ఈ స్కూటరుకు ఎదురే లేదు.. మే నెల ఎలక్ట్రిక్ టూ-వీలర్ సేల్స్ రిపోర్ట్.. టాప్ 10 కంపెనీలు ఇవే

భారతదేశంలో ఎలక్ట్రిక్ టూ-వీలర్ మార్కెట్ రోజురోజుకూ సరికొత్త రికార్డులను సృష్టిస్తోంది. తాజాగా విడుదలైన మే 2026 నెల ఎలక్ట్రిక్ ద్విచక్ర వాహనాల విక్రయాల గణాంకాలు ఈ విషయాన్ని స్పష్టం చేస్తున్నాయి. ప్రతిసారీ లాగే ఈసారి కూడా ఈవీ మార్కెట్లో టీవీఎస్ మోటార్ కంపెనీ తన తిరుగులేని ఆధిక్యాన్ని ప్రదర్శించింది. దేశంలోని టాప్ ఈ-స్కూటర్ కంపెనీల జాబితాలో టీవీఎస్‌తో పాటు బజాజ్ ఆటో, ఏథర్ ఎనర్జీ, హీరో మోటోకార్ప్ అత్యుత్తమ స్థానాల్లో నిలిచాయి. ఒకప్పుడు మార్కెట్‌ను శాసించిన ఓలా ఎలక్ట్రిక్ కూడా టాప్ 5 లో నిలిచినప్పటికీ, దాని అమ్మకాలు దారుణంగా పడిపోవడం టెక్ వర్గాలను ఆశ్చర్యానికి గురిచేస్తోంది.

అమ్మకాల వివరాల ప్రకారం.. గత నెలలో టాప్ 10 ఎలక్ట్రిక్ టూ-వీలర్ కంపెనీలు దేశవ్యాప్తంగా మొత్తం కలిపి 1,61,313 యూనిట్లను విక్రయించాయి. పోయిన ఏడాది మే 2025 లో ఈ మొత్తం అమ్మకాల సంఖ్య కేవలం 96,285 యూనిట్లు మాత్రమే కావడం గమనార్హం. అంటే ఏడాది కాలంలోనే భారత మార్కెట్లో ఈవీ స్కూటర్ల అమ్మకాలు భారీగా పెరిగాయి. ఈ రేసులో హీరో మోటోకార్ప్ కంపెనీ తన ఏకైక విడా(Vida) సిరీస్ ఎలక్ట్రిక్ స్కూటర్లతో అత్యంత వేగంగా ముందుకు దూసుకుపోతూ మిగతా బ్రాండ్లకు గట్టి పోటీని ఇస్తోంది.

ఈ జాబితాలో మొదటి స్థానాన్ని కైవసం చేసుకున్న టీవీఎస్ మోటార్ కంపెనీ మే 2026 లో ఏకంగా 42,415 స్కూటర్లను విక్రయించింది. గత ఏడాది ఇదే మే నెలలో కంపెనీ కేవలం 25,804 యూనిట్లను మాత్రమే అమ్మగలిగింది. అంటే ఏడాది ప్రాతిపదికన టీవీఎస్ ఏకంగా 64 శాతం వృద్ధిని నమోదు చేసింది. దీనివల్ల ఈవీ మార్కెట్లో టీవీఎస్ వాటా ఏకంగా 24.86 శాతానికి చేరుకుంది. ఐక్యూబ్ మోడల్ కు వస్తున్న ఆదరణే దీనికి ప్రధాన కారణం.

రెండో స్థానంలో ఉన్న బజాజ్ ఆటో కూడా ఈసారి ఊహించని స్థాయిలో విక్రయాలు జరిపింది. బజాజ్ కంపెనీ మే 2026 లో 39,142 యూనిట్ల ఈ-స్కूటర్లను విక్రయించి రికార్డు సృష్టించింది. గత ఏడాది మే నెలలో ఈ సంఖ్య 22,643 యూనిట్లుగా ఉంది. అంటే బజాజ్ కంపెనీ ఏకంగా 73 శాతం వృద్ధితో 22.94 శాతం మార్కెట్ వాటాను సొంతం చేసుకుంది. టీవీఎస్ కు చాలా గట్టి పోటీదారుగా బజాజ్ చెతక్ మోడళ్లతో దూసుకుపోతోంది.

