చరిత్ర సృష్టించిన మార్చి నెల.. పెట్రోల్ ఇంజిన్ల కాలం చెల్లింది, ఇక అంతా బ్యాటరీ మాయే

భారతదేశ ఆటోమొబైల్ రంగంలో ఎలక్ట్రిక్ విప్లవం కొత్త పుంతలు తొక్కుతోంది. ముఖ్యంగా టూ-వీలర్ విభాగంలో మునుపెన్నడూ లేని విధంగా అమ్మకాలు ఊపందుకున్నాయి. మార్చి 2026 నెలకు సంబంధించిన ఎలక్ట్రిక్ టూ వీలర్ల విక్రయాల గణాంకాలు తాజాగా విడుదలయ్యాయి. ఈ డేటా చూస్తుంటే మార్కెట్లో ఒకప్పుడు రారాజుగా వెలిగిన కంపెనీలు వెనుకబడిపోగా, నమ్మకానికి మారుపేరుగా నిలిచిన పాత తరం దిగ్గజ కంపెనీలు ఈవీ రేసులో టాప్ గేర్‌లో దూసుకుపోతున్నాయి. కేవలం 31 రోజుల్లోనే రెండు ప్రధాన కంపెనీలు కలిసి దాదాపు లక్షకు చేరువలో అంటే 95,550 ఎలక్ట్రిక్ స్కూటర్లను విక్రయించి రికార్డు సృష్టించాయి. ఈ రేసులో టీవీఎస్ మోటార్, బజాజ్ ఆటో తమ ఆధిపత్యాన్ని చాటుకోగా, స్టార్టప్ దిగ్గజం ఓలా ఎలక్ట్రిక్ మాత్రం గట్టి దెబ్బతింది.

టీవీఎస్ మోటార్
ఎలక్ట్రిక్ టూ-వీలర్ మార్కెట్లో టీవీఎస్ మోటార్ కంపెనీ తన జైత్రయాత్రను కొనసాగిస్తోంది. మార్చి 2026లో ఈ కంపెనీ ఏకంగా 49,304 యూనిట్లను విక్రయించింది. గతేడాది ఇదే నెలలో 30,772 యూనిట్లు మాత్రమే అమ్ముడవగా, ఈసారి ఏకంగా 60 శాతం వృద్ధిని నమోదు చేసింది. తన ఐక్యూబ్ (iQube) మోడల్‌తో టీవీఎస్ వినియోగదారుల మనసు గెలుచుకుంది. కేవలం అమ్మకాలే కాకుండా, సర్వీస్ నెట్‌వర్క్, నమ్మకమైన బిల్డ్ క్వాలిటీ టీవీఎస్‌ను అగ్రస్థానంలో నిలబెట్టాయి. పెట్రోల్ బండ్ల తయారీలో దశాబ్దాల అనుభవం ఈవీ రంగంలో కూడా టీవీఎస్‌కు ప్లస్ పాయింట్‌గా మారింది.

బజాజ్ ఆటో
బజాజ్ ఆటో కూడా ఈవీ రంగంలో తన సత్తా చాటుతోంది. మార్చి 2026లో బజాజ్ 46,246 చేతక్ ఎలక్ట్రిక్ స్కూటర్లను విక్రయించి రెండో స్థానంలో నిలిచింది. గతేడాది మార్చిలో 35,215 యూనిట్లు అమ్ముడవగా, ఈసారి 31 శాతం వృద్ధిని సాధించింది. టీవీఎస్‌కు గట్టి పోటీ ఇస్తూ కేవలం కొన్ని వేల యూనిట్ల తేడాతో రెండో స్థానంలో నిలిచింది. ఒకప్పుడు భారతీయుల ఇంటి పేరుగా మారిన చేతక్ ఇప్పుడు ఎలక్ట్రిక్ రూపంలో మళ్ళీ ప్రతి ఇంటా సందడి చేస్తోంది. టీవీఎస్ మరియు బజాజ్ కలిసి ఈ ఒక్క నెలలోనే 95,550 స్కూటర్లను రోడ్లపైకి తీసుకొచ్చాయి.

