300 కిమీ రేంజ్..బైక్‎కే కెమెరా..ఎలక్ట్రిక్ బైక్ సెగ్మెంట్‌లో టీవీఎస్ సంచలనం

టీవీఎస్ మోటార్ కంపెనీ తన ఎలక్ట్రిక్ ప్రస్థానంలో సరికొత్త అధ్యాయానికి తెరలేపింది. ఇప్పటికే ఎలక్ట్రిక్ స్కూటర్ల విభాగంలో ఐక్యూబ్(iQube), ప్రీమియం ఎలక్ట్రిక్ స్కూటర్ TVS Xతో తనదైన ముద్ర వేసిన ఈ హోసూర్ ఆధారిత సంస్థ, ఇప్పుడు నేరుగా ఎలక్ట్రిక్ మోటార్ సైకిళ్ల మార్కెట్లోకి అడుగుపెడుతోంది. తాజాగా టీవీఎస్ తన సరికొత్త ఎలక్ట్రిక్ బైక్ e.FX.3O డిజైన్‌ను భారత్‌లో పేటెంట్ చేసింది. 2025లో మిలన్‌లో జరిగిన EICMA ఈవెంట్‌లో ఒక కాన్సెప్ట్ రూపంలో ప్రపంచానికి పరిచయమైన ఈ బైక్, ఇప్పుడు ప్రొడక్షన్ మోడల్‌గా రూపాంతరం చెందుతోంది.

టీవీఎస్ e.FX.3O డిజైన్ చూస్తుంటేనే ఇది ఒక సాధారణ మోటార్ సైకిల్ కాదని అర్థమవుతోంది. షార్ప్ బాడీ ప్యానెల్స్, అగ్రెసివ్ స్టాన్స్, రెక్టాంగ్యులర్ (దీర్ఘచతురస్ర) ఆకారంలో ఉన్న ఎల్‌ఈడీ హెడ్‌ల్యాంప్ దీనికి ఒక అద్భుతమైన ఫ్యూచరిస్టిక్ లుక్ ఇస్తున్నాయి. ఈ బైక్ కేవలం చూడటానికే కాదు, గాలి ఒత్తిడిని తట్టుకుని వేగంగా దూసుకెళ్లేలా (Aerodynamics) దీనిని రూపొందించారు.

ట్యాంక్ ఎక్స్‌టెన్షన్స్, సైడ్ ఫెయిరింగ్స్‌పై ఉన్న లోతైన గాడులు ఇంజిన్ కూలింగ్‌కు, వేగానికి తోడ్పడతాయి. ముఖ్యంగా ఇందులో ఉన్న గోల్డెన్ యూఎస్‌డీ (USD) ఫ్రంట్ ఫోర్క్స్, వెనుక మోనోషాక్ సస్పెన్షన్ దీనిని ఒక ప్రీమియం స్పోర్ట్స్ బైక్‌గా నిలబెడుతున్నాయి.

టెక్నాలజీ పరంగా టీవీఎస్ ఈ బైక్‌ను ఒక టెక్ షోకేస్‎గా మార్చింది. ఇందులో అమర్చిన ఇంటిగ్రేటెడ్ కెమెరా సిస్టమ్, రాడార్ ఆధారిత ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) ఈ సెగ్మెంట్‌లో మొదటిసారి. ఇది ముందు, వెనుక భాగంలో డాష్ కెమెరాలను కలిగి ఉంటుంది.

దీనివల్ల బ్లైండ్ స్పాట్ డిటెక్షన్, ముందున్న వాహనాన్ని ఢీకొట్టకుండా హెచ్చరించే కొలిజన్ వార్నింగ్ మరియు ఓవర్‌టేక్ అలర్ట్స్ వంటి ఫీచర్లు రైడర్‌కు అందుబాటులో ఉంటాయి. 10.2 ఇంచుల పెద్ద TFT పనోరమిక్ డిస్‌ప్లే ద్వారా నావిగేషన్, స్మార్ట్‌ఫోన్ కనెక్టివిటీ, రైడ్ అనాలిటిక్స్ వంటివి కళ్లముందే కనిపిస్తాయి.

పర్ఫార్మెన్స్ విషయంలో కూడా టీవీఎస్ ఎక్కడా తగ్గడం లేదు. టీవీఎస్ తన Apache RTE రేస్ బైక్ అనుభవాన్ని ఈ ప్రాజెక్ట్‌లో ఉపయోగిస్తోంది. ఇందులో మిడ్-మౌంటెడ్ మోటార్, బెల్ట్ డ్రైవ్ సిస్టమ్ ఉండబోతున్నాయి. ఇది చైన్ డ్రైవ్ కంటే నిశ్శబ్దంగా, స్మూత్‎గా పని చేస్తుంది.

ఒక్కసారి ఛార్జ్ చేస్తే 250 నుంచి 300 కిలోమీటర్ల రేంజ్ ఇచ్చే సామర్థ్యం గల భారీ బ్యాటరీ ప్యాక్ ఇందులో ఉంది. 0 నుంచి 60 కిమీ వేగాన్ని కేవలం 3 సెకన్లలోపే అందుకోగలదని అంచనా. దీని పర్ఫార్మెన్స్ 200సీసీ నుంచి 300సీసీ పెట్రోల్ ఇంజిన్ బైక్లకు పోటీగా ఉంటుంది.

భద్రత కోసం రెండు చక్రాలకు పెటల్ డిస్క్ బ్రేక్స్ , డ్యూయల్ ఛానల్ ఏబీఎస్ (ABS) స్టాండర్డ్ ఫీచర్లుగా రానున్నాయి. దీని ధర సుమారు రూ.2.5 లక్షల నుంచి రూ.3 లక్షల వరకు ఉండవచ్చు. 2026 చివరలో లేదా 2027 ప్రారంభంలో ఈ బైక్ భారతీయ రోడ్లపై పరుగు తీయనుంది. టీవీఎస్ కున్న బలమైన సర్వీస్ నెట్‌వర్క్, నమ్మకమైన బ్రాండ్ ఇమేజ్ ఈ బైక్‌ను ఎలక్ట్రిక్ మోటార్ సైకిల్ విభాగంలో లీడర్‌గా మార్చే అవకాశం ఉంది.