రేసింగ్‎లో బైకులనే ఓడించింది..కానీ ఈ స్కూటర్ రావాలంటే మాత్రం 2027 దాకా ఆగాల్సిందే

భారత ఎలక్ట్రిక్ టూ-వీలర్ మార్కెట్లో అత్యంత భారీ అంచనాలతో ఎదురుచూస్తున్న పవర్‌ఫుల్ ఈవీ స్కూటర్ అల్ట్రావాలెట్ టెసరాక్ట్(Ultraviolette Tesseract) లాంచ్ టైమ్‌లైన్ అధికారికంగా వాయిదా పడింది. బెంగళూరుకు చెందిన ప్రముఖ ఎలక్ట్రిక్ వాహనాల స్టార్టప్ కంపెనీ అల్ట్రావాలెట్.. ఈ అల్ట్రా ప్రీమియం, హై-పెర్ఫార్మెన్స్ ఎలక్ట్రిక్ స్కూటర్ లాంచ్‌ను జనవరి 2027 కి వాయిదా వేస్తున్నట్లు ప్రకటించింది.

వాస్తవానికి ఈ స్కూటర్ 2026 మొదటి లేదా రెండవ త్రైమాసికంలోనే మార్కెట్లోకి రావాల్సి ఉంది. అయితే రైడింగ్ క్వాలిటీ, కంఫర్ట్ లెవెల్స్, అడ్వాన్స్‌డ్ టెక్నాలజీ విషయంలో ఎలాంటి రాజీ పడకూడదనే ఉద్దేశంతోనే కంపెనీ ఈ నిర్ణయం తీసుకుంది. డెలివరీలు ఆలస్యం కావడం వెనుక పవర్‌ట్రెయిన్ ప్యాకేజింగ్, సాంకేతిక సవాళ్లు ప్రధాన కారణాలని యాజమాన్యం వెల్లడించింది.

మొదట ఈ స్కూటర్‌ను కంపెనీ తమ పాపులర్ మోడల్స్ అయిన ఎఫ్77 (F77), ఎక్స్-47 (X-47) ల పవర్‌ట్రెయిన్ ప్లాట్‌ఫామ్‌పైనే రూపొందించాలని ప్లాన్ చేసింది. కానీ స్కూటర్ బాడీ షేప్ వల్ల స్పేస్, బ్యాటరీ టెంపరేచర్ (ఉష్ణోగ్రత) నిర్వహణలో కంపెనీకి కొన్ని ఇబ్బందులు ఎదురయ్యాయి. ఆ సమయంలో కంపెనీ ముందు రెండు ఆప్షన్లు మిగిలాయి.

ఒకటి.. తాము ప్రామిస్ చేసిన 30 లీటర్ల బూట్ స్పేస్‎లో భారీగా కోత పెట్టడం, లేదా లాంచ్ సమయంలో ప్రకటించిన 15 కిలోవాట్ పవర్ కెపాసిటీని 10 కిలోవాట్లకు తగ్గించడం. అయితే పవర్‌లో అస్సలు కాంప్రమైజ్ అవ్వకూడదని భావించిన అల్ట్రావాలెట్.. స్కూటర్ డిజైన్‌ను మరింత రీసెర్చ్ చేసి పక్కాగా మార్కెట్లోకి తేవడానికి గడువును 2027 మొదటి త్రైమాసికానికి పొడిగించింది.

లాంచ్ ఆలస్యమైనప్పటికీ, ఈ స్కూటర్ పెర్ఫార్మెన్స్ మాత్రం నెక్ట్స్ లెవెల్‌లో ఉండబోతోందని ఆటోమొబైల్ వర్గాలు స్పష్టం చేస్తున్నాయి. డ్రాగ్ రేస్ టెస్టింగుల్లో ఈ ఎలక్ట్రిక్ స్కూటర్ ప్రస్తుతం భారతదేశంలో స్థానికంగా తయారవుతున్న అన్ని పెట్రోల్, ఈవీ స్కూటర్లను చాలా ఈజీగా ఓడించి రికార్డు సృష్టించింది. అంతటితో ఆగకుండా.. వెనుక ఒక ప్యాసింజర్ కూర్చున్నప్పటికీ, ఈ స్కూటర్ మార్కెట్లోని పలు పాపులర్ 150cc నుంచి 200cc పెట్రోల్ బైకులను కూడా రేసింగ్‌లో వెనక్కి నెట్టి అందరినీ ఆశ్చర్యపరిచింది.

