భారత ఎలక్ట్రిక్ మార్కెట్‌లో ఇప్పుడు ఈ ముగ్గురే కింగ్స్.. ఓలా కథ ముగిసినట్టేనా?

భారతదేశ ఎలక్ట్రిక్ టూవీలర్ మార్కెట్‌లో పెను మార్పులు చోటుచేసుకున్నాయి. ఒకప్పుడు ఈ సెగ్మెంట్‌లో రారాజుగా వెలిగిన స్టార్టప్ కంపెనీలు వెనకబడిపోగా, ఏళ్ల తరబడి మార్కెట్‌ను ఏలుతున్న సాంప్రదాయ కంపెనీలు మళ్లీ తమ పట్టును సాధించుకున్నాయి. ముఖ్యంగా 2026 ప్రారంభంలో వచ్చిన జనవరి విక్రయాల గణాంకాలు చూస్తుంటే.. ఎలక్ట్రిక్ వాహనాల మార్కెట్‌లో ప్రస్తుతం ముగ్గురు కింగ్స్ హవా స్పష్టంగా కనిపిస్తోంది.

ప్రముఖ మార్కెట్ పరిశోధన సంస్థ జేటో డైనమిక్స్ (Jato Dynamics) వెల్లడించిన తాజా నివేదిక ప్రకారం.. ప్రస్తుతం భారతదేశ ఎలక్ట్రిక్ టూవీలర్ మార్కెట్‌లో 60 శాతం వాటా కేవలం మూడు కంపెనీల చేతుల్లోనే ఉంది. అవి మరేవో కావు.. మనందరికీ తెలిసిన టీవీఎస్ (TVS), బజాజ్ (Bajaj), హీరో మోటోకార్ప్ (Hero MotoCorp). 2023లో కేవలం 34 శాతంగా ఉన్న ఈ కంపెనీల వాటా, నేడు 60 శాతానికి పెరగడం విశేషం. అంటే రోడ్డుపై తిరుగుతున్న ప్రతి 10 కొత్త ఎలక్ట్రిక్ స్కూటర్లలో 6 ఈ కంపెనీలవే ఉంటున్నాయి.

తమిళనాడుకు చెందిన టీవీఎస్ మోటార్ కంపెనీ ప్రస్తుతం ఎలక్ట్రిక్ విప్లవంలో తిరుగులేని నాయకుడిగా అవతరించింది. 2026 జనవరిలో ఏకంగా 34,440 యూనిట్లను విక్రయించి 28 శాతం మార్కెట్ వాటాతో నంబర్ 1 స్థానాన్ని కైవసం చేసుకుంది. వీరి ఐక్యూబ్ (iQube) మోడల్ ఇప్పటికే ఫ్యామిలీ స్కూటర్‌గా మంచి గుర్తింపు పొందగా, కొత్తగా వచ్చిన ఆర్బిటర్ (Orbiter) మోడల్ అమ్మకాల్లో కొత్త వేగాన్ని తెచ్చింది. ప్రతిరోజూ సగటున 1,111 ఎలక్ట్రిక్ స్కూటర్లను టీవీఎస్ విక్రయిస్తుండటం గమనార్హం.

మరోవైపు బజాజ్ ఆటో తన చేతక్ (Chetak) బ్రాండ్‌తో దూసుకుపోతోంది. జనవరిలో 25,520 యూనిట్లను అమ్మి రెండో స్థానంలో నిలిచింది. దేశవ్యాప్తంగా ఉన్న 4,000 పాయింట్ ఆఫ్ సేల్స్, విస్తృతమైన సర్వీస్ నెట్‌వర్క్ బజాజ్‌కు కొండంత అండగా నిలిచాయి. ఇక హీరో మోటోకార్ప్ తన విడా (Vida) బ్రాండ్‌తో అనూహ్య వృద్ధిని సాధించింది. గత ఏడాదితో పోలిస్తే వీరి అమ్మకాలు ఏకంగా 700 శాతం పెరిగి 13,000 యూనిట్లకు చేరుకున్నాయి.

ఒకప్పుడు 40 శాతం మార్కెట్ వాటాతో అగ్రస్థానంలో ఉన్న ఓలా ఎలక్ట్రిక్ (Ola Electric) ప్రస్తుతం తీవ్ర సంక్షోభంలో ఉంది. జనవరిలో ఓలా అమ్మకాలు కేవలం 7,512 యూనిట్లకు పడిపోయి, టాప్ 5లో చిట్టచివరి స్థానానికి చేరుకుంది. దీనికి ప్రధాన కారణం ఆ కంపెనీ ఎదుర్కొంటున్న సర్వీస్ సమస్యలే. సోషల్ మీడియాలో కస్టమర్ల నుంచి వస్తున్న వెల్లువెత్తిన ఫిర్యాదులు, విడిభాగాల కొరత, నమ్మకమైన సర్వీస్ సెంటర్లు లేకపోవడం ఓలాను దెబ్బతీశాయి. దీంతో కస్టమర్లు కొత్త స్టార్టప్‌ల కంటే నమ్మకమైన పాత కంపెనీల వైపు మొగ్గు చూపుతున్నారు.

స్టార్టప్ కంపెనీలలో ఆథర్ ఎనర్జీ (Ather Energy) మాత్రమే నిలకడగా రాణిస్తోంది. జనవరిలో 21,923 యూనిట్ల విక్రయాలతో మూడో స్థానంలో నిలిచింది. వీరి ఫ్యామిలీ స్కూటర్ రిజ్తా (Rizta) మార్కెట్లో సూపర్ హిట్ అవ్వడమే దీనికి ప్రధాన కారణం. రిజ్తా ఇప్పటికే 2 లక్షల విక్రయాల మైలురాయిని దాటి ఆథర్‌కు పెద్ద ఎత్తున మార్కెట్ వాటాను సంపాదించి పెట్టింది.