 లాగే పవర్‌ఫుల్‌గా ఉంటుంది. దీని ధర రూ.2.19 లక్షల నుంచి రూ.2.22 లక్షల వరకు (ఎక్స్-షోరూమ్).

6. రాయల్ ఎన్‌ఫీల్డ్ స్క్రామ్ 440 (Scram 440)
లిస్టులో అన్నింటికంటే పవర్‌ఫుల్ బైక్ ఇది. దీని ఇంజిన్ కెపాసిటీ 443 సీసీ. హైవేలపై వేగంగా వెళ్లడానికి, సిటీలో దూసుకుపోవడానికి ఇది చాలా వర్సటైల్ బైక్. ఇందులో 6-స్పీడ్ గేర్‌బాక్స్ ఉంది, దీనివల్ల ప్రయాణం చాలా స్మూత్ గా ఉంటుంది. 25.4 bhp పవర్ తో ఇది యువతను విపరీతంగా ఆకట్టుకుంటోంది. దీని ధర రూ.2.23 లక్షల నుంచి రూ.2.30 లక్షల వరకు (ఎక్స్-షోరూమ్).