మూడో స్థానంలో నిలిచిన ప్రముఖ ఈవీ స్టార్టప్ కంపెనీ ఏథర్ ఎనర్జీ తన అమ్మకాలను ఏకంగా రెట్టింపు చేసుకుంది. మే 2026 లో ఏథర్ ఎనర్జీ 28,211 స్కూటర్లను మార్కెట్లోకి పంపింది. గత ఏడాది మే నెలలో జరిగిన 14,101 యూనిట్ల విక్రయాలతో పోలిస్తే ఇది కచ్చితంగా 100 శాతం వృద్ధి కావడం విశేషం. ప్రస్తుతం మార్కెట్లో ఏథర్ 16.53 శాతం వాటాతో టాప్ లీగ్‌లో కొనసాగుతోంది.

నాలుగో స్థానంలో ఉన్న హీరో మోటోకార్ప్ (విడా) అందరికంటే ఎక్కువ వృద్ధి రేటును సాధించింది. ఈ కంపెనీ మే 2026 లో 19,051 యూనిట్లను విక్రయించింది. గత ఏడాది మే నెలలో ఈ సంఖ్య కేవలం 7,385 యూనిట్లు మాత్రమే. అంటే హీరో విడా ఏకంగా 158 శాతం అద్భుతమైన గ్రోత్ రేటును నమోదు చేసి, మార్కెట్ వాటాను 11.16 శాతానికి పెంచుకుంది.

ఐదో స్థానంలో ఉన్న ఓలా ఎలక్ట్రిక్ కంపెనీకి ఈ మే నెల తీవ్ర నిరాశను మిగిల్చింది. టాప్ 10 లో ఉన్న అన్ని కంపెనీలు లాభాల బాటలో నడిస్తే, ఓలా మాత్రం నష్టాలను మూటగట్టుకుంది. ఓలా ఎలక్ట్రిక్ మే 2026 లో కేవలం 15,141 యూనిట్లను మాత్రమే విక్రయించగలిగింది. గత ఏడాది మే 2025 లో ఓలా ఏకంగా 18,967 యూనిట్లను అమ్మింది. అంటే ఏడాది కాలంలో ఓలా అమ్మకాలు 20 శాతం పడిపోయాయి. దీనివల్ల ఓలా మార్కెట్ షేర్ 18.08 శాతం నుండి ఏకంగా 8.87 శాతానికి పడిపోయింది.

మిగిలిన స్థానాల్లో ఉన్న చిన్న, కొత్త ఈవీ కంపెనీలు కూడా మార్కెట్లో మంచి పట్టు సాధిస్తున్నాయి. ఆరో స్థానంలో ఉన్న గ్రీవ్స్ ఎలక్ట్రిక్ మోబిలిటీ 7,696 యూనిట్లను విక్రయించి 78 శాతం గ్రోత్ సాధించింది. ఏడో స్థానంలో ఉన్న రివర్ మోబిలిటీ ఏకంగా 245 శాతం వృద్ధితో 3,717 యూనిట్లను అమ్మి అందరినీ ఆశ్చర్యపరిచింది. ఎనిమిదో స్థానంలో బీగ్యాస్ ఆటో 3,296 యూనిట్ల (205% గ్రోత్) అమ్మకాలతో నిలిచింది. చివరి రెండు స్థానాల్లో బాన్స్ ఇన్ఫినిటీ ఎలక్ట్రిక్ 1,346 యూనిట్లు (163% గ్రోత్), సింపుల్ ఎనర్జీ 1,298 యూనిట్ల (235% గ్రోత్) అమ్మకాలతో టాప్ 10లో చోటు దక్కించుకున్నాయి.