ఎగిసిపడిన ఏథర్.. దూసుకొస్తున్న విడా
హీరో మటోకార్ప్ మద్దతు ఉన్న ఏథర్ ఎనర్జీ మార్చి నెలలో అద్భుతమైన ప్రదర్శన చేసింది. ఏకంగా 128 శాతం వృద్ధితో 35,688 యూనిట్లను విక్రయించి మూడో స్థానంలో నిలిచింది. టెక్నాలజీ ప్రియులకు ఏథర్ మొదటి ఛాయిస్‌గా మారుతోంది. మరోవైపు హీరో మటోకార్ప్ కి చెందిన విడా (Vida) బ్రాండ్ కూడా అనూహ్యంగా పుంజుకుంది. గతేడాది కేవలం 8 వేల యూనిట్లు అమ్ముడవగా, ఈ ఏడాది మార్చిలో 21,434 యూనిట్లతో 167 శాతం భారీ వృద్ధిని నమోదు చేసింది. ఈ గణాంకాలు చూస్తుంటే రాబోయే రోజుల్లో ఏథర్, హీరోలు కూడా టాప్-2 స్థానాల కోసం పోటీ పడటం ఖాయమనిపిస్తోంది.

ఓలా ఎలక్ట్రిక్ - ఊహించని పతనం
ఈవీ మార్కెట్లో ఒకప్పుడు తిరుగులేని రారాజుగా వెలిగిన ఓలా ఎలక్ట్రిక్ ఇప్పుడు గడ్డు కాలాన్ని ఎదుర్కొంటోంది. టాప్-5 కంపెనీలలో వార్షిక ప్రాతిపదికన అమ్మకాలు పడిపోయిన ఏకైక కంపెనీ ఓలానే కావడం గమనార్హం. మార్చి 2025లో 23,634 యూనిట్లు అమ్మిన ఓలా, 2026 మార్చికి వచ్చేసరికి కేవలం 10,117 యూనిట్లకు పరిమితమైంది. అంటే ఏకంగా 57 శాతం తగ్గుదల నమోదైంది. క్వాలిటీ సమస్యలు, సర్వీస్ సెంటర్ల దగ్గర కస్టమర్ల అసహనం, పెరుగుతున్న పోటీ ఓలా అమ్మకాలపై తీవ్ర ప్రభావం చూపాయి. పాత కంపెనీలైన టీవీఎస్, బజాజ్, హీరోలు మార్కెట్‌ను ఆక్రమించడంతో ఓలా వెనుకబడిపోయింది.

చిన్న కంపెనీల పెద్ద సందడి
టాప్ బ్రాండ్లు మాత్రమే కాకుండా చిన్న, స్టార్టప్ కంపెనీలు కూడా మంచి వృద్ధిని సాధించాయి. గ్రీవ్స్ ఎలక్ట్రిక్ 7,965 యూనిట్లతో 41 శాతం వృద్ధిని సాధించగా, రివర్ మోబిలిటీ ఏకంగా 417 శాతం వృద్ధితో 4,146 యూనిట్లను విక్రయించింది. బిగాస్ ఆటో (3,680), సింపుల్ ఎనర్జీ (1,744), ఈ-స్ప్రింటో గ్రీన్ ఎనర్జీ (1,510) వంటి కంపెనీలు కూడా తమ ఉనికిని చాటుకున్నాయి. ముఖ్యంగా ఈ-స్ప్రింటో కంపెనీ ఏకంగా 725 శాతం వార్షిక వృద్ధిని నమోదు చేసి అందరినీ ఆశ్చర్యపరిచింది.

రికార్డుల నెల.. మార్చి 2026
మొత్తంగా చూస్తే మార్చి 2026 నెల భారత ఎలక్ట్రిక్ టూ-వీలర్ చరిత్రలోనే ఒక మైలురాయిగా నిలిచిపోతుంది. ఈ ఒక్క నెలలో దేశవ్యాప్తంగా 1,90,941 ఎలక్ట్రిక్ వాహనాలు రిటైల్ విక్రయాలు జరిగాయి. అంటే సగటున రోజుకు 6,159 స్కూటర్లు అమ్ముడయ్యాయి. గత గరిష్ట స్థాయి 1.45 లక్షల యూనిట్లను ఈ నెల దాటడమే కాకుండా, 45 శాతం వార్షిక వృద్ధిని నమోదు చేసింది. 2025-26 పూర్తి ఆర్థిక సంవత్సరానికి గాను మొత్తం 14 లక్షల (1.4 మిలియన్) ఎలక్ట్రిక్ టూ-వీలర్లు అమ్ముడై సరికొత్త రికార్డును నెలకొల్పాయి. ప్రభుత్వ సబ్సిడీలు మరియు పెరుగుతున్న పెట్రోల్ ధరల నేపథ్యంలో ప్రజలు ఈవీల వైపు వేగంగా మళ్లుతున్నారని ఈ డేటా నిరూపిస్తోంది.