ఈ క్రేజీ స్కూటర్ గరిష్టంగా గంటకు 125 కిలోమీటర్ల టాప్ స్పీడ్‌తో దూసుకెళ్లగలదని నివేదికలు చెబుతున్నాయి. దీనివల్ల భారతదేశంలోనే అత్యంత వేగవంతమైన స్కూటర్‌గా టెసరాక్ట్ నిలవడం ఖాయంగా కనిపిస్తోంది. వినియోగదారుల బడ్జెట్, రేంజ్ అవసరాలకు అనుగుణంగా కంపెనీ దీనిని 3.5 kWh, 4 kWh, భారీ సామర్థ్యం గల 6 kWh వంటి విభిన్న బ్యాటరీ ప్యాక్ ఆప్షన్లతో మార్కెట్లోకి తీసుకురావడానికి సన్నాహాలు చేస్తోంది.

గతంలో ప్రదర్శించిన కాన్సెప్ట్ మోడల్‌పై కస్టమర్లు, ఈవీ లవర్స్ నుంచి వచ్చిన ఫీడ్‌బ్యాక్ ఆధారంగా అల్ట్రావాలెట్ సంస్థ ఉత్పత్తి వెర్షన్‌లో పలు కీలక మార్పులు చేసింది. ముఖ్యంగా లాంగ్ రైడింగ్‌లో రైడర్, వెనుక కూర్చునే వారికి అద్భుతమైన సౌకర్యాన్ని అందించేలా సీట్ డిజైన్‌ను పూర్తిగా మార్చేసింది. అలాగే నిత్యం సిటీలో వాడేటప్పుడు ఎర్గోనామిక్స్ బాగుండేలా ఫ్లోర్‌బోర్డ్ ఏరియాను పెంచి, మరింత ఎక్కువ లెగ్‌రూమ్ లభించేలా రీడిజైన్ చేసింది.

సాంకేతికంగా చూస్తే.. ఈ స్కూటర్ తన సిస్టర్ మోడల్స్ అయిన ఎఫ్77 మాక్ 2, ఎక్స్-47 ల నుంచి ఎన్నో విలాసవంతమైన ఫీచర్లను అరువు తెచ్చుకోనుంది. సేఫ్టీ కోసం డ్యూయల్-ఛానల్ ఏబీఎస్ (Dual-Channel ABS), ట్రాక్షన్ కంట్రోల్, రాడార్ ఆధారిత రైడర్ అసిస్టెన్స్ సిస్టమ్స్, హైపర్‌సెన్స్ సేఫ్టీ టెక్నాలజీ, స్మార్ట్‌ఫోన్ కనెక్టివిటీ వంటి ప్రీమియం ఎలక్ట్రానిక్ ఫీచర్లు ఇందులో ఉండబోతున్నాయి.

టెసరాక్ట్ లాంచ్ ఆలస్యమైనప్పటికీ, అల్ట్రావాలెట్ కంపెనీ భారతీయ కస్టమర్ల కోసం మరో అదిరిపోయే సర్ప్రైజ్ ఇచ్చింది. తమ పాపులర్ ఎలక్ట్రిక్ క్రాస్ఓవర్ మోటార్ సైకిల్ అల్ట్రావాలెట్ ఎక్స్-47 (Ultraviolette X-47) సిరీస్‌లో అత్యంత సరసమైన సరికొత్త బేస్ వేరియంట్‌ను మార్కెట్లోకి విడుదల చేసింది. ఈ ఎంట్రీ-లెవెల్ వేరియంట్ ఎక్స్-షోరూమ్ ధరను కేవలం రూ. 2.49 లక్షలుగా నిర్ణయించింది. ప్రీమియం ఈవీ బైక్ కొనాలనుకునే మిడిల్ క్లాస్ రైడర్ల బడ్జెట్‌ను దృష్టిలో ఉంచుకుని కంపెనీ తీసుకున్న ఈ నిర్ణయం పెద్ద గేమ్ ఛేంజర్ కానుంది.

ధర తక్కువైనప్పటికీ ఈ బేస్ వేరియంట్ పెర్ఫార్మెన్స్ మాత్రం అదిరిపోయింది. ఈ బైక్ కేవలం 2.8 సెకన్లలోనే 0 నుంచి 60 కిలోమీటర్ల వేగాన్ని అందుకోగలదు. అలాగే దీని టాప్ స్పీడ్ గంటకు 145 కిలోమీటర్లుగా ఉంది. అత్యంత పవర్‌ఫుల్ బ్యాటరీతో వస్తున్న ఈ ఎక్స్-47 బైక్ ఒక్కసారి ఫుల్ ఛార్జ్ చేస్తే ఏకంగా 211 కిలోమీటర్ల లాంగ్ రేంజ్‌ను ఆఫర్ చేస్తుందని కంపెనీ అధికారికంగా ప్రకటించింది.