ఈ స్కూటర్‌ను కోటి మంది కొనబోతున్నారు.. రూ.90 వేలకే 90 కి.మీ మైలేజ్ మోడల్ కూడా రాబోతుంది!

భారతదేశంలో స్కూటర్ల మార్కెట్‌లో విశేషమైన పోటీ ఉన్నప్పటికీ, కొన్ని మోడళ్లకు మాత్రం ప్రత్యేకమైన గుర్తింపు లభిస్తుంది. అలాంటి మోడళ్లలో టీవీఎస్ జూపిటర్ (TVS Jupiter) ఒకటి. టీవీఎస్ మోటార్ కంపెనీ (TVS Motor Company) తయారు చేసిన ఈ స్కూటర్, విడుదలైనప్పటి నుంచి నిరంతరం వినియోగదారుల ఆదరణను పొందుతూ ముందుకు సాగుతోంది. 2013లో మార్కెట్లోకి వచ్చిన జూపిటర్, అప్పటి నుంచి ఇప్పటివరకు తన స్థిరమైన పనితీరు, సౌకర్యవంతమైన రైడింగ్ అనుభవం, కుటుంబానికి అనుకూలమైన డిజైన్‌తో ప్రత్యేకంగా నిలిచింది. నగరాల్లో రోజువారీ ప్రయాణాల కోసం సరిపోయేలా రూపొందించబడిన ఈ స్కూటర్, అన్ని వయసుల వారిని ఆకర్షించేలా ఉంటుంది.

ముఖ్యంగా సింపుల్ డిజైన్, మెరుగైన మైలేజ్, సౌకర్యవంతమైన సీటింగ్ వంటి అంశాలు దీన్ని కుటుంబ స్కూటర్‌గా ప్రజల్లోకి తీసుకెళ్లాయి. ఇలాంటి విశ్వసనీయత కారణంగానే జూపిటర్ ఒక భారీ మైలురాయిని చేరుకుంది. భారత మార్కెట్లో మొత్తం 90 లక్షల (9 మిలియన్ల)కు పైగా యూనిట్లు అమ్ముడవడం ఈ స్కూటర్ విజయానికి నిదర్శనం. అంటే కేవలం 13 సంవత్సరాల వ్యవధిలోనే దాదాపు 90 లక్షల స్కూటర్లు విక్రయించబడడం చిన్న విషయం కాదు.

ఇది వినియోగదారుల విశ్వాసం ఎంత స్థాయిలో ఉందో స్పష్టంగా చూపిస్తుంది. ఇక TVS Motor Company కోసం కూడా ఇది ఒక గొప్ప విజయంగా చెప్పుకోవాలి. తమ పోర్ట్‌ఫోలియోలో అత్యధికంగా అమ్ముడైన స్కూటర్‌గా జూపిటర్ ప్రత్యేక స్థానాన్ని సంపాదించింది. ప్రతి ఏడాది మారుతున్న వినియోగదారుల అవసరాలకు అనుగుణంగా కొత్త ఫీచర్లు, అప్‌డేట్స్ తీసుకువస్తూ కంపెనీ దీన్ని మరింత బలంగా నిలబెట్టింది.

వాస్తవానికి, టీవీఎస్ అమ్మకాలలో జూపిటర్ ఎంత పెద్ద పాత్ర పోషిస్తుందో ఈ గణాంకాలు చూస్తే స్పష్టంగా అర్థమవుతుంది. కంపెనీ విక్రయించిన మొత్తం స్కూటర్లలో సగానికి పైగా జూపిటర్ వాటానే ఉంది. 2025-26 ఆర్థిక సంవత్సరంలో TVS మొత్తం సుమారు 23 లక్షల స్కూటర్లను విక్రయించగా, అందులో 64 శాతం జూపిటర్ స్కూటర్లే. అంటే ఒక్క జూపిటర్ మోడల్ మాత్రమే దాదాపు 14.63 లక్షల యూనిట్ల అమ్మకాలను నమోదు చేసింది.

ఒకే స్కూటర్ మోడల్ ఇంత భారీ సంఖ్యలో అమ్ముడవడం అనేది సాధారణ విషయం కాదు. ఇంకా ఆసక్తికరమైన విషయం ఏమిటంటే, ఈ సంఖ్యలు గత ఏడాదితో పోలిస్తే గణనీయమైన వృద్ధి. 2024-25 ఆర్థిక సంవత్సరంలో కేవలం 11.07 లక్షల జూపిటర్ స్కూటర్లు మాత్రమే అమ్ముడవగా, ఇప్పుడు అది 32 శాతం పెరగడం ద్వారా 14.63 లక్షలకు చేరుకుంది. అంటే ప్రతి ఏడాది ఈ స్కూటర్‌కు డిమాండ్ మరింత పెరుగుతోందని చెప్పొచ్చు.

ప్రస్తుతం జూపిటర్ మరో భారీ మైలురాయికి దగ్గరలో ఉంది. ఈ స్కూటర్, 2026 సంవత్సరం ముగిసే సరికి మొత్తం అమ్మకాలు 1 కోటి యూనిట్ల మార్క్‌ను దాటే అవకాశాలు కనిపిస్తున్నాయి. ఈ లక్ష్యాన్ని చేరుకోవడానికి ఇంకా దాదాపు 10 లక్షల యూనిట్లు మాత్రమే అమ్ముడవ్వాల్సి ఉంది. ముఖ్యంగా, ఏడాది ముగియడానికి ఇంకా 8 నెలల సమయం ఉండటంతో, ప్రస్తుత డిమాండ్‌ను బట్టి చూస్తే ఈ టార్గెట్‌ను సులభంగా చేరుకునే అవకాశముంది.

మార్కెట్లో కంపెనీ ఈ స్కూటర్‌ను రెండు వెర్షన్లలో 113 సిసి, 125 సిసి లలో అందిస్తోంది. అయితే త్వరలోనే జూపిటర్‌కు CNG వెర్షన్‌ను తీసుకురావాలని యోచిస్తోంది. ఈ కొత్త వెర్షన్‌లో 125 సిసి ఇంజన్ ఉండనుండగా, కిలో CNGకు సుమారు 90 కిలోమీటర్ల వరకు మైలేజ్ ఇస్తుందని అంచనా వేస్తున్నారు. ధర విషయానికి వస్తే, ఈ CNG వెర్షన్‌ను సుమారు రూ.90 వేల పరిధిలో ఉంచే అవకాశముంది.